МКъТУ-м иIофышIэхэр ыкIи истудентхэр торжественнэ зэхахьэу Хэгъэгу зэошхом ТекIоныгъэ къызэрэщыдахыгъэм ия 81-рэ илъэс фэгъэхьыгъэм хэлэжьагъэх. Iофтхьабзэм къыщыгущыIагъ Адыгэ Республикэм и ЛIышъхьэу КъумпIыл Мурат.

Зэхахьэм джащ фэдэу хэлэжьагъэх АР-м и Къэралыгъо Совет-Хасэм итхьаматэу Владимир Нарожнэр, УФ-м и Президент иполпред иаппарат ифедеральнэ инспектор шъхьаIэу Сергей Дрокиныр, Адыгэ Республикэм и Къэралыгъо упчIэжьэгъоу ТхьакIущынэ Аслъан, АР-м иапэрэ президентэу Джарымэ Аслъан, УФ-м ФедерациемкIэ Советым хэтхэу Хьапсэрэкъо Муратрэ Александр Наролинымрэ, УФ-м и Къэралыгъо Думэ идепутатэу Хьасанэкъо Мурат, МКъТУ-м иректорэу Къуижъ Саид, ухъумэкIо органхэм япащэхэр, АР-м иминистрэхэм я Кабинет хэтхэр, республикэ парламентым идепутатхэр, патриотическэ организациемэ ялIыкIохэр, хэушъхьафыкIыгъэ дзэ операцием иветеранхэр, общественнэ IофышIэхэр, ныбжьыкIэхэр.

Анахьэу анаIэ зытырагъэтыгъэр торжественнэ зэхахьэм къеблэгъагъэхэ  Хэгъэгу зэошхом иветеранхэр ары. Непэрэ мафэм республикэм заом хэлэжьагъэу ыкIи сэкъатныгъэ зиIэу нэбгырэ 14 щэпсэу. ЗэкIэмкIи шъолъырым Хэгъэгу зэошхом иветеранхэу, ахэмэ тылым щылэжьагъэхэри, концлагерэмэ ыкIи блокадникхэмрэ зэрахэтхэу, нэбгырэ 281-рэ къыщалъытэ.  

Адыгеим и ЛIышъхьэу КъумпIыл Мурат къэзэрэугъоигъэхэм ТекIоныгъэм и МафэкIэ къафэгушIуагъ, тарихъ шIэжьым икъэухъумэн мэхьанэшхо зэриIэр къыхигъэщыгъ. Ащ къызэриIуагъэмкIэ, советскэ народым илIыхъужъыгъэ, фронтовикмэ япсэемыблэжьыгъэ, тылым щыIэмэ зышъхьамысыжь IофшIэнэу агъэцэкIагъэм текIоныгъэр къапкъырыкIыгъ, лIэужэу къакIэлъыкIуагъэхэмкIэ щысэтехыпIэ хъугъэх. Шъхьафэу хэушъхьафыкIыгъэ дзэ операцием хэлажьэхэрэр къыхигъэщыгъэх. ЛIышъхьэм ахэр ТекIоныгъэм къыкIэлъыкIуагъэхэу, Хэгъэгум икъэухъумэн епхыгъэ хабзэхэр лъызгъэкIуатэхэу ылъытагъэх.  

Торжественнэ зэхахьэр мэфэкI концерткIэ аухыгъ, ащ Адыгэ Республикэм итворческэ купхэр хэлэжьагъэх.