Мы тхьамафэу икIыгъэм Мыекъопэ къэралыгъо технологическэ университетым IофшIэныр къэухъумэгъэным и Дунэе мафэ фэгъэхьыгъэ Iофтхьабзэхэр щыригъэкIокIыгъэх, ахэмэ студентхэр, кIэлэегъаджэхэр, шъолъырым ипрофильнэ организациемэ ялIыкIохэр ахэлэжьагъэх.

Анахь Iофыгъо шъхьаIэу хъугъэр интерактивнэ квестэу IофшIэным икъэухъумэн епхыгъэм еплъынхэр ары,  дисциплинэу «Проектнэ практикум» зыфиIорэм къыдыхэлъытагъэу ар студентмэ зэхагъэуцуагъ. Мыекъопэ ЛПУМГ ООО «Газпром трансгаз Краснодар» зыфиIорэм икъутам ары Iофтхьабзэр зыщызэхащэгъэ площадкэу хъугъэр. Хэлэжьагъэхэр — предприятием иIофышIэхэр — команднэ шапхъэм илъхэу тематическэ станциехэр кIуагъэх, ахэмэ апэрэ IэпыIэгъур зэрарагъэкIырэр къыщагъэлъэгъуагъ, IофшIэным икъэухъумэнкIэ шIэныгъэу яIэхэр ауплъэкIугъэх, производственнэ хъугъэ-шIагъэхэр зхэхафыгъэх,  промышленнэ щынэгъончъэным ылъапсэхэр агъэпытагъэх. Предприятием иIэшъхьэтетмэ осэшхо Iофтхьабзэм фашIыгъ, ащ ипрактическэ Iахь мэхьанэшхо зэриIэр къыкIагъэтхъыгъ, тапэкIэ зэдэлэжьэнхэ шIоигъоныгъэ яIэ зэрэхъугъэр къыхагъэщыгъ.  

IофшIэным лъыпыдзагъэ факультетым истудентхэр шъолъыр  конференцием хэлэжьагъэх, ар IофшIэнымкIэ ыкIи социальнэ хэхъоныгъэмкIэ Адыгэ Республикэм и Министерствэ зэхищэгъагъ. Iофтхьабзэм къыдыхэлъытагъэу, ащ хэлажьэрэмэ проектхэр къагъэлъэгъуагъэх, ахэр афэгъэхьыгъагъэх щынэгъончъэ зекIуакIэм икультурэ, «Къулыкъу ахьызэ егъэджэгъэнхэр» зыфиIорэ программэм ишIуагъэкIэ зэхагъэуцогъагъэх. Проектмэ ятематикэ къыубытыгъэх машIо, экологическэ ыкIи производственнэ щынэгъончъэнхэр. Джащ фэдэу конференцием тематическэ къэгъэлъэгъонхэр, гъэсэныгъэ площадкэхэр хэтыгъэх, ахэр IофшIэнымрэ псауныгъэмрэ якъэухъумэнкIэ упчIэу къэуцухэрэм яджэуапыгъэх.  

Iофтхьабзэр гъэсэныгъэ интенсивэу «IофшIэным ищынэгъончъэ стратегиер ыкIи псауныгъэм икъэухъумэн» зыфиIорэмкIэ зэфашIыжьыгъ. Хэлажьэхэрэр концепциеу «Нулевой травматизмэр» зэрагъэшIагъ, тематическэ квестым ыкIи онлайн-викторинэм хэлэжьагъэх,  ащ тетэу ухьазырыныгъэ ин къагъэлъэгъуагъ.

Iофтхьабзэу зэхащагъэмэ джыри зэ къаушэтыжьыгъ МКъТУ-м иэкологическэ факультет мэхьанэшхо зэриIэр, щынэгъончъэ IофшIэныр  ащ зэригъэпсырэр, практико-ориентированнэ егъэджэныр зэрэлъигъэкIуатэрэр ыкIи шъолъырым ипрофильнэ организациемэ зэпхыныгъэхэр зэрадигъэпытэхэрэр.