«Къулыкъу ахьызэ егъэджэгъэнхэр» зыфиIорэ программэм къыдыхэлъытагъэу ШIум и Хакатон зэхащагъ: Мыекъопэ къэралыгъо технологическэ университетымрэ кIэлэегъэджэ колледжымрэ ястудентмэ социальнэ пшъэрылъмэ инновационнэ шIыкIэхэр къафагъотыгъэх.

Гъэ къэс рагъэкIокIырэ Iофтхьабзэм студентхэр зэрепхых инновационнэ шIыкIэхэр агъэфедэхэзэ социальнэ пшъэрылъхэр зэшIуахынхэм пае. Мы илъэсым ащ хэлажьэрэмэ къахэхъуагъэх Адыгэ кIэлэегъэджэ колледжэу Андрыхъое Хъусен ыцIэ зыхьырэм щырагъаджэхэрэр.

Хакатоным ипшъэрылъыр студентмэ япрофессиональнэ компетенциехэм хэхъоныгъэхэр ягъэшIыгъэнхэр, инновационнэ проектхэр зэхэгъэуцогъэнхэр, креативнэ гупшысэнымрэ команднэ IофшIэнымрэ афытегъэпсыхьэгъэнхэр, джащ фэдэу студентмэ, кIэлэегъаджэмэ ыкIи социальнэ организациемэ азыфагу язэдэлэжьэныгъэ гъэпытэгъэныр ары. Охътэ кIэкIым къыкIоцI прототип шIыкIэхэр, продуктхэр ыкIи сервисхэр Iофтхьабзэм хэлажьэрэмэ зэхагъэуцуагъэх.

ШIуфэс псалъэкIэ къэзэрэугъоигъэхэм закъыфигъэзагъ МКъТУ-м егъэджэн IофшIэнымкIэ ипроректорэу Людмила Задорожнаям, «Къулыкъу ахьызэ егъэджэгъэнхэр» зыфиIорэ программэр ащ зэрещэ. Iофтхьабзэм мэхьанэшхо зэриIэр, социальнэ пшъэрылъэу уахътэм къыгъэуцухэрэм язэшIохынкIэ амалышIоу зэрэщытыр ащ къыкIигъэтхъыгъ.

IофшIэныр рагъэжьэным ыпэкIэ командэмэ къэбарыр экспертмэ алъагъэIэсыгъ. Анахь гъэшIэгъонэу программэм хэтыгъэр блиц-лекциеу «Нейросети как инструмент и партнер в решении проектных задач» зыфиIорэр ары, информационнэ щынэгъончъэнымкIэ ыкIи прикладной информатикэмкIэ кафедрэм ипащэу, Научнэ-гъэсэныгъэ гупчэу «Искусственнэ интеллектым ипромышленнэ робототехникэр ыкIи технологиехэр» зыфиIорэм иIэшъхьэтетэу Цундышк Вячеслав ары зезыщагъэр.

Хакатоным лъэныкъо зэфэшъхьафхэм афеджэрэ студентхэр зыхэхьэгъэхэ командих хэлэжьагъ: неущрэ инженерхэр, экономистхэр, псэолъэшIхэр, мэшIо щынэгъончъэным испециалистыщтхэр, врач хъущтхэр ыкIи IT-р къыхэзыхыгъэхэр. НКО-м, общественнэ организациехэм ыкIи бюджетнэ учреждениехэм ялIыкIохэр ягъусэхэу ахэр проектхэу хэгъэгум ыкIи шъолъырым хэхъоныгъэ языгъэшIыщт проектхэм адэлэжьагъэх.

Командэмэ организацие зэфэшъхьафмэ пшъэрылъих къафагъэнэфагъ:

· Зипсауныгъэ фыкъуагъэ зиIэ сабыймэ машIо щынэгъончъэнымкIэ къэбарым зэрэщагъэгъозэщтхэр. Пропагандэм итехнологие зэхэгъэуцогъэныр ыкIи зипсауныгъэ фыкъуагъэ зиIэ сабыйхэр ащ фэгъэсэгъэнхэр (пшъэрылъыр къэзгъэнэфагъэр — ГКОУ РА «Адыгейская республиканская школа-интернат для детей с нарушениями слуха и зрения» зыфиIорэм гъэсэкIо IофшIэнымкIэ ипащэ игуадзэу Зоя Петрашевар).

· Инклюзивнэ щагу Мыекъуапэ къыщызэIухыгъэныр. Зэтегъэпсыхьэгъэ щагу гъэпсыгъэныр, ащ инклюзивнэ дизайнэу цIыфхэмкIэ Iэрыфэгъу хъущтыр хэшIыхьэгъэныр (пшъэрылъыр къэзгъэнэфагъэр — АНО «Агентство социально-культурных инициатив «Талантида» зыфиIорэм ипащэу Карен Каракьяныр).

· Зипсауныгъэ зэщыкъогъэ цIыфхэм общественнэ транспортымкIэ зекIонхэ амал ягъэгъотыгъэныр. Сервисымрэ инфраструктурэмрэ гъэпсыгъэныр, обществэм хэгъэгъозэгъэнхэр, ащ пае шIыкIэшIухэр къэгъотыгъэнхэр (пшъэрылъыр къэзгъэнэфагъэр — ныбжьыкIэ политикэмкIэ ыкIи гъэсэкIо IофшIэнымкIэ МКъТУ-м игъэIорышIапIэ ипащэу Ирина Ширинар).

· Псауныгъэ къэзытырэ шхыныгъохэр ыкIи ныбжьыкIэхэр. НыбжьыкIэхэр пщэр мыхъунхэм пае ашхырэм фэсакъыгъэным ыкIи физическэ культурэм хэщэгъэнхэм афэшI инновационнэ ыкIи социальнэ гукъэкIхэмрэ цифрэ сервисхэмрэ шIыгъэнхэр (пшъэрылъыр къэзгъэнэфагъэр — ООО «ВОРДИ» ишъолъыр къутамэу Адыгэ Республикэм щыIэм итхьаматэу Анна Рауд).

· IэутIэ жабзэр къизыIотыкIырэ Приложениер гъэпсыгъэныр. Мобильнэ приложением ипрототип ащ пае шIыгъэныр (пшъэрылъыр къэзгъэнэфагъэр — ВОИ-м и Адыгэ республикэ организацие итхьаматэу Ирина Божковар).

· Финансовэ гъэсэныгъэ ублэпIэ классмэ ащеджэрэмэ апае. Интерактивнэ гъэсэныгъэ джэгукIэхэр зэхэгъэуцогъэнхэр (пшъэрылъыр къэзгъэнэфагъэр — экономикэмрэ гъэIорышIэнымрэ яфакультет идеканэу, экономикэ шIэныгъэхэмкIэ кандидатэу, доцентэу Ешыгоо Светлан).

Экспертхэмрэ гъэсакIохэмрэ проектхэм ягъэхьазырынкIэ ыкIи уасэ афэшIыгъэнымкIэ Iофышхо ашIагъ. Специалист пэпчъ командэм ышIэщтыр фиIопщыщтыгъэ, дэIэпыIэщтыгъэ. Хакатоныр зэфашIыжьыгъ проектнэ гукъэкIхэм ялъэтегъэуцокIэ. Iофтхьабзэм хэлэжьагъэмэ яIофшIагъэхэр зэкIэ къагъэлъэгъуагъэх, джащ фэдэу онлайн-мэкъэтыным хэлэжьагъэх, анахь социальнэ пшъэрылъ дэгъоу алъытэрэмэ амакъэхэр афатыгъэх.

ШIум и Хакатон хэлэжьагъэмэ шIухьафтынхэмрэ IэшIу-IушIухэмрэ афагъэшъошагъэх. Мы хъугъэ-шIагъэм къыгъэлъэгъуагъ студентхэр, кIэлэегъаджэхэр ыкIи социальнэ организациехэр зэдэлажьэхэ хъумэ шIогъэшхо къызэритырэр.