Мэкъу-мэщ продукцием икъыдэгъэкIын технологиехэмкIэ МКъТУ-м икафедрэ икIэлэегъэджэ шъхьаIэу Андрей Собкаловыр урысые зэнэкъокъоу «Агропромышленнэ комплексым ипэрытхэр» зыфиIорэм и Мастерской гъэIорышIапIэу «Сенежым» ифинал ихьагъ.

Мэкъу-мэщымкIэ Урысые Федерацием и Министерствэрэ президентскэ платформэмрэ зэнэкъокъур атIупщыгъ — Президентым иунашъо елъытыгъэу. Мэкъу-мэщымкIэ Урысые Федерацием и Министрэу Оксана Лут къызэрэхигъэщыгъэу проектым ипшъэрылъ шъхьаIэр — гъэIорышIэкIо чанхэр къэгъотыгъэнхэр ары, агропромышленнэ комплексэу лъэныкъуабэхэм афэгъэзагъэм хэхъоныгъэхэр рагъэшIынхэм фэхьазырхэр — наукэм ыкIи гъэсэныгъэм къащыублагъэу бизнесым ыкIи къэралыгъо гъэIорышIэным анэсыжьэу.

Зэнэкъокъум хэлажьэ зышIоигъохэр бэ хъугъэх: заявкэхэр нэбгырэ 7594-мэ къатыгъэх, ахэр Урысыем ишъолъыр 89-рэ ыкIи IэкIыб хэгъэгу 11-мэ ащыщыгъэх. Финалым анахь дэгъоу хэлэжьэгъэ нэбгырэ 245-рэ ихьагъэр — ахэр агробизнесым, наукэм, гъэсэныгъэм ыкIи къэралыгъо хабзэ органхэм ялIыкIох. Очнэу зыщызэнэкъокъугъэхэм финалистхэр командэхэм ахэтхэу кейсхэм адэлэжьагъэх, гъэIорышIэкIо амалхэр зэрагъэшIагъэх ыкIи гъэлъэшыгъэ шIыкIэм тетэу гъэсэныгъэ программэхэр акIугъэх.
ГъэсакIомэ зэрадэгущыIагъэхэр Iофыгъо шъхьаIэхэм ащыщыгъ — отраслэм пэрытныгъэ щызыIыгъхэм. Финалым ихьагъэмэ къадэгущыIагъэх ФедерациемкIэ Советым аграрнэ-гъомлэпхъэ политикэмкIэ ыкIи чIыопсым дэлэжьэгъэнымкIэ и Комитет итхьаматэу Александр Двойных, ООО «Русид» иучредителэу Марк Гехт, Ставропольскэ къэралыгъо мэкъу-мэщ университетым иректорэу Владимир Ситниковыр, джащ фэдэу, гъэцэкIэкIо пащэу, компаниеу ЭФКО ипэщэ купхэм ясовет хэтэу Сергей Ивановыр.

Зэнэкъокъум идесэхэм ягъэцэкIэн зэфэхьысыжьэу фэхъугъэхэмкIэ текIоныгъэр нэбгырэ 54-мэ афагъэшъошагъ, ахэмэ егъэджэнхэр апшъэрэ пащэхэм ягъэхьазырынкIэ хэушъхьафыкIыгъэ программэм тетэу акIущтых.

— Шъыпкъэр пIощтмэ, мыщ фэдэ зэнэкъокъум ифинал уихьаныр — пшъэдэкIыжь ин ыкIи гъэхъагъэу щыт. Мыщ цIыф лъэшхэр, Iушхэр, агропромышленнэ комплексым зэхъокIыныгъэхэр фэзышIы зышIоигъохэр къыщызэрэугъоигъэх. Анахьэу сэркIэ мэхьанэ зиIагъэр сиIофшIэгъухэм садэгущыIэныр ары, опытымкIэ сяхъожьыныр, гъэIорышIакIомэ япшъэрылъыкIэхэм язэгъэшIэн. Мы зэнэкъокъум къыгъэлъэгъуагъ, отраслэм технологие къодыеп ищыкIагъэр, ар гъэIорышIакIохэу IофыгъуакIэхэр къэзыугупшысыхэрэмэ ащэкIэ. Сигуапэ дэд профессиональнэ сообществэм сэри сыщыщэу зэрэхъугъэр, студентмэ садэлажьэ хъумэ, научнэ проектхэм сишIэныгъакIэхэр ащызгъэфедэнхэм сыфэхьазыр», — къыддэгощагъ Андрей Собкаловыр.

Андрей Собкаловыр финалым зэрихьагъэм къегъэлъагъо университетскэ наукэмрэ непэрэ АПК-м ылъэныкъокIэ гъэсэныгъэу щыIэмрэ зэрэзэхъокIыхэрэр, ащ фэдэ специалистхэм неущрэм итехнологическэ ыкIи игъэIорышIэн Iофхэр зэрагъэпсыщтхэр.