Мыекъопэ къэралыгъо технологическэ университетым ипроектнэ экспертизэ иплощадкэ IофшIэныр щиухыгъ, ар программэу «Къулыкъу ахьызэ егъэджэгъэнхэм» зыфиIорэм ипроектнэ офис зэхэзыщэгъагъэр. Ипшъэрылъыр — студенческэ социальнэ гукъэкIхэу общественнэ гумэкIыгъохэм ядэгъэзыжьын дэлажьэрэмэ гъогур ятыгъэныр ары.

Площадкэм иIофшIэн къыдыхэлъытагъэу сыд фэдэрэ лъэныкъуи афеджэрэ студентмэ кIэлэегъэджэ-гъэсакIохэр ягъусэхэу социальнэ проектхэм ятемэхэр къызщаIэтырэ гукъэкIхэм ашъхьэ къащырахыгъ. Непэ социальнэ проектированиеу федеральнэ гъэсэныгъэ программэу «Къулыкъу ахьызэ егъэджэгъэнхэм» зыфиIорэм дыхэтэу агъэцакIэрэм сэнэхьатыкIэхэр зэлъеубытых, университетым щагъэхьазырырэ лъэныкъуабэхэр.

Зэфэшъхьаф гъэсэныгъэ шапхъэмэ арылъхэу студентмэ социальнэ проектхэр зэхагъэуцох:

• егъэджэн дисциплинэм;

• егъэджэн практикэм;

• производственнэ практикэм;

• курсовой проектым игъэцэкIэн;

• чIэтIупщыгъо квалификационнэ IофшIэным игъэхьазырын (ВКР).

Проектнэ экспертизэм иплощадкэ пычыгъо-пычыгъоу хэлажьэрэмэ къащыфаIотагъ проектэу гъэсэныгъэ программэу «Къулыкъу ахьызэ егъэджэгъэнхэм» зыфиIорэм диштэрэр зэрэбгъэпсыщтыр, едзыгъо пэпчъи щадэIэпыIагъэх — гукъэкIым къыщыублагъэу лъагъэкIуатэфэ нэс.

Экспертнэ комиссием гукъэкIхэм лъэныкъуитIумкIэ уасэ афишIыщтыгъэ:

I. Неущрэ мафэм зэрылэжьэщт профессиональнэ IофшIэным дештэмэ. Студентым ипшъэрылъмэ ялъытыгъэу ащ фэдэ екIолIакIэм профессиональнэ амалхэр къетых.

2. Общественнэ мэхьанэу иIэр. Проектхэр профессиональнэ IофшIэнэу агъэцэкIэщтмэ ашъхьагъынхэ фае: гум екIуныр, коммуникативнэ амалхэр, пэрытныгъэ шэнхэр, командэм Iоф щыпшIэшъуныр, гражданскэ пшъэдэкIыжь ыкIи патриотизмэр пхэлъынхэр.

Площадкэм Iоф ешIэфэ экспертнэ IэпыIэгъу проект 40-м ехъумэ агъотыгъ. Хэлажьэрэмэ япроектхэр гъунэм рафылIэщтыгъэхэ къодыеп, ахэмэ:

• загъэхьазырыгъ хэлэжьэнхэу социальнэ проектхэу «Къулыкъу ахьызэ егъэджэгъэнхэм» зыфиIорэм и ЗэIухыгъэ апшъэрэ еджэпIэ зэнэкъокъум;

• проектнэ документациер тэрэзэу зэрагъэзэфэнэу зэрагъэшIагъ;

• едзыгъо пэпчъ экспертмэ яIэпыIэгъу агъотыгъ.

Мыекъопэ къэралыгъо технологическэ университетым общественнэ мэхьанэ зиIэ гукъэкIмэ ягъэцэкIэнкIэ опытышхо иIэу щыт. Гъэсэныгъэ программэу «Къулыкъу ахьызэ егъэджэгъэнхэм» зыфиIорэр МКъТУ-м 2023-рэ илъэсым зыщатIупщыгъагъэм къыщыублагъэу:

• зэхагъэуцуагъ ыкIи щагъэцэкIагъ социальнэ проект 70-рэ;

• проектмэ студент 1500-рэ ахэлэжьагъ. 

Университетыр чанэу гъусэгъумэ адэлажьэ, анахьэу студентмэ социальнэ гумэкIыгъохэм ядэгъэзыжьынкIэ ашIэрэ Iофыр къадезыгъаштэхэрэм ыкIи япрофессиональнэ амалхэр практикэм къыщагъэлъэгъонэу изын къязытыхэрэмэ. Ащ фэдэ екIолIакIэм ищIуагъэкIэ гъэсэныгъэмрэ щыIэныгъэмрэ зэрепхых, пшъэдэкIыжь зыхьырэ лIэужхэр, социальнэ мэхьанэр къызгурыIорэ специалистхэр агъэхьазырышъух.