МКъТУ-м и «Точка кипение» экспертмэ номинациеу «ПредпринимательствэмкIэ» зэIукIэгъу щызэхащагъ, ар ныбжьыкIэ проектхэм я Урысые зэнэкъокъоу «Уигухэлъ факIу!» зыфиIорэм къыдыхэлъытагъ, зезыщагъэр Къохъужъ Саид.

Социальнэ сатыушIэр, персоналым ыкIи проектэу «Непэрэ уахътэм диштэрэ лъэпкъ еджапIэу «Тамэ» зыфиIорэмэ яавторыр, ишIэныгъэхэмкIэ ныбжьыкIэмэ къадэгощагъ, лъэубэкъу лъэубэкъоу адыгэмэ яхэбзэ шIагъоу аталыкъыгъэр зыфэдагъэр къафиIотагъ, ар IофыгъошIоу хъугъэ ыкIи Адыгэ Республикэм щыпсэурэмэ ашIогъэшIэгъонэу къычIэкIыгъ. ЕджапIэу «Тамэм» игъэцэкIэн пэIуагъэхьанэу сомэ млн 1,5-рэ зэрылъ грантыр къаратыгъ.

Экспертым IукIэнхэу къеблэгъагъэх ныбжьыкIэ проектхэм я Урысые зэнэкъокъоу «Уигухэлъ факIу!» зыфиIорэм хэлажьэхэрэр, унэе бизнесыр зыгъэпсы зышIоигъохэр. КIэлэеджакIохэмрэ студентхэмрэ еджапIэм изэхэщэн пылъ тарихъым щыгъозагъэх, тамэм, лъэгапIэм, кIэгъэкъоным ямэхьанэ ащ къызэрикIырэр зэхашIагъ. Саидэ сатыу IофымкIэ опытэу иIэр къадигощыгъ — «Сервисым иеджапIэ» ыкIи проектэу «Непэрэ адыгэ пшъашъэм иеджапIэ» къащегъэжьагъэу лъэпкъ еджэпIэ иным нэсыжьэу зэрэзэхищагъэхэм ягугъу къышIыгъ.

Анахьэу ынаIэ зытыригъэтыгъэр практическэ лъэубэкъухэр ары: хабзэхэмрэ непэрэ щыIакIэмрэ азыфагу о уигъогу зэрапхырыпщыщтыр, IэпэIэсэныгъэ зыхэлъ командэр зэрэзэхэпщэщтыр ыкIи грант къыуатыным пае заявкэр зэрэптыщт шIыкIэр. «Тамэр» ищысэу хьакIэм къыIотагъ уасэ зыфашIырэ лъэпкъ шэн-хабзэмэ кIэлэцIыкIухэри ныбжь зиIэхэри зэрэзэхищэхэрэр. Лъэпкъ кIэныр къычIамынэу ашIэрэ Iофым ифедэ къызэрагъэнэфэщт шIыкIэми тегущыIагъэх.

НыбжьыкIэу зэIукIэм хэлэжьагъэмэ яунэе проектхэр къаугупшысынхэм тегъэпсыхьагъэхэ хъугъэх. КIэухым, Къохъужъ Саидэ упчIэмэ джэуапхэр къаритыжьыгъэх, проектыкIэхэмкIэ IэпыIэгъу къазэрэфэхъущтымкIи къыгъэгугъагъэх.

Гъэсэныгъэ программэм хэхьэх мастерскойхэр, зэдэгущыIэгъухэр, лъэныкъуитфымкIэ экспертмэ аIукIэнхэр: «Медиар», «Предпринимательствэр», «ИТ-р ыкIи цифрэ технологиехэр», «Зэтегъэпсыхьэгъэныр», «ГуфэкIоныгъэр».

Шъугу къэдгъэкIыжьын, зэнэкъокъур акъылыгъэ зыхэлъ Iофтхьабзэмэ ахалъытэ ыкIи текIоныгъэ къыдэзыхыхэрэр МКъТУ-м чIахьэхэ хъумэ балл тедзэхэу 8-10 фэдиз къафыхагъэхъощт. Зэнэкъокъум ыпкIэ хэмылъэу хэлажьэх, ащ тефэщт мылъкур университетым егъэкIоды.

Зэнэкъокъум изэхэщакIор — МКъТУ-м и «ТК» икоманд: программнэ пащэр Светлана Новиковар ыкIи администраторыр Мария Тамахинар арых. 2025-2026-рэ еджэгъу илъэсым Урысыем икомандэ 25-мэ заявкэ къатыгъагъ хэлэжьэнхэу. 2026-рэ илъэсым ижъоныгъокIэ мазэ финалыр рагъэкIокIыщт.