Мыекъопэ къэралыгъо технологическэ университетым хэхьэрэ Политехническэ колледжым технологие инхэм я Чемпионат ишъолъыр едзыгъо щырагъэжьагъ.

Чемпионатым хэлэжьэщтхэр къызэрэхахыхэрэр, Iофыгъо шъхьаIэу пылъыр — ахэр высокотехнологичнэ отраслэхэм зэрадиштэхэрэр ары. Мы илъэсым анахьэу анаIэ транспортнэ сферэм тырагъэтыгъ — шъолъырым ыкIи хэгъэгум яэкономикэ хэхъоныгъэхэр егъэшIыгъэнхэмкIэ нахь  стратегическэ мэхьанэ зиIэм.  

Зэнэкъокъухэм лъэныкъоу «Специалист по контролю качества транспортных логистических процессов» зыфиIорэм колледжым истуденти 5 хэлэжьагъэх, ахэмэ дэгъу дэдэу пэшIорыгъэшъ едзыгъор акIугъ: Михаил Алешиныр, София Киселевар, Александр Погосовыр, ЛIэхъусэжъ Джанета ыкIи Ангелина Чатоевар. Ахэр зэкIэ сэнэхьатэу «Транспортыр гъэIорышIэгъэныр ыкIи зещэнхэм язэхэщэн» зыфиIорэм феджэх, гъэсэныгъэм епхыгъэ Iофхэм чанэу ахэлажьэх. 

Зэнэкъокъу десэмэ профессиональнэ ухьазырыныгъэм илъэныкъо шъхьаIэхэр хеубытэх: занкIэу зещэн процессыр зэхэщэгъэныр, IэкIоцI производственнэ логистикэр гъэкIэжьыгъэныр ыкIи къащэхэрэр гъэIорышIэгъэнхэр, транспортнэ-логистическэ IофшIэныр зэхэщэгъэныр, сервиснэ гъэцэкIэнхэр  транспортым ешIылIэгъэнхэр, джащ фэдэу  логистическэ процессмэ документхэр апылъхьэгъэнхэр.

Чемпионатым иэксперт шъхьаIэу Мудранэ Бэллэ къызэриIуагъэмкIэ, Урысые чемпионатнэ движениеу «Профессионалхэр» зыфиIорэр зыфытегъэпсыхьагъэр сэнаущыгъэ зыхэлъ ныбжьыкIэхэм IэпыIэгъу ятыгъэныр, кадрэхэр къыхэгъэщыгъэнхэр ыкIи хэгъэгум итехнологическэ суверенитет гъэпытэгъэныр арых. Ащ иструктурэ хахьэх  чемпионатэу «Профессионалхэр», джащ фэдэу  технологие инхэм я Чемпионати. Колледжым ипрофессиональнэ модульхэм якIэлэегъаджэхэмрэ яэкспертхэмрэ зэнэкъокъу десэмэ уасэ афашIы, ахэмэ ахэхьэх: Шышъхьэ Светланэ, ГъукIэлI Эльдарэ, Елена Ефремовар, Оксана Ивановар ыкIи Анастасия Краль. Зэнэкъокъухэр мэлылъфэгъум и 15-м  нэс кIощтых. Тикъэбармэ  шъуакъылъыплъ!