Республикэ бизнес-инкубаторым ипащэ ипшъэрылъхэр зыгъэцакIэрэ Хьасанэ Махьмудэ зэрезэгъыгъэхэм елъытыгъэу проектэу «Агроклассхэр» зыфиIорэм хэлажьэрэмэ апае дэкIыгъо экскурсие зэхащэгъагъ, производственнэ шъолъырыр арагъэлъэгъугъ.

Iофтхьабзэм изэхэщэкIуагъэхэр: мэкъу-мэщ технологиехэм яфакультет идеканэу Шъхьэпэцэ Аслъан, мэкъу-мэщ продукцием ипроизводствэ итехнологиехэм якафедрэ ипащэу Мамсыр Нурбый, доцентэу Владимир Косарев.

Экскурсием хэлэжьагъэмэ непэрэ мафэм диштэрэ агротехнологиехэм, псыр лэжьыгъэм зэрэратырэ системэм, шпалернэ конструкциехэм, алэжьырэмэ язэфэмыдэныгъэ нэIуасэ зафашIыгъ. Ины мыхъурэ мыемэ ябиологическэ хэушъхьафыкIыгъэ, чъыг лъапсэр зэрагъэпсырэр нахь лэжьыгъабэ чъыгым къытыным пае, къутамэхэр механизированнэу зэрэпаупкIыхэрэр,  мыехэр зэраугъоижьхэрэр кIалэмэ зэрагъэлъэгъугъэх. Анахьэу анаIэ зытырадзагъэр чIыгулэжьыным епхыгъэ Iофыгъохэр ары, лэжьыгъэр зэрэраутырэм, зэрэлъыплъэхэрэм.

Практикэ-ориентированнэ егъэджэным къыдыхэлъытагъэу  кIэлэеджакIомэ непэрэ уахътэм диштэрэ чэтэхъо фермэм щыIагъэх, ащ чэтыжъые-бройлерхэр къызэрэщагъэхъухэрэм зыщыщагъэгъозагъ. КIэлэеджакIомэ технологическэ процесс шъхьаIэхэр зэрагъэшIагъэх: Iусмэ ягъэхьазырын, къызэрагъэнэфырэ системэр, режимэу остыгъэ/ мэзахэ, ины хъунхэм пае, джащ фэдэу микроклиматым лъыплъэгъэныр чэтыжъыехэр зыдэсхэм, температурам, шынагъэм, аммиакыр зыфэдизыр зэгъэпшэгъэныр. Iусхэр зэраратырэ механизированнэ линиер арагъэлъэгъугъ, орэдэу зэрагъэдэIухэрэр зэхахыгъ, ветеринарнэу къызэраухъумэхэрэр, арапэсхэрэр ашIагъэх.
Ащ фэшъхьафэу, непэрэ уахътэм диштэрэ фэбапIэ комплексыр зэрагъэлъэгъугъ, ар илъэс ренэм зэпымыоу мэлажьэ, технологие пэрытхэр арахьылIэхэзэ маткIо лъэпкъхэр къыщагъэкIых. Аухъумэрэ чIыгум цумпэ лъэпкъхэр зэрэщалэжьыхэрэр кIэлэеджакIомэ ашIогъэшIэгъоныгъ,  культивированиер, субстратхэр къызэрэхахыхэрэр, (кокосовэ цыр, минеральнэ бзыуцыфыр),фертигациер агъэфедэзэ псыр гъоткIо-гъуаткIоу зэрэIэкIагъахьэрэр,    джащ фэдэу микроклиматыр зэрагъэIорышIэрэр, ишынагъэ зэрэлъыплъэхэрэр,  фотосинтезыр къэIэтыгъэным пае арэу зэрэпсэухэрэр ашIагъ.

Экскурсиеу зэхащагъэм агротехнологическэ классмэ ащеджэрэмэ амал къаритыгъ мэкъу-мэщ производствэ шъыпкъэм нэIуасэ ежь ашъхьэкIэ фэхъунхэу. КIэлэеджакIомэ ятеоретическэ шIэныгъэхэу непэрэ мафэм диштэрэ технологиехэм афэгъэхьыгъэу яIэхэр, ахэмэ пхъэшхьэ-мышъхьэмэ якъэгъэкIын процессми, цумпэ лъэпкъмэ зэрапылъхэми, чэтхэр зэрахъухэрэми защагъэгъозагъ.

ЕджапIэр, апшъэрэ еджапIэр ыкIи IофшIэн къязытырэр зэгъусэхэу мыщ фэдэ шапхъэм илъэу зэрэзэдэлажьэхэрэм мэхьанэ иI, кIэлэеджакIом ежь зыфэе сэнэхьатыр къыхихынымкIэ хэдэн ельэкIы, практическэ лъэныкъохэр гъэпсыгъэ мэхъух, агропромышленнэ комплексым щылэжьэщт кадрэхэм ягъэхьазырыни къыщежьэ.