Урысые Федерацием ыкIи Адыгэ Республикэм ябгъэхалъхьэхэр зыщаратыжьырэ торжественнэ зэхахьэ Къэралыгъо филармонием щыкIуагъ, ащ хэлэжьагъ республикэм и ЛIышъхьэу КъумпIыл Муратэ.

Зэхахьэм университетым илIыкIохэри къыщыхагъэщыгъэх. Апшъэрэ еджапIэм хэхъоныгъэхэр егъэшIыгъэнхэм иIахьышхо зэрэхилъхьагъэм фэшI, цIэ лъапIэу «Урысые Федерацием игъэсэныгъэ иIофышIэ ГъэшIуагъ» зыфиIорэр УФ-м и Президент и Унашъо елъытыгъэу къыфагъэшъошагъ МКъТУ-м научнэ IофшIэнымкIэ ыкIи инновационнэ хэхъоныгъэмкIэ ипроректорэу Татьяна Овсянниковам.

Джащ фэдэу къыхагъэщыгъэх МКъТУ-м хэхьэрэ Дзэ егъэджэн гупчэм ипащэу Нурлан Самадьяновымрэ гупчэм икIэлэегъаджэхэмрэ. Пилот зэрымыс быбырэ аппаратхэм ягъэIорышIэн фэIэзэщт специалистхэр ахэмэ агъэхьазыры. Непэрэ уахътэр пштэмэ, хэгъэгум ищынэгъончъэнкIэ ыкIи икъэухъумэнкIэ анахь лъэныкъо шъхьаIэу щытыр ары.

Торжественнэ зэхахьэм хэлэжьагъэх къэралыгъо хабзэм иорганхэм, ухъумэкIо структурэхэм, федеральнэ ыкIи шъолъыр ведомствэхэм ялIыкIохэр, депутатхэр, общественнэ организациехэм, IофшIэкIо купхэм ыкIи гъэсэныгъэ организациехэм яIофышIэхэм ащыщхэр.

— Шъуащыщ пэпчъ зэрыт чIыпIэм иIоф щегъэцакIэ, пшъэдэкIыжьышхо хэлъэу мэлажьэ. Шъощ фэдэ IэпэIасэхэр ары республикэм икIэгъэкъонхэр, тызэгъусэу тэ бэ зэшIотхын тлъэкIыщт. Сицыхьэ пытэ телъ, тапэкIи тиреспубликэ хэхъоныгъэ едгъэшIыным тыдэлэжьэщтых, ащ шIогъабэ къыфэтхьыщт. Джыри зэ сышъуфэгушIо бгъэхалъхьэхэу къэжъулэжьыгъэхэм апае! — къыIуагъ республикэм илIышъхьэ.

Зэхахьэм икIэухым, КъумпIыл Мурат бзылъфыгъэхэм ямафэкIэ афэгушIуагъ, ахэмэ яIахьышхоу Адыгеим ыкIи зэрэ Урысыеу хэхъоныгъэ ягъэшIыгъэным халъхьэрэр къыхигъэщыгъ —акъылыгъэу, IэпэIэсэныгъэу, гугъуемылIыныгъэу отраслэ пэпчъ къыщагъэлъагъорэр ары лъэгапIэхэм хэгъэгур афэзыщэрэр.