Мыекъопэ къэралыгъо технологическэ университетым Урысые научнэ-практическэ конференциеу «Псауныгъэ зиIэ лIэужыр» зыфиIорэр щырагъэкIокIыгъ, ащ хэгъэгум ишъолъыр зэфэшъхьафхэм  ямедицинскэ ыкIи янаучнэ сообществэмэ ялIыкIохэр зэрищэлIагъэх.  Лечебнэ факультетыр ары зэхэщакIоу щытыгъэр.

ШIуфэс псалъэкIэ къэзэрэугъоигъэхэм закъыфагъэзагъ ДЗМ-м кIэлэцIыкIу хирургием ыкIи травматологием яотдел ипащэу, «Врачмэ я Хасэ (советым)» итхьаматэу, профессорэу Жанна Семеновар, джащ фэдэу лечебнэ факультетым идеканэу Беслъангъур Заремэ. Ахэмэ ягущыIэхэм къащыхагъэщыгъ профессиональнэ сообществэмкIэ мы Iофтхьабзэм мэхьанэшхо зэриIэр, неущрэ медицинэм щылэжьэщт специалистхэм япхыгъэ упчIэхэр зэхэфыгъэнхэмкIэ зэрэIофыгъошIур.

Конференцием ипрограммэ игъэкIотыгъэу щытыгъ, непэрэ медицинэм фэгъэхьыгъэ лъэныкъуабэ зэдиубытын ылъэкIыгъ. Апэрэ зэхэсыгъом къыдыхэлъытагъэу анахьэу анаIэ зытырадзагъэр нейромедицинэмрэ кIэлэцIыкIумэ япсауныгъэрэ. Профессорэу Жанна Семеновам докладэу къышIыгъэр кIэлэцIыкIу нейротравмэхэм афэгъэхьыгъагъ, ахэр къэмыхъунхэм пае шIэгъэн фаехэм. Тематикэр кIэлэцIыкIухэр джэгуным пыщагъэхэ зэрэхъугъэхэм фэгъэхьыгъагъ, ащ лъэшэу зэрепхыгъэхэм, джащ фэдэу уахътэм амалэу нейрореабилитациемкIэ къытыхэрэм шъхьэкуцIым уз Iаер къыхагъэщы хъумэ. Хэлажьэрэмэ зэхафыгъэмэ ащыщ сабыймэ япсихическэ псауныгъэ зэтегъэуцожьыгъэныр, екIолIакIэу къыфагъотыхэрэр, джащ фэдэу шъхьэм фыкъуагъэхэр фэхъугъэхэмэ, диагностикэр зэрашIырэр, нейроонкологическэ узхэм зэряIэзэхэрэр. КIэухым пщэр хъухэрэмэ зэряIазэхэрэм, шIыкIакIэу уахътэм ащ пае къыздихьыгъэхэм, медикэ-социальнэ гумэкIыгъоу зэрэщытым ягугъу ашIыгъ.

ЯтIонэрэ зэхэсыгъор клиническэ практикэм ыкIи профилактическэ медицинэм афэгъэхьыгъагъэх. Анахьэу зытегущыIагъэхэр сосудистэ хирургием епхыгъэ упчIэхэр ары, шIыкIакIэу онкоскринингым къыфагъотыхэрэм, нахьыжьэу узыр къызэрэхагъэщырэм. ЧIыпIэ ин джащ фэдэу зэхахьэм щызыубытыгъэмэ ащыщ докладхэу репродуктивнэ псауныгъэм фэгъэхьыгъэхэм, пшъэдэкIыжь инэу врачхэм, акушер-гинекологхэм ахьырэм, иуахътэм диштэрэ репродуктивнэ технологиехэр зэрагъэфедэхэрэм пкъышъолым системнэ укъуагъэхэр фэхъугъэхэ зыхъурэм. Шъхьафэу псауныгъэм икъэухъумэн, ныбжьыкIэхэр зэрэзыпылъыжьын фаехэм атегущыIагъэх: гъэсэныгъэ щыIэкIэ-псэукIэр студентхэм япсауныгъэ къаухъумэнымкIэ мэхьанэу иIэр. Научнэ программэр уахътэм диштэрэ технологиякIэхэр нэхэм язэтегъэуцожьынкIэ зэрагъэфедэхэрэм, ахэмэ япрактическэ лъэныкъо атегущыIагъэх.