Мыекъопэ къэралыгъо технологическэ университетым Адыгэ Республикэм иеджэпIэ командэ 50 ригъэблэгъагъ, ахэр программэу «Къулыкъу ахьызэ МКъТУ-м щегъэджэгъэнхэр» ыкIи федеральнэ проектэу «Къулыкъу ахьызэ егъэджэгъэнхэр. Апэрэхэр» зыфиIохэрэм къадыхэлъытагъэх. Iофтхьабзэр зыфытегъэпсыхьагъэр социальнэ гукъэкIхэр агъэцэкIэнхэр, ащкIэ обществэм ипшъэрылъхэр зэшIуахынхэр ары.

ШIуфэс псалъэкIэ къэзэрэугъоигъэхэм закъыфигъэзагъ егъэджэн IофшIэнымкIэ проректорэу Людмила Задорожнаям, ащ къыхигъэщыгъ, «Тест-драйв проектхэр» — кIэлэеджакIохэмкIэ амал шIагъу, экспертнэ уасэр къалэжьын алъэкIы, ягукъэкIхэм адэлэжьэшъух ыкIи шъолъыр зэнэкъокъум зыфагъэхьазыры.

Командэ пэпчъ МКъТУ-м игъэсэкIо-кIэлэегъаджэрэ студент-гъэсакIорэ ашъхьащытхэу Iоф ашIэ. Шъолъырым ипшъэрылъхэр гъэцэкIэгъэнхэмкIэ гукъэкIэу командэмэ яIэхэр къаIопщых ыкIи къыраIотыкIых, экспертнэ комиссием ахэмэ уасэ афешIы, гъунэм нагъэсыгъэхэмэ, икъоу адэлэжьагъэхэмэ егъэунэфы.  

Проектым зэрепхых еджапIэхэр, университетхэр ыкIи обществэр: кIэлэеджакIомэ агъоты гъэсакIомэ яIэпыIэгъу, кIэлэегъаджэмэ яметодическэ тхылъхэр, университетым иресурсхэр. ГукъэкIым игъусэгъух организацие 18 ыкIи республикэм иучреждениехэр.  

— «Программэу «Къулыкъу ахьызэ егъэджэгъэнхэр» зыфиIорэр дгъэфедэзэ гъэсэныгъэ процессыр фытетэгъэпсыхьэ пшъэрылъхэм язэшIохын.  «Тест-драйвым» къегъэлъагъо кIэлэеджакIохэмрэ кIэлэегъаджэхэмрэ а процессым икъу фэдизэу зэрэхэщагъэхэр. Тэлъэгъу кIэлакIэмэ ягукъэкIхэм афэшъыпкъэхэу зэрэщытхэр, ахэр къызэраугупшысыхэрэ шIыкIэр, гъэсакIохэм яIэпыIэгъу зызэращамыдзыерэр. Джащ фэдэ зэдэлэжьэныгъ тэ МКъТУ-рэ республикэм икIэлэеджакIохэмрэ азыфагу илъынэу тызыфаер, ары зыуж титыр», — къыхегъэщы мы лъэныкъом изещакIоу, экономикэ шIэныгъэхэмкIэ кандидатэу, маркетингым, сервисым ыкIи туризмэм якафедрэ идоцентэу Хьанэхъукъо Заремэ.

Тхьамафэм къыкIоцI еджэпIэ командэмэ япроектхэм лъэтегъэуцо афашIыщт.