Бжыхьэм, 2025-рэ илъэсым МКъТУ-м и Студенческэ научнэ обществэ ыгу къэкIыгъэр нэужым мэхьанэ зиIэ проект дахэ хъугъэ. Арина Астаховар, Ольга Ризюк ыкIи Дарья Казаковар СНО-м ипащэу Ирина Селивановар яIэпыIэгъоу университетым тырахыгъэ сурэтхэр зытет открыткэхэу «Ти МКъТУ» зыфиIохэрэр агъэхьазырыгъэх.

Мы открыткэмэ арыолъагъох гущыIэ къодыекIэ къэмыIошъущтхэр, — кампусмэ яархитектурэ, яшIыкIэ. Апшъэрэ еджапIэм и Пресс-къулыкъу сурэтэу тырихыгъэхэр ащ ылъапсэх, игъусэх QR-кодхэу сайтымрэ университетым инэкIубгъоу «ВКонтакте» щыриIэм изыщэхэрэр. Ащ ишIуагъэкIэ ыкIи открыткэмэ къызэратырэм елъытыгъэу МКъТУ-м ищыIэкIэ-псэукIэ нахь благъэу нэIуасэ уфэхъушъу.

Проектыр полиграфие къодыекIэ къэуцугъэп, ащ нахь куоу хэхьагъ. Ащ студентхэр зэрипхыгъэх, амал къаритыгъ командэ IофшIэным хэлэжьэнхэу, зэхэтхэу зэдэпсэунхэу, университетым хэхъоныгъэ егъэшIыгъэным иIахьи халъхьагъ. Мыщ фэдэ гукъэкIмэ лIэужхэр зэпэблагъэ ашIы, апшъэрэ еджапIэр нахь псаоу, нахь къэшIэжьыгъошIоу нэплъэгъум къеуцо.

МКъТУ-м и Пресс-къулыкъу ипащэу Аминат Абубакаровам къыхигъэщыгъ: «Мы проектым тигуапэу тэри тыхэлэжьагъ, сыда пIомэ тэ тиIофшIэн мэхьанэ щыриI дэхагъэр плъэгъуныр, ар цIыфхэм ямызакъоу, архитектурэми, фэшъхьаф пкъыгъоми яплъэгъулIэныр. Анахьэу уасэ зиIэр мы гукъэкIыр студентмэ зэряер ары — кIэлакIэмэ университетым итарихъ ашIогъэшIэгъон хъугъэ, IофшIэныр рахъухьагъ ыкIи IэпыIэгъу тафэхъунэу зыкъытфагъэзагъ. Тэ ащ фэдэ гукъэкIхэм тагъэгушIо ыкIи ахэмэ ягъэцэкIэнкIэ тиIэпыIэгъу хьазыр зэпыт».

Открыткэхэр бэмэ агу рихьыгъэх ыкIи ахэмэ яшIын хабзэ дахэ зэрэхъущтым щэч хэлъэп, ахэмэ гукъыдэчъыбэ командэмэ къафихьыщт, гукъэкIхэр ыкIи проектыкIэхэр къакIэлъыкIощтых.

Мы гукъэкIыр угу рихьыгъэмэ е уинабор бгъотынэу уфаемэ СНО-м зэхищэрэ зэIукIэхэм уахэлэжьэнэу укъетэгъэблагъэ — ахэр бэрэскэжъые къэс сыхьатыр 15:00 «Точка кипением» щэкIох. Ащ ягуапэу зэкIэ къэбархэр къыщышъуфаIотэщтых.

Проектым игъэцэкIэн хэлэжьагъэхэр ыкIи къыдэIэпыIагъэхэр МКъТУ-м иструктурнэ подразделениехэр ары, ахэр: МКъТУ-м и Студенческэ научнэ обществэр, апшъэрэ еджапIэм и Пресс-къулыкъу, мылъкумкIэ ГъэIорышIапIэр, цифрэмкIэ ГъэIорышIапIэр.