Мыекъопэ къэралыгъо технологическэ университетым илIыкIо куп Агробиотехнопаркэу «Кластер Вавиловым» илъэтегъэуцо хэлэжьагъ, ар мэкъу-мэщымкIэ УФ-м и Министрэу Оксана Лут Адыгэ Республикэм къызщыкIуагъэм къыдыхэлъытагъэу рагъэкIокIыгъ.

МКъТУ-м ыцIэкIэ Iофтхьабзэм хэлэжьагъэхэр: ректорэу Къуижъ Саид;  научнэ IофшIэнымкIэ ыкIи  инновационнэ хэхъоныгъэмкIэ проректорэу Татьяна Овсянниковар; МКъТУ-м хэхьэрэ мэкъу-мэщымкIэ Научнэ-ушэтэкIо институтым ипащэу Хьаткъо Казбек; мэкъу-мэщ продукцием икъыдэгъэкIын технологиехэм якафедрэ ипащэу, Мамсыр Нурбый; МКъТУ-м и НИИСХ селекцием ыкIи первичнэ семеноводствэм иотдел инаучнэ IофышIэ шъхьаIэу  Марина Кузенко.

Мэкъу-мэщымкIэ УФ-м и Министрэу Оксана Лут Адыгэ Республикэм и ЛIышъхьэу КъумпIыл Мурат игъусэу  агробиотехнопаркэу «Кластер Вавиловым» иухьазырыныгъэ уасэ фашIыгъ, илъэсым къехъукIэ узэкIэIэбэжьмэ ащ ишIын рагъэжьэгъагъ.  Проектыр научнэ-производственнэ гупчакIэу, ушэтынхэм къащегъэжьагъэу чылапхъэхэм ягъэхьазырын анэсыжьэу, производством итIупщын лъыпэдзыжьыгъэу щытыщт.

Агробиотехнопаркым хэтэу, соинвесторэу игъус компаниеу «RUSEED» зыфиIорэр, ащ хэхьащтых молекулярнэ лабораториехэр, илъэс реным Iоф зышIэщт фитотроннэ комплексыр, селекционнэ-семеноводческэ гупчэр, опытнэ Iахьхэр, гъэсэныгъэ гупчэхэр, джащ тетэу непэрэ уахътэм диштэрэ инфраструктурэр агъэпсыщт, ахэмэ лъэпкъыкIэхэр, гибридхэр, мэкъу-мэщ культурэхэм апае аушэтыщтых.  

Шъугу къэдгъэкIыжьын, 2025-рэ илъэсым ижъоныгъокIэ мазэ Мыекъопэ къэралыгъо технологическэ университетымрэ   автономнэ мыкоммерческэ организациеу «ГъэIорышIэкIо компаниеу селекционнэ-семеноводческэ гупчэу «Джаджэ» зыфиIорэмрэ зэрэзэдэлэжьэщтхэмкIэ зэзэгъыныгъэм зэдыкIэтхагъэх.  Университетым Агробиотехнопаркым ирезидент статусыр иIэ хъугъэ, Адыгэ Республикэм и ЛIышъхьэу КъумпIыл Мурат яIэпыIэгъоу агъэцакIэ.

Мыекъопэ къэралыгъо технологическэ университетым илIыкIо куп Агробиотехнопаркэу «Кластер Вавиловым» илъэтегъэуцо зэрэхэлэжьагъэм къегъэлъагъо университетыр чанэу шъолъырым инаучнэ-технологическэ инфраструктурэ игъэпсын,  селекционнэ-семеноводческэ лъэныкъор ыкIи непэрэ  биоэкономикэм хэхъоныгъэ ышIынхэм иIофхэм зэрахэлажьэрэр.