Мыекъопэ къэралыгъо технологическэ университетым иректорэу Къуижъ Саидэ Урысые Федерацием ухъумэнымкIэ и Министерствэ иведомственнэ бгъэхалъхьэ — медалэу «Дзэ гъэсэныгъэм хэхъоныгъэ егъэшIыгъэнымкIэ ыкIи кадрэхэм ягъэхьазырынкIэ гъэхъагъэхэр зэришIыгъэхэм афэшI» зыфиIорэр къыфагъэшъошагъ.

Бгъэхалъхьэм къегъэлъагъо студентмэ ядзэ ухьазырынкIэ щыIэ системэм хэхъоныгъэхэр егъэшIыгъэнхэм, Урысые Федерацием и УIэшыгъэ КIуачIэхэм апае кадрэхэм ягъэхьазырын университетым иIахьышхо зэрэхэлъыр ыкIи непэрэ уахътэм диштэрэ гъэсэныгъэ практикэхэр зэригъэцакIэхэрэр.

МКъТУ-м зэкIэлъыкIоу запасым щыIэ кадрэхэр дзэ-учетнэ сэнэхьатхэмкIэ егъэхьазырых:

• «Авиационнэ механик шъхьаIэу планерхэр ыкIи пилот зэрымысэу быбырэ аппаратхэр зыгъэIорышIэхэрэр ыкIи зыгъэцэкIэжьхэрэр»;

• «Пилот зэрымысэу быбырэ аппаратхэм яоператор шъхьаIэр»;

• «Пилот зэрымысэу быбырэ аппаратхэм яподразделениехэр ыкIи дзэ частьхэр хэгъэлэжьэгъэнхэр».

МКъТУ-м хэхьэрэ Дзэ егъэджэн гупчэм егъэджэн Iофтхьабзэхэр, дэкIыгъохэр, медицинэ ухьазырынымкIэ десэхэр ренэу щызэхащэх. Дзэ егъэджэн гупчэм шэпхъакIэхэм адиштэрэ егъэджэн Iэмэ-псымэхэр чIэтых ыкIи материальнэ-техническэ базэмкIэ зэтегъэпсыхьагъ, ащ хэхьэх хэушъхьафыкIыгъэ  лабораториехэу пилот зэрымысэу быбырэ аппаратхэм ягъэIорышIэн зызыщагъасэхэрэр.  

Анахьэу анаIэ зытырагъэтырэмэ ащыщ студентхэр дзэ-патриотическэ шэным фэгъэгъэсэгъэнхэм. Университетым щеджэхэрэр шIэжь Iофтхьабзэхэм, урысые дзэ-патриотическэ акциехэм ахэлажьэх, ветеранмэ аIокIэх, Хэгъэгум иухъумакIо и Мафэ, ТекIоныгъэм и Мафэ, фэшъхьаф мэфэкIхэр хагъэунэфыкIых. МКъТу-м  студенческэ дзэ-патриотическэ клубыр щэлажьэ, ащ студентхэр  гражданскэ пшъэдэкIыжьым фегъасэх, Хэгъэгум къулыкъу фахьыным фытырегъэпсыхьэх.  

ХэушъхьафыкIыгъэ дзэ операцием хэлажьэрэмэ IэпыIэгъу афэхъунхэр апшъэрэ Iофыгъохэм ащыщэу университетым щызэрахьэ, игъорыгъоу дзэкIолIмэ гуманитарнэ IэпыIэгъур афаугъои, ахэмэ студентхэри гуфакIохэри чанэу ахэлажьэх.  

А IофшIэным мэхьанэ зиIэ Iофыгъоу къыщыдалъытэ дзэкIолIхэм яунагъохэм, ясабыйхэм яшIуагъэ арагъэкIыныр, ахэмэ апае сэнэхьат къыхэхыным фытегъэпсыхьэгъэ десэхэр афызэхащэх, «Хэгъэгум иухъумакIохэм» я Фондэу Адыгэ Республикэм щыIэр  ащкIэ IэпыIэгъушIоу яI. Мастер-классхэмкIэ кIэлэцIыкIумэ арагъашIэ лъэныкъуакIэхэр, университетскэ сообществэм нахь пэблагъэхэу ашIых.