Мыгъэ Урысые обществэу «ШIэныгъэр» загъэкIэжьыгъэр илъэси 5 зэрэхъугъэр хагъэунэфыкIы. Ащ изэфэхьысыжьхэм Обществэу «ШIэныгъэм» ия V-рэ Зэфэс щатегущыIагъэх.

Зэфэсым Урысыем илIыкIохэу ыкIи ихьакIэхэу нэбгырэ 400 фэдиз щызэхэхьагъэх — къэралыгъо хабзэм иорганхэм, научнэ ыкIи гъэсэныгъэ сообществэм, къэралыгъо корпорациехэм ялIыкIохэр, джащ фэдэу лекторхэмрэ организацием игъусэгъухэмрэ. Адыгеир федеральнэ площадкэм къыщызгъэлъэгъуагъэхэр Мыекъопэ къэралыгъо технологическэ университетым иректорэу, «ШIэныгъэм» и Адыгэ шъолъыр къутамэ итхьаматэу Къуижъ Саидэрэ политическэ шIэныгъэхэмкIэ докторэу, Адыгэ къэралыгъо университетым ипрофессорэу Жадэ Зуриетрэ.

Урысые Федерацием и Президентэу Владимир Путиным ыцIэкIэ зэфэсым хэлажьэрэмэ шIуфэс къарахыгъ УФ-м и Президент и Администрацие ипащэ иапэрэ гаудзэу Сергей Кириенкэмрэ УФ-м и Къэралыгъо Думэ идепутатэу Сергей Кабышевымрэ. ХьакIэу къырагъэблэгъагъэмэ ахэтыгъэх — хабзэм ифедеральнэ органхэм ялIыкIохэр, ахэмэ ахэтыгъ гъэсэныгъэмкIэ Абхъаз Республикэм иминистрэу Хана Гунба ыкIи УФ-м наукэмрэ апшъэрэ гъэсэныгъэмрэкIэ иминистрэ игуадзэу Ольга Петровар. Модераторэу зэхэгущыIэгъум яIагъэр конституционнэ хэбзэгъэуцугъэнымкIэ ыкIи къэралыгъо гъэпсынымкIэ УФ-м ФедерациемкIэ и Совет и Комитет итхьаматэ иапэрэ гуадзэу Любовь Глебовар.

IофшIэгъу программэм къыдыхэлъытагъэу Обществэу «ШIэныгъэм» игенеральнэ пащэу Максим Древаль илъэситфым къыкIоцI шIагъэу щыIэхэм зэфэхьысыжь къафишIыгъ, тапэкIэ зыдэлэжьэщтхэ лъэныкъохэр къыгъэнэфагъэх. Зэфэсым хэлажьэхэрэр Урысыем игъэсэныгъэ лъэныкъо хэхъоныгъэу рагъэшIыщтым игъэкIотыгъэу тегущыIагъэх, урысыбзэм илъыгъэкIотэнкIэ ашIэщтхэм, дунэе зэдэлэжьэныгъэм изегъэушъомбгъун, джащ фэдэу зыкIыныгъэм и Илъэс епхыгъэ пшъэрылъхэр агъэнэфагъэх. Шъхьафэу анаIэ тырадзагъ университетхэм хэхъоныгъэу ашIыщтхэм, ахэр научнэ гъэсэныгъэ гупчэу зэрэщытыщтхэм. Зэфэсым къыдыхэлъытагъэу организацием иIэшъхьэтетыщтхэм яхэдзынхэр рагъэкIокIыгъэх: ЛъыплъэкIо советым итхьаматэу Сергей Кириенкэр хадзыжьыгъ, Координационнэ советым итхьаматэу Любовь Глебовар хадзыгъ, Обществэу «ШIэныгъэм» игенеральнэ пащэу икIэрыкIэу Максим Древаль агъэнэфэжьыгъ. Ащ фэшъхьафэу гъэкIэжьыгъэ редакциеу Уставым фашIыгъэр аштагъ, Обществэу «ШIэныгъэм» изэлъашIэрэ просветительхэр ыкIи игъусэгъухэр зыщагъашIохэрэ зэхахьэри рагъэкIокIыгъ.

Шъугу къэдгъэкIыжьын, 2021-рэ илъэсым Урысыем и Президент унашъо ышIыгъагъ организациер агъэкIэжьынэу, гъэсэныгъэ IофшIэным хэгъэгум екIолIакIэ къыфагъотынэу. Илъэситфым къыкIоцI Обществэу «ШIэныгъэр» анахь мэхьанэ зиIэ гъэсэныгъэ площадкэу наукэм хэхъоныгъэ езыгъэшIэу, гражданскэ гукъэкIхэр лъызгъэкIуатэу хъугъэ ыкIи экспертхэр, лекторхэр аудиторие инхэр Урысыем щызэрипхыгъэх.

Адыгэ Республикэм аужырэ илъэсым Iофтхьабзэ 1000-м ехъу щызэхащагъ, ахэмэ нэбгырэ мин 19-м ехъу ахэлэжьагъ — кIэлэеджакIохэм къащегъэжьагъэу нахьыжъхэм анэсыжьэу. 2025-рэ илъэсым изэфэхьысыжьхэмкIэ, Урысые Федерацием ишъолъыр 89-мэ арыт къутамэхэр пштэмэ, тишъолъыр я 25-рэ чIыпIэр еубыты.

Тиреспубликэ проектхэу «ШIэныгъэр.Лекториехэр» ыкIи «ШIэныгъэр.Къэралыгъор» щагъэцакIэ, гъэсэныгъэ зэIукIэхэр кIэлэеджакIохэм, къэралыгъо къулыкъушIэхэм, ны-тыхэм, хэушъхьафыкIыгъэ дзэ операцием иветеранхэм, ахэм яунагъохэм адызэхащэх. ЗэлъашIэрэ шIэныгъэлэжьхэр, профессорскэ-кIэлэегъэджэ сообществэр, къэралыгъо ыкIи общественнэ IофышIэхэр лекторхэу тиреспубликэ щэлажьэх. Обществэу «ШIэныгъэр» яIэпыIэгъоу Адыгеим зэлъашIэрэ спикермэ зэIукIэгъухэр адызахащагъэх, ахэмэ ащыщыгъэх телевизионнэ зещакIоу, практикэ психологэу ыкIи тхакIоу Сергей Тугушевыр, тренер-экспертэу Мастерскоеу «Сенежым» игъэIорышIакIоу Олег Лебедевыр.

Гъэсэныгъэ организацием изэнэкъокъухэм Адыгеим щыпсэухэрэр чанэу ахэлажьэх. Ны-тыхэм ясообществэ игукъэкI елъытыгъэу ыкIи Зэнэкъокъоу ахэмэ зэхащагъэм изэфэхьысыжьхэмкIэ шъолъырым икомитетхэм грантовэ IэпыIэгъоу сомэ миллион 1,9-рэ къыращэлIагъ. Проектым республикэм икIэлэеджакIомэ языплIанэ хэлэжьагъ. ТекIоныгъэ къыдэзыхыгъэхэр: Мыекъуапэ дэт эколого-биологическэ лицееу №35-р, ипроектэу «ЛIэужхэм язэпхыныгъ» зыфиIорэр, Мыекъопэ районым и Гъэсэныгъэ гупчэу №2-р, ипроектэу «Тызэгъусэу еджапIэм» ыкIи Урысыем и ЛIыхъужъэу В.И. Заволянскэм ыцIэ зыхьырэ еджапIэу №28-у пос. Яблоновскэм дэтыр, иеджэпIэ музееу «Тызэкъотмэ—тылъэш» зыфиIорэр.

2025-рэ илъэсым зэфэхьысыжьэу фэхъугъэмкIэ Адыгеим ипросветитель анахь дэгъоу къыхагъэщыгъ Республиканскэ естественнэ-хьисап еджапIэм икIэлэеджакIоу Владислав Кречетниковыр, анахь гъэсэныгъэ проект дэгъукIэ къыхахыгъэр Адыгэ къэралыгъо университетыр ары. Обществэу «ШIэныгъэм» илекторитIоу Адыгеим щыщхэр анахь дэгъухэу хэгъэгумкIэ хахыгъэхэм ахэфагъэх. «ШIэныгъэр.Лекторыр» зыфиIорэ Урысые зэнэкъокъум иятфэнэрэ лъэхъан щытекIуагъ Мыекъуапэ ыкIи Адыгэ епархием ныбжьыкIэ IофхэмкIэ иотдел ипащэу, Мыекъуапэ и Шыихъ-Никольскэ чылысым иклирикэу, диаконэу Адам Шухарт.