Мыекъопэ къэралыгъо технологическэ университетым сэнэхьат къыхэхыным фэгъэхьыгъэ IофшIэныр дунаим щылъегъэкIуатэ, Азие Гупчэм ихэгъэгухэм алъэIэсы.

ЯтIонэрэ IофшIэгъу дэкIыгъом къыдыхэлъытагъэу,  гъэсэныгъэ къэгъэлъэгъонэу  Кыргызстан щыкIуагъэу зыхэлэжьагъэхэм ыуж, апшъэрэ еджапIэр я III-рэ Дунэе «Евразийскэ гъэсэныгъэм икъэгъэлъэгъонэу»  Казахстан щыкIорэм Iоф щешIэ.

МКъТУ-р къэгъэлъэгъоным иплощадкэ къыщызгъэлъагъорэр дунэе гъэсэныгъэм ифакультет идеканэу Елена Базалинар ары. Iофтхьабзэ зэкIэлъыкIомэ ауж университетым гъэсэныгъэ программэхэм лъэтегъэуцохэр афешIых, Урысыем ущеджэным шIуагъэу къытыхэрэр къафаIуатэ, абитуриентмэ занкIэ зэдэгущыIэгъухэр адызэхащэх.  

Къэгъэлъэгъоныр зэхащагъ  Россотрудничествэр ыкIи Урысыем и   Минобрнаукэ яIэпыIэгъоу,  проектэу «Гъэсэныгъэм иэкспорт» зыфиIорэм къыдыхэлъытагъэу, Казахстан икъэлэ заулэ къызэдыхеубытэх: Усть-Каменногорскэ, Семей, Павлодар, Экибастуз ыкIи Караганду. Ащ фэдэ шапхъэм амал къеты анахь аудиторие иным удэлэжьэнымкIэ — кIэлэеджакIохэм къащыублагъэу колледжхэм ащеджэрэ студентхэм ыкIи ны-тыхэм анэсыжьхэу.  

МКъТУ-р мы проектым зэрэхэлажьэрэр къыкIэлъэкIо урысые гъэсэныгъэр IэкIыбым щылъыгъэкIотэгъэным исистемэ университетыр зэрэхэлажьэрэм. Къэгъэлъэгъоным къыдыхэлъытагъэу апшъэрэ еджапIэм икIэлэегъаджэхэм ыкIи илIыкIохэм абитуриентмэ зэдэгущыIэгъу къодыеп адашIырэр, университетхэм язэдэлэжьэныгъэ фэгъэхьыгъэ проектыри щыпхыращы, Казахстан ит гъэсэныгъэ организациехэм зэзэгъыныгъэхэр адашIых.  

Азие Гупчэр ары урысые гъэсэныгъэм иэкспорткIэ лъэныкъо шъхьаIэу непэрэ мафэм щыIэр. Урысыем иапшъэрэ еджапIэмэ ащеджэ зышIоигъохэм ахахъо, етIани, еджэкIэ дэгъур ары къыхахырэр, апшъэрэ гъэсэныгъэу сэнэхьат гъэнэфагъэ къэзытыщтхэм алъэплъэх. Ащ фэдэ амалхэр язытыщтхэм зэу Мыекъопэ къэралыгъо технологическэ унвиерситетыр зэращыщыр ахэмэ ашIагъ.