Мыекъопэ къэралыгъо технологическэ университетым сэнэхьат къыхэхыным фэгъэхьыгъэ Iофтхьабзэр щыкIуагъ, «Магистерскэ программэмэ я Мафэ — 2026-рэ» ащ зэреджагъэхэр, бакалавриатымрэ специалитетымрэ къычIитIупщыхэрэр ащ зэрипхыгъэх.

ШIуфэс псалъэкIэ къэзэрэугъоигъэхэм закъыфигъэзагъ  университетым иректорэу Къуижъ Саидэ. Ащ ипсалъэ къызэрэщыхигъэщыгъэмкIэ, апшъэрэ гъэсэныгъэр лъыгъэкIотэгъэнымкIэ магистратурэм мэхьанэшхо  иI, нахь куоу сэнэхьатыр зэбгъэшIэным, уиIэпэIэсэныгъэ хэбгъэхъоным, профессиональнэ компетенциехэм зябгъэушъомбгъуным, научнэ-ушэтын IофшIэным упылъыным алъэныкъокIэ хэхъоныгъэхэр уегъэшIых. Анахьэу къыкIигъэтхъыгъэр магистратурэм щеджэрэмэ лъэпсэ пытэ зэрашIырэр ары, нэужым академическэ ыкIи профессиональнэ хэхъоныгъэ ашIынымкIэ,  джащ фэдэу ар къыкIэльыкIорэ едзыгъоу мэхъу аспирантурэм еджэныр щыпыбдзэжьынымкIэ ыкIи наукэм, кIэлэегъэджэным афэгъэзагъэу улэжьэщтми.

Iофтхьабзэм хэлэжьагъэх Адыгэ Республикэм щыпсэухэу IофшIэныр къэзытыхэрэр, ахэмэ непэрэ IофшIэн бэдзэрым изытет, къычIатIупщыхэрэр аштэнхэм шапхъэу пылъхэр, упчIэ шъхьаIэхэу ащ епхыгъэхэр къаIотагъэх.

ЗэIукIэгъум къыдыхэлъытагъэу ащ хэлажьэрэмэ игъэкIотыгъэ информацие агъотыгъ магистратурэм учIэхьаныр ыкIи ущеджэныр  зэрэщытыр, пылъ шапхъэр, зэнэкъокъоу зэхащэхэрэр ыкIи грантовэ программэхэм нэIуасэ афэхъугъэх, стипендиальнэ IэпыIэгъу агъотыным пылъ шапхъэхэм ащыгъозагъэх. Факультетмэ ядеканмэ магистерскэ программэ зэфэшъхьафыбэмэ лъэтегъэуцо афашIыгъ, ащ тетэу зыгъэхьазырыным ылъапсэхэмрэ хэхъоныгъэ шIыгъэнымрэ зэрэдэлажьэхэрэр къагъэнэфагъ.

Магистерскэ программэхэм я Мафэ мэхьанэ зиIэ площадкэ ин хъугъэ, ащ апшъэрэ еджапIэр, IофшIэн къязытырэр, еджакIохэр зэрипхыгъэх. КъычIатIупщырэмэ ягъэсэныгъэ зыщылъагъэкIотэщтыр къыхахынымкIэ амалышIу.