Гъэсэныгъэ программэу «Школа фермера. Современные технологии организации и ведения эффективного фермерского хозяйства» зыфиIорэм икъызэIухын фэгъэхьыгъэ мэфэкI Iофтхьабзэ Мыекъопэ къэралыгъо технологическэ университетым щыкIуагъ.

АР-м мэкъу-мэщымкIэ и Министерствэ, Iахьзэхэлъ обществэу «Россельхозбанкым» ыкIи МКъТУ-м зэдашIыгъэ зэзэгъыныгъэм къыдыхэлъытагъэу программэр 2021-рэ илъэсым къыщегъэжьагъэу агъэцакIэ. А уахътэм къыкIоцI езгъэжьэгъэкIэ ыкIи Iоф зышIэрэ фермери 196-мэ егъэджэнхэр акIугъэх, агробизнесым хэхъоныгъэ ышIыным иекIолIакIэхэр зэрагъэшIагъэх. 

Президиумым илIыкIохэу «Россельхозбанкым» и Краснодар шъолъыр къутамэ ипащэу Евгений Ковалевым,  МКъТу-м научнэ IофшIэнымкIэ ыкIи инновационнэ хэхъоныгъэмкIэ ипроректорэу Татьяна Овсянниковам,  АНО-у «АР-м ипредпринимательствэ IэпыIэгъу фэхъугъэнымкIэ Гупчэм» ипащэу Дзэхъохъу Адам, АР-м мэкъу-мэщымкIэ иминистрэ игуадзэу Шъэожъ Абрек, шъолъыр фондэу «Хэгъэгум иухъумакIохэр» зыфиIорэм ипащэ иапэрэ гуадзэу НэмытIэкъо Юныс, МКъТУ-м аграрнэ технологиехэмкIэ идеканэу Шъхьэпэцэ Аслъан къэзэрэугъоигъэхэм шIуфэс гущыIэхэмкIэ закъыфагъэзагъ.

Iофтхьабзэм къырагъэблэгъэгъэ хьакIэхэри хэлэжьагъэх  — банковскэ секторым, фондэу «Хэгъэгум иухъумакIохэр» зыфиIорэм,  аграрнэ ыкIи  коммуникационнэ къулыкъухэм ялIыкIохэр. Модераторэу ыкIи программэм ипащэу щытыгъ кафедрэм ипащэу, мэкъумэщ шIэныгъэхэмкIэ докторэу Мамсыр Нурбый.

«Фермерым иеджапIэ» зыфытегъэпсыхьагъэр республикэм иагропромышленнэ хъызмэт пае специалистхэр гъэхьазырыгъэнхэр ары. АщкIэ шъолъырым амалышIухэр IэкIэлъ.. 

Программэр академическэ сыхьат 250-м телъытагъ. Ащ щыщэу:

· сыхьати 150-р — экономикэ-правовой блокым телъытагъ (бизнес-планированиер, маркетингыр, къэралыгъо IэпыIэгъур, кооперациер, продукцием исертификацие, нэмыкIхэри.)

· сыхьати 100-р — профильнэ специализациер (пхъэшъхьэ-мышъхьэхэм, цумпэ лъэпкъ зэфэшъхьафхэм якъэгъэкIын,  щэ продукциер ыкIи лы къэзытырэ былымхэм яхъун, ветеринариер, нэмыкIхэри.)

Программэм хэлажьэхэрэм шъолъырым инаучнэ ыкIи ипроизодственнэ площадкэхэм, предприятие пэрытхэм защагъэхьазыры.

МКъТУ-м непэрэ шапхъэхэм адиштэрэ лабораторие иI, ащ ишIуагъэкIэ егъэджэным къыхегъэлажьэх эксперт-практикхэр ыкIи агробизнесым шIуагъэ къытэу Iоф щызышIэхэрэр.  Мы аужырэ илъэсхэм гъэсэныгъэ программэм къыдыхэлъытагъэу хэушъхьафыкIыгъэ дзэ операцием хэлажьэхэрэр ыкIи ахэм яунагъохэм арысхэр рагъаджэх,  ахэм япчъагъэ процент 25-м нахь макIэп.

«Фермерым иеджапIэ» шIуагъэ къэзытырэ площадкэу щыт, Адыгэ Республикэм иагропромышленнэ комплекс хэхъоныгъэ ышIынымкIэ амалышIу.