Мыекъопэ къэралыгъо технологическэ университетым истудентхэр программэу «Урысыем ущыпсэуныр ыкIи щыбгъэпсыныр» зыфиIорэм иапэрэ модулым хэлэжьагъэх, ар къалэу Ростов-на-Дону ыкIи Ивановскэ хэкум ащыкIуагъ.

Ростов-на-Дону щыкIогъэ программэм хэлэжьагъэх Арина Астаховар (аграрнэ технологиехэм яфакультет) ыкIи Самуил Образцовыр (экономикэмрэ юриспруденциемрэ яинформационнэ системэхэм яфакультет). Ивановэ щыкIуагъэр зэхэзыщагъэр ыкIи зезыщагъэр НапцIэкъо Рузанн ары (лечебнэ факультетым истуденткэ).

Программэм сэнаущыгъэ зыхэлъ студентхэу тихэгъэгу ичIыпIэ зэфэшъхьафхэм ащыпсэухэрэр зэрипхыгъэх, хэхъоныгъэхэр ашIынхэм ахэр адэлажьэх, пэрытныгъэ шэнхэр апсыхьэх, щыIэныгъэм имэхьанэ зэхашIыкIыным ыуж итых. Мэфэ заулэхэм кIалэхэр экспертмэ ялекциехэм ядэIугъэх, интерактивнэ сессиехэм ахэлэжьагъэх, патриотизмэм епхыгъэ упчIэхэр къызщаIэтыгъэ джэгукIэхэм ащызэнэкъокъугъэх, команднэ IофшIэныр зыфэдэр зэрагъэшIагъ, пшъэрылъхэр агъэуцугъэх, ныбжьыкIэ политикэм хэгъозагъэх.

Программэм чIыпIэ шъхьаIэ щаубытыгъ зекIо ыкIи команднэ Iофыгъохэм, ахэмэ яшIуагъэкIэ студентхэр зэдэIэпыIэжьынхэм фэгъэсагъэхэ хъугъэх, опытэу агъотыгъэм шъхьадэкIыхэзэ, зэгурыIохэу зэдэлэжьагъэх. Шъолъырхэм хэхъоныгъэхэр ягъэшIыгъэнхэм, технологиехэр агъэфедэнхэм, ныбжьыкIэ гукъэкIхэр хабзэм лъыгъэIэсыгъэнхэм, экспертхэм адызэхафынхэм хэлэжьагъэхэр пылъыгъэх, ахэри къадэхъугъэх.

Программэу «Урысыем ущыпсэуныр ыкIи щыбгъэпсыныр» зыфиIорэр Урысые студенческэ проектэу «О уикIогъу» зыцIэм ыкIи Росмолодежым, Урысыем гъэсэныгъэмрэ наукэмрэкIэ иминистерствэрэ, джащ фэдэу президентскэ платформэу «Урысыер — амалыбэхэм яхэгъэгу» зыфиIорэр яIэпыIэгъухэу агъэцакIэ.

Тистудентхэр мыщ фэдэ хъугъэ-шIэгъэ иным зэрэхэлэжьагъэхэмкIэ тафэгушIо, тапэкIэ гъэхъагъэхэр ашIынхэу, гукъэкIыкIэхэр яIэнхэу, гъэхъагъэхэр ашIынхэу тафэлъаIо!