МашIом зыщыухъумэгъэным и Мафэ ехъулIэу Мыекъопэ къэралыгъо технологическэ университетым иэкологическэ факультет щеджэрэмэ гъэсэныгъэ Iофтхьабзэ зэхащагъ, зипсауныгъэ зэщыкъуагъэ сабыймэ экскурсие адырагъэкIокIыгъ.

Командэм ипроектэу ID 458637 «МашIом пэшIуекIорэ пропагандэр ыкIи сабыеу зипсауныгъэ зэщыкъуагъэхэр мэшIо щынэгъончъэным фэгъэсэгъэнхэр» зыфиIорэр кIэлэеджакIохэм апае экскурсие мэшIо-къэгъэнэжьэкIо частэу 2-у Мыекъуапэ дэтым щырагъэкIокIыгъ.

Экскурсием хэлэжьэгъэ кIэлэеджакIомэ мэшIогъэкIосэ къулыкъум иIофшIэн зэрэзэхэщагъэм нэIуасэ зыфашIыгъ ыкIи зэрагъэшIагъ:
⁃ машIом зыщыухьумэгъэнымкIэ каланчи мэхьанэу иIагъэр, ащ итарихъ;

⁃ мэшIогъэкIосэ машинэмэ ямэхьанэ, адрэмэ къазэрэхэщыхэрэр;

⁃ Непэрэ мафэм диштэу техническэу зэрэуIэшыгъэхэр, къэгъэнэжьэкIо операциемэ зэрэхэлажьэхэрэр.

Сабыймэ ашIогъэшIэгъонэу техникэр къаплъахьыщтыгъэ, частым щылажьэрэмэ упчIэхэр аратыщтыгъэ, мэшIогъэкIосэ машинэмэ арытIысхьагъэх, гухахъо икъун хагъотагъ. Машинэмэ заритIысхьагъэхэр анахьэу агу рихьыгъ.

Частым дэт мемориалэу зэрагъэлъэгъугъэр Iофыгъо шъхьаIэу хэтыгъ. КIэлэеджакIохэр Адыгеим имэшIогъэкIосэ лIыхъужъмэ нэIуасэ афэхъугъэх, Хэгъэгу зэошхом 1941-1945-рэ илъэсхэм хэлэжьагъэхэм. А Iофтхьабзэм ишIуагъэкIэ, кIэлэеджакIомэ зэхашIагъ сэнэхьатым имэхьанэ, зэкIэлъыкIуакIэу ащ иIэр, лIыхъужъмэ яшIэжь къэуухъумэнэу зэрэщытыр.

ЗэIукIэм икIэухым сабыймэ видео джэпсалъэ зэхагъэуцуагъ машIом зыщыухъумэгъэным и Мафэ фэгъэхьыгъэу. Ахэр частым илэжьакIомэ афэрэзагъэх, псауныгъэ пытэ яIэнэу афэлъэIуагъэх.

 Экскурсием зэфэхьысыжь дэгъухэр фэхъугъэх:

 ЯшIэныгъэмэ ахагъэхъуагъ —сабыймэ бэ къагурыIуагъэр, бэ зыщыгъозагъэхэр мэшIо щынэгъончъэным фэгъэхьыгъэу, ар практикэм, ежь ашъхьэкIэ щалъэгъугъ.

 Сэнэхьатыр къыхахыным ыкIи сэнэхьатым лъытэныгъэ фягъэшIыгъэныр — мэшIогъэкIосэ къулыкъум нэIуасэ зыфэхъухэм, а IофшIэным лIыхъужъыгъэр зэрепхыгъэр икъоу зэхашIагъ.

 Патриотическэ гъэсэныгъэр — тарихъым зэрэнэсыгъэхэм ишIуагъэкIэ яхэгъэгу цIыкIоу зыщыпсэухэрэм рыгушхуагъэх.

 Социальнэ интеграциер — зипсауныгъэ зэщыкъуагъэ сабыймэ гугъапIэ аратыгъ, яшIэныгъэмэ зарагъэушъомбгъугъ, социализацием фащагъэх.

Проектыр щысэ дэгъу ыкIи нэрылъэгъу хъугъэ программэу «Къулыкъу ахьызэ егъэджэгъэнхэр» зыфиIорэр студентхэмкIэ IэпыIэгъушIоу зэоэщытыр, профессиональнэ шIэныгъэхэр агъэпытэрэ къодыехэп, социальнэ пшъэрылъхэм язэшIохын яIахьышхо халъхьэ. Фэдэ гукъэкIыр инклюзивнэ гъэсэныгъэ ягъэгъотыгъэным фэIорышIэ, гъэсэныгъэри нахь апэблагъэ мэхъу.

 МэшIогъэкIосэ къулыкъум щылажьэрэмэ профессиональнэ мэфэкIымкIэ тафэгушIо! Тхьашъуегъэпсэу шъуилIыхъужъыгъэ, шъуипсэемыблэжьыгъэ, цIыфмэ шъуадеIэнэу шъузэрэхьазыр зэпытым апае!