Сэкъатныгъэ зиIэхэм ыкIи зипсауныгъэ зэщыкъуагъэхэм ясэнэхьат IэпэIэсэныгъэ хагъэхъоным фытегъэпсыхьэгъэ я X-рэ шъолъыр чемпионатэу «Абилимпикс – 2026» зыфиIорэр Адыгэ Республикэм щырагъэжьагъ .

Iофтхьабзэм хэлажьэхэрэм шIуфэс гущыIэхэмкIэ закъыфагъэзагъ проектым ипащэхэмрэ изэхэщакIохэмрэ, гъэсэныгъэм иорганизациехэм ыкIи эксперт сообществэм ялIыкIохэр. Ахэм къызэрэхагъэщыгъэмкIэ, гъэсэныгъэм ылъэныкъокIэ ныбжьыкIэхэм зыкъызэIуахынымкIэ ыкIи амалэу аIэкIэлъхэм ахэгъэхъогъэнымкIэ движениеу «Абилимпиксым» мэхьанэшхо иI.

Мы илъэсым  чемпионатыр лъэныкъуитфыкIэ рагъэкIокIы:

— Предпринимательствэр;

— Веб-дизайныр;

— Флористикэр;

— Цифрэ къэбарымкIэ мастерыр;

— ДакIор.

Компетенцием непэрэ цифрэ шIыкIэхэр ыкIи  бизнес лъэныкъохэр къыдыхэлъытагъэх. Ащ ишIуагъэкIэ ащ хэлажьэхэрэм къэбарлъыгъэIэс технологиехэмкIэ, креативнэ индустриемкIэ, сервисымкIэ шIэныгъэу аIэкIэлъхэр къагъэлъэгъон, заушэтын алъэкIыщт. Зэнэкъокъум фытегъэпсыхьэгъэ площадкэхэр Мыекъопэ къэралыгъо технологическэ университетым, МКъТУ-м и Политехническэ колледж, джащ фэдэу республикэм ипрофильнэ гъэсэныгъэ организациехэм къащызэIуахыгъэх.

Чемпионатым хэлажьэх МКъТУ-м ыкIи Политехническэ колледжым ястудентхэр, шъолъырым икIэлэеджакIохэр. Ахэм зэкIэми пэшIорыгъэшъ ухьазырыныгъэр акIугъ ыкIи Iофтхьабзэр окIофэ IэпэIэсэныгъэ зыIэкIэлъ гъэсакIохэм Iоф къадашIэщт. Чемпионатым изэфэхьысыжьхэмкIэ текIоныгъэр ыкIи хагъэунэфыкIырэ чIыпIэхэр къыдэзыхыгъэхэм ахъщэ шIухьафтынхэр афагъэшъошэщт:

· А 1-рэ чIыпIэм —  сомэ 6000;

· Я  2-рэ чIыпIэм — сомэ 5000;

· Я 3-рэ чIыпIэм  —  сомэ 4000;

· хэлэжьагъэхэм  —  сомэ 3000 .

Iофтхьабзэм хэлажьэхэрэм гъэхъэгъэшIухэр ашIынхэу афэтэIо.

Шъугу къэдгъэкIыжьын, чемпионатэу «Абилимпиксыр» илъэс къэс Мыекъопэ къэралыгъо технологическэ университетым щызэхащэ ыкIи сэнэхьат IэпэIэсэныгъэм хэгъэхъогъэнымкIэ мэхьанэшхо зиIэ лъэныкъоу щыт.  Федеральнэ проектэу «Профессионалитет», лъэпкъ проектэу «НыбжьыкIэхэр ыкIи кIэлэцIыкIухэр», президент платформэу «Урысыер — амалышIухэр зыIэкIэлъ къэралыгъу» зыфиIохэрэм ягъэцэкIэн  ар къыдыхэлъытагъ.