— ШIуагъэ къэзытырэ зэIукI! Джы къызгурэIо, ушэтыным ыпэкIэ зэзгъэшIагъэр зыкIысщыгъупшэжьырэр. ШIыкIэ шъхьафмэ сяплъыщт — анахьэу наIэр тегъэтыгъэным фэгъэхьыгъэ упражнениехэр сыгу рихьыгъэх, — зэхишIэгъэ гупшысэхэмкIэ къыддэгощагъ Ольгэ.

Студенческэ научнэ обществэмрэ зэдэгупшысэгъухэм я Клубрэ зэхэт зэхэсыгъо университетым щырагъэкIокIыгъ. Мы темэр студентмэ ренэу апэблэгъагъ: шIэжьымрэ наIэ тегъэтынымрэ. УпчIэ шъхьаIэр ары зытегущыIагъэхэр — сыдэущтэу къыптеорэ Iофыгъуабэхэм уатекIошъущт, зэбгъэшIагъэр зыщымыгъэгъупшэжьэу, анахь зыщыуищыкIагъэм угу къэбгъэкIыжьыщт.

Iофтхьабзэр къызэIуихыгъ СНО-м ипащэу Ирина Селивановам, ащ гукъэкIэу зыдырагъэштагъэхэм ыкIи мы охътэ благъэм телъытэгъэ планэу агъэнэфагъэм ягугъу къышIыгъ. А Iофыгъомэ игъэкIотыгъэу атегущыIагъэх, зэIукIэм хэлажьэрэмэ зэкIэмэ ашIогъэшIэгъоныгъ.

Ащ ыуж психологическэ къулыкъум ипащэу Людмила Красновам гущыIэр ыштагъ. ЗэдэгущыIэгъу шIыкIэм тетэу зэхэсыгъом хэлажьэрэмэ ащ агуригъэIуагъ информациер «аIэкIэзыжьэу» зыкIэхъурэр. Студентмэ щыгъупшэгъэным имеханизмэхэр зэрагъэшIагъэх, стрессыр а Iофыгъом зэрэхэлажьэрэр, шъхьэ куцIым илъыр игъорыгъэу зэбгъэзэфэн зэрэфаер.

Студентмэ анаIэ тырадзагъ — информацие жъугъэу къаIэкIахьэрэм нахь шъхьаIэр къыхэгъэщыгъэныр. Студенческэ щыIакIэр щысэу аштэзэ, тегупшысыкIынхэм яушъхьагъухэр зэхафыгъэх.

Практическэ Iахьыр пстэуми анахь федэу къычIэкIыгъ: хэлажьэхэрэр информациер гум иубытэгъэным, мнемоническэ приемхэм ыкIи шъхьэкIуцIым пае упражнениехэр зыфэдэхэм ащыгъозагъэх.

— КъэкIощт зэIукIэгъухэм тяжэщт! Мыщ фэдэ Iофтхьабзэмэ шIуагъэ къаты нахь дэгъоу теджэнымкIэ, сессие лъэхъаным тыгухэр тымыгъэбырсырхэу ушэтынхэр ттышъунхэмкIэ, — къыIотагъ Аринэ.

Iофтхьабзэм гуфэбэныгъэ хэлъэу рекIокIыгъ, теориемрэ практикэмрэ зэрипхыгъэх. ЗэхэщакIомэ мыщ фэдэ зэIукIэ заулэ джыри рагъэкIокIынэу рахъухьэ.