Мыекъопэ къэралыгъо технологическэ университетым я II-рэ Дунэе научнэ конференциеу цивилизационнэ хэхъоныгъэмрэ хэгъэгу цIыкIум икультурнэ кIэн икъэухъумэнрэ афэгъэхьыгъэ упчIэхэр къызщаIэтыгъэр щыкIуагъ.

Iофтхьабзэм хэлэжьагъэх шIэныгъэлэжьхэр, ушэтакIохэр, практикхэр, шъолъыр культурэм изэгъэшIэн зышIогъэшIэгъонхэр.

Мультидисциплинарнэ шэнэу конференцием иIагъэр  тематическэ секциехэм яIофшIэн къыхэщыгъэх. Ащ хэлэжьагъэмэ теоретическэ ыкIи практическэ лъэныкъохэу культурнэ кIэным игъэпсынрэ иухъумэнрэ, культурнэ хабзэхэм психологэ-кIэлэегъэджэ практикэхэм зэрахэлажьэхэрэм, обществэмрэ культурэмрэ яушэтынхэу шъолъырым щашIыгъэм къыгъэлъэгъуагъэхэм афэгъэхьыгъэхэм ягугъу ашIыгъ. ХэушъхьафыкIыгъэу анаIэ тырадзагъ профессиональнэ гъэсэныгъэм имэхьанэ, шъолъырхэм яхэхъоныгъэ, ар къэралыгъо ыкIи  муниципальнэ гъэIорышIэным зэрэхэлажьэрэм. Ащ фэшъхьафэу, лъэпкъ нэшанэхэр а Iофыгъомэ зэрахэлажьэхэрэм, щыIэкIэ-псэукIэр нахьышIу шIыгъэнымкIэ ашIэхэрэм атегущыIагъэх. ХэушъхьафыкIыгъэ сессием къыдыхэлъытагъэу шъолъыр культурнэ политикэм иIофыгъохэр къаIэтыгъэх.

Конференцием зэфэхьысыжьэу фашIыгъэм къыгъэлъэгъуагъ докладхэм мэхьанэ куу яIэу зэрэщытыгъэр ыкIи Iофтхьабзэр дэгъоу зэрэзэхащагъэр. Ахэмэ хагъэунэфыкIыгъ, шъолъырхэм апае шIэныгъакIэхэр зэрэзэрагъэгъотыгъэхэр, джащ фэдэу яшIошIхэу культурнэ кIэным икъэухъумэнкIэ яIэхэмкIэ зэрэзэхъожьыгъэхэр. Тематикэу къыхахыгъэм мэхьанэ ин зэриIэр зэхэгущыIэжьым зэкIэхэми къыщыхагъэщыгъ.  

Iофтхьабзэр зэхэзыщагъэхэр: Мыекъопэ къэралыгъо технологическэ университетыр,  культурнэ ыкIи чIыопс кIэнымкIэ Научнэ-ушэтэкIо институтым и Къыблэ къутамэу  Д. С. Лихачевым ыцIэ зыхьырэр, культурэмрэ искусствэмрэкIэ Белорусскэ къэралыгъо университетыр, джащ фэдэу Урысые культурологическэ обществэр.