Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ ректорэу Къуижъ Саидэ.

Зэхэсыгъор торжественнэ Iахьэу бгъэхалъхьэхэр зыщаратыжьыгъэмкIэ аублагъ. Университетым ипрофессорскэ-кIэлэегъэджэ купым щыщхэу гъэсэныгъэм гъэхъагъэхэр щызышIыгъэхэу, наукэмкIэ ыкIи апшъэрэ гъэсэныгъэмкIэ Урысые Федерацием и Министерствэ ибгъэхалъхьэхэр ыкIи щытхъу тхылъхэр къызфагъэшъошагъэхэр, къыхагъэщыгъэх.

Тамыгъэу «ГъэсэкIо гъэшIуагъ» зыфиIорэмкIэ къыхагъэщыгъэх Политехническэ колледжым егъэджэн-методическэ IофшIэнымкIэ пащэм игуадзэу Флора Топольянрэ информационнэ щынэгъончъэнымкIэ ыкIи прикладной информатикэмкIэ МКъТУ-м икафедрэ ипащэу Цундышк Вячеславрэ.

НаукэмкIэ ыкIи апшъэрэ гъэсэныгъэмкIэ Урысые Федерацием и Министерствэ и Щытхъу тхылъхэмкIэ къыхагъэщыгъэх:

— приемнэ комиссием пшъэдэкIыжь зыхьырэ исекретарэу Бэрзэдж Роз;

— ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Мурат;

— хьисапым, физикэм ыкIи системнэ анализым якафедрэ ипащэу Татьяна Деминар;

— маркетингым, сервисым ыкIи туризмэм якафедрэ идоцентэу, МКъТУ-м и «Точка кипение» ипрограммнэ пащэу Светлана Новиковар;

— МКъТУ-м икъутамэу пос. Яблоновскэм дэтым «ХьисапымкIэ» апшъэрэ категорие зиIэ икIэлэегъаджэу Шартан Рабихьат.

Ахэмэ афэшъхьафэу, шIэныгъэлэжь доцентыцIэр къэзыушыхьатырэ аттестатыр сэнэхьатэу «Публично-правовые (государственно-правовые) науки» зыфиIорэмкIэ Джамырзэ Бэлэ къыфагъэшъошагъ.

Ащ къыкIэлъыкIоу зэхэсыгъом иповесткэ шъхьаIэ ит упчIэмэ язэхэфын фежьагъэх, ахэр университетым хэхъоныгъэ егъэшIыгъэным, гъэсэныгъэ программэхэм ыкIи стратегическэ планированием афэгъэхьыгъагъэх.

Апэрэ упчIэу зытегущыIагъэхэр «Мыекъопэ къэралыгъо технологическэ университетым хэхъоныгъэ егъэшIыгъэным истратегиеу кадрэхэм ягъэхьазырын, научнэ ушэтынхэм язэхэщэн ыкIи биотехнологиехэмкIэ технологическэ пэрытныгъэм изэхэгъэуцон» зыфиIорэм фэгъэхьыгъагъ. Ректоратым иупчIэжьэгъоу Сергей Чефрановым докладыр къышIыгъ. Къыгъэлъэгъогъэ стратегием Iофыгъо шъхьаIэу къыщыхигъэщыгъэр университетыр непэрэ уахътэм диштэрэ научнэ-гъэсэныгъэ гупчэ шIыгъэным тегъэпсыхьэгъэныр, ар биотехнологиехэм, агроиндустрием ыкIи биоэкономикэм хэхъоныгъэхэр ягъэшIыгъэнхэм фэгъэIорышIэгъэныр ары.

Стратегическэ пшъэрылъхэр зэшIуахынхэм пае мы илъэсипшI благъэхэм агъэцэкIэнхэу проект 20 рахъухьэ, ахэр университетыр зыщылъэш лъэныкъохэм, научнэ IэшIагъэхэр зыщыриIэхэм афэгъэзэгъэщтых, инженернэ командэ кIуачIэхэр хагъэлэжьэщтых. Ахэмэ ащыщ — генетикэр, селекциер ыкIи семеноводствэр, агротехнологиехэр, мэкъу-мэщ продукцием икъыдэгъэкIыжьын, гъомлэпхъэ инжинирингыр, био-зэфэмыдэныгъэм икъэухъумэн ыкIи агробиоценозхэр, джащ фэдэу междисциплинарнэ ушэтынхэу биотехнологиехэм, искусственнэ интеллектым, медицинэм, фармацием, химием алъэныкъокIэ ашIыхэрэр.

Анахьэу анаIэ зытырадзагъэр непэрэ лъэхъаным диштэрэ кадрэхэм ягъэхьазырын ары, прикладной научнэ ушэтынхэм хэхъоныгъэхэр ягъэшIыгъэнхэм, инновационнэ технологиехэр лъыгъэкIотэгъэнхэр, индустриальнэ гъусэгъумэ ядэлэжьэныгъэ гъэпытэгъэныр. Проектхэм ягъэцэкIэн къыхагъэлэжьэщтых шIэныгъэлэжьхэр, университетым иIофышIэхэр ыкIи икIэлэегъаджэхэр, организацие-гъусэгъухэр, джащ фэдэу аспирантхэр, магистрантхэр ыкIи студентхэр, ащ амал тедзэхэр къытыщтых, ахэмэ яшIуагъэкIэ технологие пэрытхэм арыгъозэщтых, сэнэхьат дэгъухэр зэрагъэгъотыщтых.

Стратегием игъэцэкIэн пстэуми апэу амал зэритыщтыр биотехнологиехэм алъэныкъокIэ Урысыем технологическэ пэрытныгъэр ыубытыныр ары, университетым ащ пае иIахьышхо хелъхьэ, джащ фэдэу шъолъырыми хэхъоныгъэ егъэшIыгъэным фэIорышIэ.

КIымэфэ зачетнэ-экзаменационнэ сессием изэфэхьысыжьхэм афэгъэхьыгъэ докладыр егъэджэн-методическэ гъэIорышIапIэм ипащэу Наталья Чудесовам къышIыгъ. Ащ ипсалъэ къыщыхигъэщыгъ, университетым щеджэрэ студентмэ яшIэныгъэхэм ядэгъугъэ хэхъоныгъэхэр фашIыгъэх. Лъэхъэнэ зэблэкI аттестациер дэгъу дэдэу зэхэщагъэ хъугъэ, ар къызхэкIыгъэр шъхьафит уасэ къэзытырэ системэр зэрэхагъэхьагъэр ары, ащ фэшъхьафэу, уплъэкIужьынымкIи къежьэгъэкIэ шапхъэхэр агъэфедэх. Гъэсэныгъэ IофшIэныр зэрагъэзекIорэм елъытыгъэу гъэхьазырыгъэнымкIэ егъэджэн планхэр бакалавриатым, специалитетым, магистратурэм алъэныкъохэмкIэ агъэнэфагъэх, джащ фэдэу гурыт профессиональнэ гъэсэныгъэмкIи, ахэр 2026-рэ илъэсым телъытагъэх. Ащ фэшъхьафэу, Наталья Николай ыпхъум Адыгэ Республикэм истипендие зыфагъэшъошэнэу къагъэлъэгъогъэ кандидатмэ яспискэ къеджагъ.

Ащ ыуж, егъэджэн IофшIэнымкIэ проректорэу Людмила Задорожнаям университетым 2025-рэ илъэсым зызэриуплъэкIужьыгъэм къытегущыIагъ. Отчетыр МКъТУ-м иофициальнэ сайт къыщыхаутыгъагъ. Ежь анахь шъхьаIэхэр ары къыхигъэщыгъэхэр, кIэлэегъэджэ купым гъэхъагъэхэр зыщишIыгъэхэр къыкIигъэтхъыгъэх: сыд фэдэрэ егъэджэн лъэныкъохэмкIи хахъохэр щыIэх; сэнэхьатыкIэхэр ыкIи базовэ кафедрэхэр къызэIуахыгъэх; электроннэ сервисхэм зэрагъэушъомбгъугъ; студентхэмрэ кIэлэегъаджэхэмрэ проектнэ практикумым игъэцэкIэн зэрэхагъэлажьэхэрэр, проектэу «Къулыкъу ахьызэ егъэджэгъэнхэр» ыкIи акселераторэу «ИнноВекторыр». ЗыуплъэкIужьыным ылъэныкъокIэ егъэджэн IофшIэнымкIэ проректорэу Людмила Задорожнаям наукэм гъэхъагъэу щашIыгъэхэр къыхигъэщыгъэх.

ШIэныгъэлэжьхэм ясовет хэтхэр егъэджэным ыкIи приемым афэгъэхьыгъэ упчIэ заулэмэ атегущыIагъэх. Мыекъопэ къэралыгъо технологическэ университетым иординатурэ учIэхьанымкIэ 2026-2027-рэ илъэсхэм ателъытагъэу Шапхъэу пылъхэр зэхафыгъэх. Ащ фэшъхьафэу ыпкIэ атызэ зыщеджэхэрэ чIыпIэмэ япчъагъэ агъэнэфагъ, ахэр программэхэу бакалавриатым, специалитетым, магистратурэм ыкIи научнэ-педагогическэ кадрэхэр аспирантурэм щыгъэхьазырыгъэнхэм афэгъэхьыгъэх, ащ хэхьэ университетым икъутамэу поселкэу Яблоновскэм дэтыри.

Программэхэу бакалавриатымрэ специалитетымрэ квотэ хэушъхьафыкIыгъэхэмкIэ IэкIыбым къикIыщтхэм ыкIи гражданствэ зимыIэхэм апае чIыпIэу афыхахыщт пчъагъэр агъэнэфагъ, ахэр ыпкIэ хэлъэу ординатурэм щеджэщтхэм апай, 2026-2027-рэ еджэгъу илъэсым телъытэгъэщтых.

Экологическэ факультетым идеканэу Галина Коноваловам предложение къыхьыгъ магистерскэ программэу I0.04.0I «Техносфернэ щынэгъончъэныр» зыфиIорэм Iэшъхьэтет фэшIыгъэнэу. ШIэныгъэлэжьхэм ясовет иунашъокIэ а IэнатIэр фагъэшъошагъ мэкъу-мэщ шIэныгъэхэмкIэ докторэу, профессорэу Юрий Сухорукихым — научнэ IофышIэ пэрыт, ФГОС ВО-м ишапхъэхэм арэгъуазэ, научнэ-ушэтын IофшIэным ылъэныкъокIэ опытышхо IэкIэлъ. Юрий Иван ыкъор магистрантхэу зистатьяхэр хэгъэгум ыкIи IэкIыб къэралмэ къащыдэкIырэ журналмэ къащыхэзыутырэмэ пэщэныгъэ адызэрехьэ, МКъТУ-м изэхэщэкIо комитетхэм ахэт.

Университетым щеджэрэ студентмэ ыпкIэу къатырэм икъегъэIыхын фэгъэхьыгъэ упчIэри зэхэсыгъом къыщаIэтыгъ.

Мыекъопэ къэралыгъо технологическэ университетым игъэсэныгъэ, научнэ ыкIи гъэсэкIо IофшIэным хэхъоныгъэхэр егъэшIыгъэнхэм унашъоу советым щашIыгъэхэр фэIорышIэщтых.