Мыекъопэ къэралыгъо технологическэ университетым хэхьэрэ Политехническэ колледжым истуденткэхэр я V-рэ Дунэе зэнэкъокъоу «Туристическэ кодэу сихэгъэгу, къалэм, поселкэм, шъолъырым яIэр — PRO-туризмэр» зыфиIорэм хэлэжьагъэх.

Зэнэкъокъушхом зэфэхьысыжьхэр Москва щыфашIыгъэх, Урысыем ишъолъыр 85-мэ ыкIи IэкIыб хэгъэгухэм ащыщ нэбгырэ 850-рэ ащ хэлэжьагъэх. Адыгэ Республикэр зэлъашIэрэ площадкэм къыщызгъэлъэгъуагъэхэр студенткэхэу Диана Сагкаевамрэ Валерия Семеновамрэ, ахэмэ яIэшъхьэтетыгъэр кIэлэегъаджэу  Валерия Доронинар ары.

Проектхэр Московскэ къэралыгъо университетэу М. В. Ломоносовым ыцIэ зыхьырэм къыщаухъумагъэх. Шъолъыр зэфэмыдэныгъэм ылъэныкъокIэ шIэныгъэ куоу яIэхэр, непэрэ мафэм диштэрэ культурнэ кIэным хэшIыкIэу фыряIэхэр къагъэлъэгъуагъэх, туризмэм хэхъоныгъэхэр егъэшIыгъэнхэмкIэ ямышIыкIэ гукъэкIхэр предложениеу къахьыгъэх. 

ХэушъхьафыкIыгъэ IофшIэн программэр гъэсакIомэ апае зэхащэгъагъ. Iэнэ хъураеу  «Точка входа: въездная стела как маркер идентичности региона» зыфиIорэр зэнэкъокъум къыдыхэлъытагъэу зэхащэгъагъ, ащ Адыгэ Республикэм иопыт Валерия Доронинам къыщитыгъ, туристическэ шъолъырэу щызэхащагъэхэр къыриIотыкIыгъэх. Ащ иджэпсалъэ осэ ин къыфашIыгъ ыкIи сертификатрэ рэзэныгъэ тхылъымрэкIэ къыхагъэщыгъ.  

Торжественнэ шIыкIэм тетэу текIоныгъэ къыдэзыхыгъэхэр къыщыхагъэщыгъэх ХьакIэщ щагоу къэгъэлъэгъон-бэдзэрэу  «Ладья. Весенняя Фантазия-2026» зыфиIорэм дыхэтыгъэм. Диана Сагкаевам я III-рэ чIыпIэр  номинациеу «ИIэшIугъэ зэхашI! Гастрономическэ туризмэр» зыфиIорэмкIэ къыдихыгъ. Ащ ипроект шъолъырым игастрономическэ кIэн фэгъэхьыгъэ проектыр къыухъумагъ, ар туризмэм хэхъоныгъэ егъэшIыгъэнымкIэ амалышIоу хъущт. Валерия Семеновам зэнэкъокъум зэрэхэлэжьагъэмкIэ  сертификат къыратыгъ.

Тыгу къыддеIэу текIоныгъэ къэзыхьыгъэмэ тафэгушIо! Мыщ шIэныгъэу щыжъугъотыгъэхэр лъэубэкъукIэу профессиональнэ хэхъоныгъэхэмкIэ шъуфэрэхъух!