Адыгэ Республикэм урысые акциеу «ШIуагъэ къэзытырэ джэгукIэмэ ямарафон» щызэфашIыжьыгъ, ащ иоператорыгъэр МКъТУ-м и «Точка кипения». Мы илъэсым проектыр космосым ыкIи космическэ технологиехэм афэгъэхьыгъагъ. Марафоныр цIыфыр космосым апэрэу зихьагъэм тефэу къызэIуахыгъагъ ыкIи космонавтикэм и Мафэ зэфашIыжьыгъ.

Марафоным хэлэжьагъэмэ   космонавтикэм ылъапсэмэ нэIуасэ зэфашIыгъ, космосыр зэгъэшIэгъэным иедзыгъо шъхьаIэхэм ыкIи непэрэ мафэм диштэрэ технологиехэм защагъэгъозагъ. Егъэджэнхэр шэпхъэ зэфэшъхьафхэмкIэ рагъэкIокIыгъэх, ащ хэтыгъэх: лекциехэр, гъэсэныгъэ джэгукIэхэр, квестхэр, симуляторхэр, джащ фэдэу ТехноГТО-м инормативхэм ягъэцэкIэн къыдыхэлъытэгъагъ.

МКъТУ-м и базэ программэр джэгукIэ шапхъэм илъэу щагъэцэкIагъ, джащ фэдэу ащ тематическэ десэхэр ыкIи практикумхэр къыщатыгъэх. Университетым истудентхэр джэгукIэу «Азимов +» зыфиIорэм хэлэжьагъэх, научнэ фантастикэкIэ тхыгъэ произведениехэу классикэм хахьэхэрэм ягукъэкIхэр ахэмэ лъапсэу яIагъэх. Зэдэгупшысэгъухэм я Клубэу МКъТУ-м щылажьэрэм ипащэу Людмила Красновар ары десэхэр языгъахьыгъэхэр, дунэе фантастикэм ылъэныкъокIэ технологиехэм хэхъоныгъэхэр зэрашIыхэрэр зэхашIэнэу студентмэ ар къяджагъ.

Студенческэ научнэ обществэм хэтхэр шIуагъэ къэзытырэ квизэу «Космосыр щыIакIэ зыщагъотырэ чIыпI» зыфиIорэм хэлэжьагъэх, ар МКъТУ-м и СНО-м ипащэу Ирина Селивановам зэрищагъ. ДжэгукIэ шапхъэм илъэу ахэмэ космосым епхыгъэ Iофыгъохэм ахэплъагъэх, Чыгум ыкIыбкIэ цIыфым щыIакIэ щигъотын ылъэкIыным фытегъэпсыхьэгъэ сценариехэр зэхафыгъэх.

Адыгеим икIэлэеджакIомэ апае десэу «Программированием Бым нэIуасэ ущыфэхъуныр» зыфиIорэр зэхащагъ, ащ изещэкIуагъэр Цундышк Вячеслав. КIэлэеджакIомэ программированиер зыфэдэр ашIагъ, дронхэр зэрэбгъэIорышIэщтхэр зэрагъэлъэгъугъ, ар джэгукIэ шапхъэу «Бым» къыдилъытэщтыгъэ. Ащ фэдэ шIыкIэм амал къаритыгъ апэрэ лъэубэкъухэр IT-м щашIынэу, ар ашIогъэшIэгъоны хъугъэ.

МКъТУ-м хэхьэрэ Дзэ егъэджэн гупчэм икурсантхэр ТехноГТО-м исистемэ нэIуасэ зыфашIыгъ, Дышъэ тамыгъэ къызэрэдэпхышъущтыр зэрагъэшIагъ. Лъэтегъэуцор ТК-м ипрограммнэ пащэу Светлана Новиковам зэрищагъ. Ащ ыуж онлайн-шапхъэм илъэу нормативхэр курсантмэ атыгъэх. ХэушъхьафыкIыгъэу анаIэ атырагъэтыгъ «Апэрэхэм я Движение» хахьэхэрэм, ахэмэ десэу «Технологиехэр ыкIи компьютернэ джэгукIэхэр» зыфиIорэр зэрагъэлъэгъугъ, ар зэрищагъ Иныхъу Джанетэ.

Марафоныр макIофэ МКъТУ-м и «Точка кипение» гъэсэныгъэм, технологиехэм ыкIи джэгукIэ шапхъэхэм площадкэ афэхъугъ. Ныбжь зэфэшъхьаф зиIэхэу Iофтхьабзэм хэлэжьагъэхэмэ ярольхэр зэтекIыщтыгъэх, зыхэмэ космосыр аушэтыщтыгъэ, адрэмэ инженер сэнэхьатхэр аIэ къырагъахьэщтыгъэ.

Урысые акцием изэхэщакIоу зыкъэзгъэлъэгъуагъэр НТИ-м икружковэ движение и Ассоциаций ары, илъэс пчъагъэхэм къакIоцI ар МКъТУ-м къыдэлажьэ, гъэсэныгъэ ыкIи технологие гукъэкIхэр къыдырегъаштэх.

Проектым зэфэхьысыжьэу фэхъугъэр: МКъТУ-м и ТК командэ урысые площадкэ статусыр къыфагъэшъошагъ, джащ фэдэу шIуагъэ къэзытырэ джэгукIэмэ я Фестиваль къырагъэблэгъагъэх. Ащ марафоным изэфэхьысыжьхэр къыщатыщтых ыкIи джэгукIэ гъэсэныгъэ практикэхэм тапэкIэ хэхъоныгъэу щарагъэшIыщтхэр щырахъухьащтых.