Мыекъопэ къэралыгъо технологическэ университетым дизайн-проектхэм я Урысые зэнэкъокъоу «Гухэлъым иеджапI» зыфиIорэм яIофшIагъэхэр къыщаухъумагъэх. Ащ хэлэжьагъэх лъэныкъохэу «ПсэолъэшIыныр» ыкIи «Ландшафтнэ архитектурэмрэ урбанистикэмрэ» зыфиIохэрэм афеджэхэрэр.

«Гухэлъым иеджапI» — ар гукъэкI ин, Урысые Федерацием и Общественнэ палатэрэ наукэмрэ апшъэрэ гъэсэныгъэмрэкIэ УФ-м и Министерствэрэ, джащ фэдэу гражданскэ обществэмрэ цIыфым ифитыныгъэрэ я Советэу Президентым дэжь щыIэр ыкIи Урысые политическэ партиеу «Единэ Россиер» яIэпыIэгъухэу зэхащэ.

Рагъаджэхэрэм ятворческэ ыкIи япрофессиональнэ амалхэр къызэIухыгъэнхэмкIэ мэхьанэ зиIэ площадкэу зэнэкъокъур хъугъэ. IофшIэным хэлэжьагъэх лъэныкъоу «ПсэолъэшIыным» феджэхэрэ Ангелина Демчукыр, Мария Лорюшвили ыкIи Арина Токбаевар, яIэшъхьэтетыгъэхэр техническэ шIэныгъэхэмкIэ докторэу, псэолъэшI ыкIи общепрофессиональнэ дисциплинэхэм якафедрэ ипащэу, доцентэу Мэрэтыкъо Заурэ ыкIи кафедрэм идоцентэу Щыщэ Ритэ.

Лъэныкъоу «Ландшафтнэ архитектурэр ыкIи урбанистикэр» зыфиIорэм икомандэ хэхьагъэх Игорь Пивоваровыр, Владислав Герасимовыр, Дария Пановар ыкIи Александр Налетовыр, яIэшъхьэтетыгъэр мэкъу-мэщ шIэныгъэхэмкIэ кандидатэу, доцентэу, ландшафтнэ архитектурэм ыкIи мэз Iофым якафедрэ япащэу Наталья Трушевар ары.

Муниципальнэ бюджетнэ еджэпIэ учреждениеу — кIэлэцIыкIу IыгъыпIэу № 2-м, «Василек» зыцIэу Адыгэкъалэ дэтым фэгъэхьыгъэ проектэу эскизнэ шIыкIэр къызфагъотыгъэр къагъэлъэгъуагъ. Гъэсэныгъэм епхыгъэ шIыкIэхэу непэрэ мафэм диштэхэрэр ухьазырын процессым щагъэфедэгъах.

Анахьэу проектым мэхьанэ къезытыгъэр программэу «Къулыкъу ахьызэ егъэджэгъэнхэр» зыфиIорэр ары, ащкIэ общественнэ пшъэрылъхэу къэуцухээр зэшIуахынхэ алъэкIыгъ. Егъэджэн IофшIэныр мыщ дэжьым зэхьылIэгъагъэр предложениехэр къэхьыгъэнхэр, гъэсэныгъэ пшъэрылъхэмрэ практическэ шIуагъэу проектмэ къатырэмрэ зэгъусэнхэр ары.

IофшIэным анаIэ зыщытырагъэтыгъэр кIэлэцIыкIу IыгъыпIэм иIофышIэхэм, ны-тыхэм, гъэсакIохэм яеплъыкIэхэр къыдэлъытэгъэнхэр ары. Ащ фэдэ екIолIакIэм къегъэлъагъо неущрэ IофшIакIохэр непэрэ мафэм шIыкIэхэм якъэгъотынкIэ Iофтхьабзэм зэрэхэлэжьэшъухэрэр.

Лъэныкъоу «Ландшафтэ архитектурэр ыкIи урбанистикэр» зыфиIорэм хэлажьэхэрэмэ шъолъырыр зэтегъэпсыхьажьыгъэным фэгъэхьыгъэ шIыкIэ заулэ къагъэлъэгъуагъ, ахэмэ ащыщыгъэх джэгупIэ чIыпIэхэу ныбжь куп зэфэшъхьафхэм афыхэхыгъэхэр, автокъэлэжъыер ыкIи хатэхэр. Джащ фэдэу гъогухэу гъэушъэбыгъэхэр къыдыхэлъытагъэх.

Лъэныкъоу «ПсэолъэшIыным» илIыкIомэ кIэлэцIыкIу IыгъыпIэм иархитектурнэ шIыкIэр къагъотыгъ, ащ адыгэ тхыпхъэхэр ыкIи къэгъэгъэ сурэтхэр зыщызэхэпхъагъэхэ мозайкэхэр къыщагъэлъэгъуагъэх. IофшIэгъэ тедзэу къатыгъэх художественнэ элементхэр, ахэмэ лъэпкъ нэшанэ зыхэлъыгъэ муралхэр ащыщыгъэх, джащ фэдэу актовэ залыр ыкIи дэкIояпIэхэр агъэкIэрэкIагъэх.

Къагъэлъэгъогъэ IофшIагъэхэмкIэ зэфэхьысыжь пшIымэ, зэгъусэхэу гъэсэныгъэ Iофым изэхэщэн екIуалIэхэмэ, ащ щынэгъончъагъэр, шъолъыр-культурнэ нэшанэхэр къащыдалъытэхэмэ, пшъэрылъыр агъэцэкIэшъущт. Зэнэкъокъум хэлэжьагъэмэ амал агъотыгъ яшIэныгъэхэр практикэм рахьылIэжьынхэу, команднэ IофшIэнымкIэ опыт агъотыгъ, профессиональнэ IофшIэнэу апэ илъым социальнэ екIолIакIэ зэрищыкIагъэр, ахэр зэкIэ «Къулыкъу ахьызэ егъэджэгъэнхэр» зыфиIорэ программэм къыдыхэлъытагъэхэу зэрэзэшIуахыхэрэр зэхашIыкIыгъ.

Гъэсэныгъэмрэ шIэныгъэмрэкIэ Адыгэ Республикэм и Министерствэ дунэе зэфыщытыкIэхэмкIэ, наукэмкIэ ыкIи профессиональнэ гъэсэныгъэмкIэ иотдел ипащэу Емзэщ Маринэ, джащ фэдэу Теуцожь районым иадминистрацие иIэшъхьэтетхэр проектым ыгъэрэзагъэх.