Непэ, аутизмэм игумэкIыгъохэм афэгъэхьыгъэ къэбархэр зыщатIупщырэ Дунэе маф, МКъТУ-м мэкъу-мэщ технологиехэмкIэ ифакультет акциеу «ШхъуантIэмкIэ зэхэгъан» зыфиIорэр щыкIуагъ. Мы мафэр — аутизмэ зиIэхэм IэпыIэгъу зэрящыкIагъэр цIыфмэ агу къагъэкIыжьынымкIэ, тащыщ пэпчъ нахьышIу, нахь зэIухыгъэ тыхъунхэмкIэ джыри зы ушъхьагъу дэгъу.

Сыда анахьэу шхъонтIашъор къыхахыгъа? А шъор аутизмэм идунэе тамыгъэу хъугъэ. Ащ рэхьатыгъор, гугъапIэр, зыщыгугъужьын шэнхэр къетых, обществэм ынаIэ хэушъхьафыкIыгъэ цIыфхэм къатырагъэтыным, щэIагъэ яIэу къафыщытынхэм фытегъэпсыхьагъ.

Студентхэми кIэлэегъаджэхэми гукъэкIым дырагъэштагъ: нэбгырабэмэ ящыгъэнхэр шъхъонтIашъоу щытыгъэх. Акцием къыдыхэлъытагъэу ащ фэдэ цIыфхэу зихахъо хэушъхьафыкIыгъэхэм шъхьэкIэфэныгъэ афэшIыгъэным фэгъэхьыгъэ упчIэхэр къаIэтыгъэх, адэ инклюзиер — зыкIыныгъэ зыхэлъ обществэ кIуачIэр гъэпсыгъэнымкIэ мэхьанэ зиIэ лъэубэкъу. «Точка кипением» ипрограммнэ пащэу Светлана Новиковам ащ фэдэ сабыйхэм апае агъэхьазырыгъэ проектхэм ягугъу къышIыгъ, ахэр студентхэмрэ университетым иIофышIэхэмрэ агъэцакIэх.

Сыда ащ узкIыпылъын фаер? Аутизмэр — дунаир шъхьафэу плъэгъуныр ары. Нахьыбэ тшIэ хъумэ, тызщыщынэщтыри нахь мэкIэщт, ащ фэдэхэри нахь къыдгурыIощтых. Нэбгырэ пэпчъ иIахь мы Iофым хилъхьан ылъэкIыщт—тыкъэзыуцухьэрэмэ нахьышIоу уафыщытыныр, уишIуагъэ ябгъэкIыныр екъу. Психологическэ къулыкъум ипащэу Людмила Красновам къыIотагъ аутизмэр къызэрэхагъэщырэр, дунаир ащ фэдэхэм зэралъэгъурэ шIыкIэр, ащ епхыгъэ таурыхъхэри зэхифыгъэх. Анахьэу анаIэ зытырагъэтыгъэр инклюзием, IэпыIэгъум ыкIи щыIэныгъэм, гъэсэныгъэм, социальнэ лъэныкъохэм ахэгъэгъозэгъэнхэм яIофыгъохэр ары.

Акцием шъукъыхэлажьэх! Тызэгъусэу «шхъуантIэкIэ кIэтэжъугъэгъанэх», тыгухэм фэбагъэр арылъэу, гупсэфэу тызэдыщыжъугъаIэх!