Агропромышленнэ комплексым ылъэныкъокIэ зэхащэрэ Урысые зэнэкъокъоу «Аграрий» зыфиIорэм къыдыхэлъытэгъэ студент проектхэм якъэгъэшъыпкъэжьын фэгъэхьыгъэ Iофтхьабзэ Мыекъопэ къэралыгъо технологическэ университетым щыкIуагъ. Зэнэкъокъур Урысые Федерацием просвещениемкIэ и Министерствэ иIофтхьабзэхэм ахагъэхьагъ.

Iофтхьабзэм имодераторыгъ мэкъумэщ продукцием икъыдэгъэкIын технологиемкIэ кафедрэм ипащэу Мамсыр Нурбый.   

Зэнэкъокъур 2019 – 2020-рэ илъэс еджэгъум къыщегъэжьагъэу илъэс къэс МКъТУ-м щырагъэкIокIы. А уахътэм къыкIоцI Урысыем ишъолъыр 18-мэ ащыпсэурэ нэбгырэ 304-рэ ыкIи гурыт сэнэхьат зыщарагъэгъотырэ гъэсэныгъэм иорганизацие 52-рэ ащ хэлэжьагъэх.

Эксперт комиссием хэхьагъэх:  МКъТУ-м егъэджэн IофшIэнымкIэ ыкIи инновационнэ хэхъоныгъэмкIэ ипроректорэу Татьяна Овсянниковар; Адыгэ Республикэм мэкъу-мэщымкIэ иминистрэ иапэрэ гуадзэу  Сергей Шопиныр; Адыгеим гъэсэныгъэмрэ шIэныгъэмрэкIэ иминистрэ игуадзэу Артем Журавель;  апшъэрэ еджапIэм аграрнэ технологиехэмкIэ идеканэу Шъхьапэцэ Аслъан; мэкъумэщ продукцием икъыдэгъэкIын технологиемкIэ кафедрэм ипащэу Мамсыр Нурбый; ландшафт архитектурэмкIэ ыкIи мэз IофымкIэ кафедрэм ипащэу Наталья Трушевар; кафедрэм идоцентэу Владимир Косаревыр.

Мы илъэсым зэнэкъокъум хэлажьэ ашIоигъэу нэбгырэ 72-мэ лъэIу тхылъхэр къатыгъэх, ахэр Урысыем ишъолъыри 9-мэ ялIыкIох: Адыгэ Республикэм, Республикэу Бурятием, Республикэу Темыр Осетиер-Аланием, Краснодарскэ и Красноярскэ крайхэр,  Ростовскэ, Белгородскэ, Саратовскэ ыкIи  Московскэ хэкухэр.

IофшIэнхэр мыщ фэдэ лъэныкъохэмкIэ къагъэлъэгъуагъэх:

— зоотехниер ыкIи ветеринариер;

— агрономиер ыкIи агроинженериер;

— АПК-м хэхъоныгъэ ышIынымкIэ инновационнэ лъэныкъохэр;

— мэкъумэщ продукцием икъыдэгъэкIыжьын;

— аграрнэ секторым иэкологическэ щынэгъончъагъ.

КIэух едзыгъом эксперт советым хэтхэр къэралыгъом ишъолъыри 9-мэ ялIыкIохэм ядоклад  42-мэ ядэIугъэх.  Ахэр лъэныкъо зэфэшъхьафхэм афытегъэпсыхьагъэу щытыгъэх.