Мыекъопэ къэралыгъо технологическэ университетым стартап-инкубаторэу «ИнноВектор.ГроуБокс» зыфиIорэм IофшIэныр щыригъэжьагъ — студенческэ технологическэ проектхэм ыкIи командэхэм хэхъоныгъэ ягъэшIыгъэным игупчакIэм.

Ащ ипшъэрылъ шъхьаIэр — студентхэу технологическэ предпринимательствэм пылъхэм ягукъэкIхэмрэ якреативнэ екIолIакIэхэмрэ хэхъоныгъэ ягъэшIыгъэнымкIэ амалхэр ятыгъэныр ыкIи яунэе проектхэу гукъэкIым къыщыублагъэу прототипым нэсыхэрэм адэлэжьэнхэр.

Инкубаторыр хэлажьэрэмэ адэIэпыIэ:

· инновациехэм адэлажьэрэ Фондым изэнэкъокъоу «Студенческэ стартапым» хэлэжьэщтхэр гъэхьазырыгъэнхэр;

· свидетельствэхэр ыкIи патентхэр тхыгъэнхэмкIэ заявкэхэр гъэпсыгъэнхэр;

· проектым иедзыгъо пэпчъ Iоф дэшIэгъэнымкIэ экспертнэ IэпыIэгъу зэгъэгъотыгъэныр.  

МКъТУ-м опытышхо зыIэкIэлъ ныбжьыкIэхэм азыфагу технологическэ предпринимательствэм хэхъоныгъэ щегъэшIыгъэным ренэу ыуж ит. Аужырэ уахътэм акселерационнэ программи 3 агъэцэкIагъ, ахэмэ студент 1500-рэ ахэлэжьагъ, стартап-проект 250-м ехъу щызэхагъэуцуагъ. Технологическэ предпринимательствэм фытегъэпсыхьэгъэ Iофтхьабзэмэ университетыр чанэу ахэлажьэ: предакселераторхэм, НТИ-м, пилот зэрымыс авиационнэ системэхэм хэхъоныгъэ ягъэшIыгъэным фэгъэхьыгъэхэм, джэгукIэу «Фудсоветым», профильнэ форумхэм ыкIи нэмыкI проектхэм.  

Джырэ уахътэм стартап-инкубаторхэм зэнэкъокъу шIыкIэм тетэу хэлэжьэщтхэр къыхахы — гукъэкIхэм ябэдзэр рагъэкIокIы. Резидентхэу «ИнноВектор.ГроуБокс» зыфиIорэм иIэщтхэр анахь командэ дэгъухэу зипроектхэм осэшхо экспертмэ къафэзышIыхэрэр ары.  

ЗэкIэмкIи къыхэхыным студенческэ командэ 33-рэ хэлажьэ. КIэлакIэмэ шIошъхъуныгъэ пытэ яIэнэу, шIыкIэ дэгъухэр къагъотынхэу,   стартап-инкубатору «ИнноВектор.ГроуБокс»  зыфиIорэм чанэу хэлэжьэнхэу тафэлъаIо!