Сэнэхьат IэпэIэсэныгъэм фытегъэпсыхьэгъэ шъолъыр программэу «Шъолъыр ыкIи муниципальнэ гъэIорышIэныр. Адыгеим и ЛIыхъужъхэр» зыфиIорэм иящэнэрэ модуль игъэцэкIэн Мыекъопэ къэралыгъо технологическэ университетым щылъагъэкIуатэ. Программэм теорием епхыгъэ егъэджэным, дэкIыгъо Iофтхьабзэхэм язэхэщэн, къэралыгъо ыкIи муниципальнэ гъэIорышIэным исистемэ зыфэдэр къагурыIоным афэгъэхьыгъэ лъэныкъохэр къыдыхэлъытагъэх.

Модулым гъэсэныгъэмкIэ иблок шъолъырым хэхъоныгъэ ышIыным илъэныкъо шъхьаIэхэр къызэлъеубытых. Ащ хэлажьэхэрэм чIыпIэ зыгъэIорышIэжьыным изэхэщэн илъэныкъо шъхьаIэхэр, къолъхьэ тын-Iыхыным пэшIуекIогъэнымкIэ узэрэзекIон фэе шапхъэхэр, чIыпIэхэм ягъэIорышIэнкIэ екIолIакIэу щыIэхэр зэрагъэшIагъэх.  Цифрэ трансформацием, лъэныкъоу «шъолъыр Iуш» зыфиIорэм изэхэтыкIэ анахьэу анаIэ атырагъэты.

Программэм ипрактическэ Iахь дэкIыгъо ыкIи профильнэ Iофтхьабзэхэр къыдыхэлъытагъэх. Системнэ ыкIи критическэ гупшысэным фэгъэхьыгъэ егъэджэнхэр, цIыфхэм апашъхьэ укъыщыгущыIэныр лъэныкъо шъхьаIэхэм ащыщых. Iофтхьабзэм хэлажьэхэрэм команднэ IофшIэным имастерскойхэр акIугъэх, ащ ишIуагъэкIэ шIэныгъэу аIэкIэлъхэм ахагъэхъуагъ.

Лъэныкъо шъхьафэу щыт хэбзэ къулыкъухэм ыкIи общественнэ институтхэм зэпхыныгъэ адыряIэныр. Ащ къыдыхэлъытагъэу Адыгэ Республикэм шъолъыр гъэIорышIэнымкIэ и Гупчэ щыIагъэх, ащ зыкъыфэзыгъэзэрэ цIыфхэм ялъэIухэр зэрэзэхафыхэрэм зыщагъэгъозагъ.  Джащ фэдэу  «Единэ Россием» ишъолъыр къутамэ иштаб еблэгъагъэх, мы партием илIыкIоу, хэбзэихъухьэу Наталья Широковам социальнэ мэхьанэ зиIэ Iофыгъохэм япхыгъэу гущыIэгъу фэхъугъэх. Мы мэфэ благъэхэм егъэджэныр лъагъэкIотэщт. Ащ зыщызыушэтыхэрэм чIыпIэхэм хэхъоныгъэ ашIыным фытегъэпсыхьэгъэ экономическэ модульхэм защагъэгъозэщт, къэралыгъо-унэе зэпхыныгъэм иамалхэр зэрагъэшIэщт. Джащ фэдэу Мыекъопэ районым дэкIыгъо зэхэсыгъо щырагъэкIокIынэу агъэнафэ.

Джырэ щыIакIэм диштэрэ гъэIорышIакIохэр гъэхьазырыгъэнхэмкIэ программэу «Адыгеим и ЛIыхъужъхэр» зыфиIоу МКъТУ-м ибазэ епхыгъэу агъэцакIэрэм мэхьанэшхо иI.