Мыекъопэ къэралыгъо технологическэ университетым гъэ къэс зэхащэрэ научнэ-гъэсэныгъэ программэу «Врач ныбжьыкIэм иеджапI — 2026-рэ. Сэнэхьатым хэщэгъэныр» зыфиIорэр щыкIуагъ — медицинскэ профилым щылэжьэнэу щезыгъажьэрэ специалистхэмрэ профессиональнэ хэхъоныгъэ зышIыхэрэмрэ яплощадкэ инэу щыт.

Хабзэ зэрэхъугъэу программэм зэрепхых МКъТУ-м имедицинскэ институт щеджэрэ студентхэр, ординаторхэр ыкIи врач ныбжьыкIэхэу непэрэ мафэм диштэрэ медицинэм фэгъэхьыгъэ шIэныгъэхэр зэзыгъэгъоты зышIоигъохэр. Мыгъэ егъэджэным сэнэхьатыбэ зэдиубытыгъ: кIэлэцIыкIу хирургиер, нейрохирургиер, псауныгъэм икъэухъумэн зэхэщэгъэныр, общественнэ псауныгъэр, рентгенологиер, гинекологиер, неврологиер, нейропсихиатриер, медицинэ IэпыIэгъу псынкIэр, офтальмологиер, ультразвуковой ыкIи функциональнэ диагностикэр, джащ фэдэу общэ хирургиер.

ЕджапIэм тхьаматагъор дызэрахьэ ГБУЗ «НИИ неотложной детской хирургии и травматологии» зыфиIорэм нейрохирургиемкIэ ыкIи нейротравмэмкIэ иотдел ипащэу, ДЗМ, кIэлэцIыкIу нейрохирургием и Урысые обществэ ипрезидентэу, УФ-м и Минздрав штатым хэмыт икIэлэцIыкIу нейрохирург шъхьаIэу, медицинэ шIэныгъэхэмкIэ докторэу, профессорэу Жанна Семеновар, Мыекъопэ къэралыгъо технологическэ университетым иректорэу, экономикэ шIэныгъэхэмкIэ докторэу, доцентэу Къуижъ Саидэ, МКъТУ-м и Медицинскэ институт ипащэу, медицинэ шIэныгъэхэмкIэ кандидатэу Хъурай Аслъан.

Комитетэу зэхащагъэм научнэ ыкIи гъэIорышIэкIо сообществэм щыщхэр хэхьагъэх, ахэмэ зэу ащыщыгъ МКъТУ-м илечебнэ факультет идеканэу Беслъангъур Заремэ, джащ фэдэу шъолъыр лIыкIомэ ыкIи медицинэ учреждениехэм ащылажьэхэрэр.

ЕджапIэм игъэсэныгъэ Iахь практико-ориентированнэ лекциехэмкIэ зэхэщагъ, ахэр мэхьанэ зиIэ экспертмэ къаты, диагностикэр, Iэзэныр, медицинэ IэпыIэгъум икъэгъэлъэгъонхэр ащ хэтыгъэх. Десэмэ къадыхэлъытагъэу студентмэ псауныгъэм икъэухъумэн ицифровизацие, медицинскэ генетикэм, психиатрием екIолIакIэу непэрэ мафэм фашIырэр, офтальмологием ыкIи радиологиием япхыгъэ упчIэхэу сабыймэ афэгъэзагъэхэр зэрагъэшIагъэх. Шъхьафэу нейрохирургием тегущыIагъэх — едэIухэрэр уахътэм диштэрэ технологиехэм, клиническэ екIолIакIэхэм, высокотехнологичнэ лъэныкъом зэрэдэлажьэхэрэм ащыгъозагъэх.

Лекциехэр афытегъэпсыхьагъэх неущырэ медицинэ IофышIэхэм, ахэмэ клиническэ гупшысэ яIэным, междисциплинарнэ зэпхыныгъэхэр къагурыIонхэм, медицинэм хэхъоныгъэу ышIыхэрэм, агъотыгъэ шIэныгъэхэр практическэу агъэфедэнхэм, янеущрэ профессиональнэ IофшIэнкIэ къашъхьэпэщтхэм.