МКъТУ-м Студенческэ научнэ обществэм семинарэу «ЧIэнагъэ зимыIэ щыIэныгъ» зыфиIорэр щыкIуагъ, ар фэгъэхьыгъагъ цIыфым пшъэрылъыр зэригъэнафэрэм ыкIи зэрэлъыкIорэм.

МКъТУ-м и СНО ипащэу Ирина Селивановам Iофтхьабзэр къызэIуихыгъ. Ащ къыIотагъ Студенческэ научнэ обществэм Iофэу ышIэрэр, нахь Iофыгъо шъхьаIэу зыуж итыр ыкIи тапэкIэ ашIэнэу агъэнафэхэрэр, джащ фэдэу студентхэр университетым инаучнэ ыкIи проектнэ щыIакIэ къахэлэжьэнхэу къыригъэблэгъагъэх.

Семинарым ипчэгу къыралъхьагъэр Iоф къызэрыкIу, ау мэхьанэ зиIэу щыт: сыда а зы амал зиIэ цIыфхэр пштэхэмэ, зымэ гъэхъагъэхэр ашIынхэ алъэкIырэ, адрэхэм зи къызкIадэмыхъурэр, илъэс пчъагъэхэм ячIыпIэ икощыкIышъухэрэп. Семинарым хэлэжьагъэмэ къыхагъэщыгъэх зэфэшъхьаф шэнхэу пэрыохъу ащ фэдэхэм афэхъухэрэр: щтэныгъэр, пшъэрылъыбэ зэдагъэцэкIэнэу зэрэфежьэхэрэр, а зы гухэлъым зытырагъэпсыхьан зэрамылъэкIырэр.

Iофтхьабзэр Эмин Ягубовым зэрищагъ — техническэ шIэныгъэхэмкIэ докторым, «Флагманы образования» зыфиIорэ зэнэкъокъум текIоныгъэ къыщыдэзыхыгъэм, «Урысыем ипэрытхэм» яфиналистым, обществэу «ШIэныгъэм» илекторым, шахматхэмкIэ ФИДЕ-м имастерым, хэутыгъэ 200-м ехъу зиIэм. Эмин научнэ екIолIакIэмрэ щыIэныгъэ опытымрэ зэрипхыгъэх, ащ къыхэкIэу, анахь гурыIогъуаеу къащыхъущтыгъэхэри къагурыIожьыгъэх. Зэбгырытэкъугъэ гукъэкIхэм ачIыпIэкIэ пшъэрылъым екIолIакIэу фэпшIын фаехэр къыIотагъэх, щыIэныгъэм къыхэхыгъэ щысэхэр къыхьыгъэх.

Анахьэу ынаIэ зытыридзагъэр укъэзыуцухьэхэрэм Iофэу ебгъэжьагъэм еплъыкIэу къыфашIырэм имэхьан ары, ахэр гъэхъагъэхэр пшIынхэмкIэ е зы чIыпIэм уимыкIышъунымкIэ яшIуагъэ е яягъэ къызкIакIорэр зэхафыгъ. Семинарым гушхуагъэ бэмэ къахилъхьагъ, уипшъэрылъ фэшъхьаф екIолIакIэ фэпшIыным, уахътэм игъэфедэнрэ уиамалхэмрэ зэбгъэзэфэнхэм уафещэ.

ЗэкIэ шIоигъоныгъэ зиIэхэр къетэгъэблагъэх МКъТУ-м и СНО, ащ шъукъыхахьэх — тызэгъусэхэу хэхъоныгъэхэр тшIыщтых, проектмэ тахэлэжьэщт, тылъыкIотэнымкIэ амалыкIэхэр къэдгъотыщтых.