Студенческэ научнэ обществэм (СНО) изичэзыу зэIукIэгъу университетым щыкIуагъ, ар непэрэ уахътэм анахь темэ шъхьаIэу щыхъугъэм фэгъэхьыгъагъ — искусственнэ интеллектыр научнэ IофшIэным зэрэщагъэфедэрэм. Зэхахьэм хэлэжьагъэхэр тегущыIагъэх ИИ-р студентмэ зэрадэIэпыIэщт курсовойхэр, дипломнэ IофшIэнхэр, магистерскэ диссертациехэр ыкIи научнэ статьяхэр атхыхэ зыхъурэм.

Iофтхьабзэр зэрищагъ техническэ шIэныгъэхэмкIэ кандидатэу, информационнэ щынэгъончъэным ыкIи прикладной информатикэм икафедрэ ипащэу, Научнэ-гъэсэныгъэ гупчэу «Искусственнэ интеллектым епхыгъэ промышленнэ робототехникэр ыкIи технологиехэр» зыфиIорэм иIэшъхьэтетэу Цундышк Вячеслав.

ЗэIукIэгъум анахь упчIэ шъхьаIэхэу непэрэ уахътэм диштэрэ технологиехэм афэгъэхьыгъэхэм атегущыIагъэх:

· ИИ-р агъэфедэзэ акъылыгъэ хэлъэу рабочэ процессыр зэрэзэхащэщтыр;

· информацием иугъоинкIэ уахътэу къатырэр зэрэбгъэкIэкIыщт шIыкIэр;

· интеллектуальнэ технологиехэр бгъэфедэхэзэ ушэтынхэм ядэгъугъэ нахьышIу зэрэпшIыщтыр.

АшIогъэшIэгъон хъугъэмэ ащыщ нейросетым амалэу къытыхэрэр, научнэ тхыгъабэхэр охътэ кIэкIым зэрэзэхифыхэрэр, купкIыр къазэрэхихырэр. Хэутыгъэ мин пчъагъэ такъикъ заулэм къыкIоцI зэпыригъэзэн елъэкIы, литературэ шъхьаIэр къыхегъэщышъу ыкIи гукъэкIхэр къегъэнафэх.

Къыхагъэщыгъэхэм ащыщыр искусственнэ интеллектыр «гукъэкIхэм ягенераторэу» зэрэхъурэр ары, ушэтыным лъэныкъо зэфэшъхьафэу иIэхэр къетых, гипотезэхэр къыхегъэщых. Ащ дакIоу академическэ шъыпкъэныгъэми тегущыIагъэх, ар зы Iофыгъо шъхьаIэу зэIукIэгъум хэтыгъ.

— Зыщыбгъэгъупшэ мыхъущтыр: ИИ-р ощ пае тхэнэу щытэп — ар уигъусэу тхэн фае. Студентыр гукъэкIым иавторэу къэнэжьы, ащ пшъэдэкIыжь ехьы къыгъэлъагъорэ щысэхэм, зэфэхьысыжьэу фишIыхэрэм апае, —къыкIигъэтхъыгъ спикерым.

Iофтхьабзэм икIэухым СНО-м ипащэу Ирина Селивановам рэзэныгъэ гущыIэхэр зэхахьэм хэлэжьагъэмэ апигъохыгъэх, къэкIощт зэIукIэгъум итемэхэри къыIопщыгъэх.

Студенческэ научнэ обществэм шъукъыхахьэх — тапэкIэ джыри зэIукIэгъубэ, гукъэкIыбэ ыкIи научнэ ушэтыныбэ илъ!