Экономикэмрэ гъэIорышIэнымрэ яфакультет ия 2-рэ курс ис студентхэу лъэныкъоу «Къэралыгъо ыкIи муниципальнэ гъэIорышIэным» феджэхэрэр социальнэ гукъэкIмэ язэхэгъэуцон чанэу фежьагъэх. Егъэджэн дисциплинэу «Общественнэ проектэу «Къулыкъу ахьызэ егъэджэгъэнхэр» зыфиIорэм къыдыхэлъытагъэу Iофыр агъэцакIэ, ахэмэ академическэ егъэджэныр къыдалъытэ, общественнэ пшъэрылъхэр зэшIуахых.

Теоретическэ шIэныгъэ ятыгъэн закъор арэп курсым ипшъэрылъыр, практикэми ахэр щагъэфедэнхэр, социальнэ мэхьанэ зыхэлъ упчIэхэр зэшIуахынхэр къыдалъытэх. 
Дисциплинэр къазэрэдеIэрэр:

— профессиональнэ амалхэр щыIэныгъэм щыгъэфедэгъэнхэр;

— студентмэ ясоциальнэ чаныгъэ къыхэгъэщыгъэныр ыкIи гъэфедэгъэныр;

— рагъаджэрэмэ ятворческэ амалхэр къыхэгъэщыгъэнхэр;

— ныбжьыкIэмэ щыIэныгъэ еплъыкIэ тэрэз ягъэшIыгъэныр;

— общественнэ мэхьанэ зиIэ проектхэм ягъэцэкIэн къыфэщэгъэнхэр.

Ащ фэдэ екIолIакIэм студентмэ амал къареты щыIэныгъэмрэ еджэнымрэ зэрапхынхэу, джащ фэдэу обществэм мэхьанэу ежьхэм щагъотырэр зыфэдэр къагурэIо.

ЯтIонэрэ семестрэм илъэхъан студентхэу Аджырэ Самира, Эмма Галаян, Тао Самира, Алина Кравченко, Шъао Нарт, Самира Аргун, Даниил Тренев, ахэмэ япащэу, конституционнэ гъэпсынымрэ къэралыгъо ыкIи муниципальнэ гъэIорышIэнымрэ якафедрэ ипащэу КIыржьын Светланэ ягъусэу общественнэ гукъэкIибл зэхагъэуцуагъ.
Проект пэпчъ социальнэ гумэкIмэ язэшIохын атегъэпсыхьагъэх:

1. Мобильнэ платформэ чIыпIэм къыщыдагъэкIырэмэ апае, ахэр ащэнхэу шIыгъэныр — производительхэм адеIэгъэныр, товархэу зипIалъэ мычыжьэхэр цIыфмэ анэгъэсыгъэныр.

2. IэкIыб студентхэу МКъТУ-м щеджэхэрэр Урысые Федерацием имэфэкI мафэхэм нэIуасэ афэшIыгъэнхэр —  щыIэныгъэм хэгъэгъозэгъэнхэр, культурэм хэщэгъэнхэр.

3. Адыгабзэр псынкIэу ашIэным пае бзэ курсхэр зэхэщэгъэнхэр — шъолъырым икультурэ кIэн къэухъумэгъэныр.

4. Мыекъуапэ икъэлэ системэ изэтегъэпсыхьан, непэрэ технологиехэр агъэфедэхэзэ нахь дахэу итеплъэ шIыгъэныр.

5. Фэтэрыбэу зэхэт унэмэ ачIэсмэ мобильнэ приложение афэгъэпсыгъэныр — щыпсэухэрэр, гъэIорышIэ компаниехэр, ТСЖ-р зэпхыгъэнхэр, ущыпсэуныр щынэгъончъэу щытыныр.

6. Искусствэр къалэ щыIэныгъэм хэщэгъэныр — художественнэ объектхэр (муралхэр) ащыгъэпсыгъэныр, культурнэ хэхъоныгъэ, социальнэ зэпхыныгъэ къэзытыщт Iофтхьабзэхэр зэхэщэгъэнхэр, ащ тетэу щыIэныгъэр нахьышIу шIыгъэныр.

7. «Движение шъхьафитныгъэр» — ыпкIэ хэмылъэу хэгъозэжьрэмэ техническэ амалхэр ягъэгъотыгъэныр.

Социальнэ проектхэм я III-рэ яапшъэрэ еджэпIэ зэнэкъокъоу «Къулыкъу ахьызэ егъэджэгъэнхэр» зыфиIоу жъоныгъуакIэм и 11-м къыщыублагъэу и 15-м нэс рагъэкIокIыщтым семестрэм ашIагъэхэр щызэфахьысыжьыщтых.
Социальнэ гукъэкIмэ уадэлэжьэныр — ар обществэм хэхъоныгъэ ебгъэшIыным уиIахь хаплъхьэрэ къодыеп, профессиональнэу уеIэты. Студентмэ проектхэр агъэцакIэхэ хъумэ:

— къэралыгъо ыкIи муниципальнэ гъэIорышIэнымкIэ шIэныгъэу агъотырэр практикэм щагъэфедэ;

— проектнэ, команднэ, зэпхыныгъэ IофшIэным хагъахъо;

— социальнэ гукъэкIмэ язэшIохын дэлажьэх, зэфахьысыжьых;

— аудиторие зэфэшъхьафхэмрэ организациехэмрэ адэлажьэх, опыт къагъоты;

— кейсхэр агъэпсы, ашIагъэхэр зэхалъхэх, IофшIэпIэ чIыпIэм къащышъхьэпэщтхэр.

«Къулыкъу ахьызэ егъэджэгъэнхэм ишIуагъэкIэ ядунае зэблахъу, — къыхагъэщы проектым хэлажьэрэмэ. — ТигукъэкIмэ цIыфмэ ящыIэныгъэ зэрэзэблихъурэр тэлъэгъу, ащ нахь тыгу етыгъэу тегъэлажьэ».
ТапэкIэ студентмэ хэхъоныгъэхэр ашIынхэу тафэлъаIо, ягукъэкIмэ IэпыIэгъу агъотынэу, тикъалэрэ обществэмрэ нахьышIу ашIынхэу тащэгугъы.