Политехническэ колледжым сэнэхьат къыхэхыным фэгъэхьыгъэ Iофтхьабзэр щыкIуагъ, ар зыфытегъэпсыхьэгъагъэр Мыекъопэ къэралыгъо технологическэ университетым учIэхьанымкIэ щыIэ амалхэр ягъэшIэгъэныр ары. Iофтхьабзэм джащ фэдэу хэлэжьагъэх МКъТУ-м икъутамэу поселкэу Яблоновскэм дэтым илIыкIохэри.

Егъэджэн IофшIэнымкIэ университетым ипроректорэу Людмила Задорожнаяр, приемнэ комиссием пшъэдэкIыжь зыхьырэ исекретарэу Бэрзэдж Розэ, джащ фэдэу факультетмэ ядеканхэр ыкIи кафедрэмэ япащэхэр 1офтхьабзэм хэлэжьагъэх,   приемнэ кампанием ыкIи гъэсэныгъэ процессхэм яупчIэ шъхьаIэхэм къатегущыIагъэх.  

Iофтхьабзэм хэлэжьагъэмэ къафаIотагъ непэрэ уахътэм диштэрэ сэнэхьатхэу зыфырагъэджэхэрэр зыфэдэхэр, гъэсэныгъэ программэхэу агъэцакIэхэрэр, ахэмэ якупкIыр ыкIи нэмыкIхэм апшъэ кIонхэмкIэ лъэныкъошIухэу яIэхэр. Анахьэу анаIэ зытырадзагъэр сэнэхьатэу къыхахыщтхэр ары, студентхэр еджэхэфэ нэс къыхахыгъэхэм, IофшIэнымкIэ бэдзэрэу щыIэр псынкIэу зэрэзэхъокIырэр къыдалъытэзэ, профессиональнэ хэхъоныгъэ ашIынымкIэ ахэмэ мэхьанэу яIэр къыхагъэщыгъ.  

Ащ фэшъхьафэу, дэIуакIомэ къафаIотагъ профессиональнэ хэхъоныгъэ ашIынымкIэ зыхэлэжьэнхэ фае лъэныкъохэр: научнэ-ушэтэкIо IофшIэнхэм, проектнэхэм, профильнэ зэнэкъокъухэм ыкIи  олимпиадэхэм, джащ фэдэу стажировкэ программэхэм,  индустриальнэ гъусэгъухэм адэлэжьэнхэм.

Колледжхэр къэзыухыхэрэр апшъэрэ еджапIэм зэрэчIэхьащтхэм шъхьафэу тегущыIагъэх. Специалистмэ игъэкIотыгъэу къаIотагъ приемнэ комиссием фагъэхьазырынэу щыт документхэр, гъэсэныгъэ Iофыгъомэ афэгъэхьыгъэ упчIэмэ джэуапхэр къаратыжьыгъэх.

Куратормэ студенческэ щыIакIэр зыфэдэщтыр икъоу къагурыIуагъ, ащ егъэджэн процессэу хахьэрэр, научнэр, творческэр ыкIи общественнэ IофшIэнэу епхыгъэр зыфэдэхэр.