МКъТУ-м научнэ IофшIэнымкIэ ыкIи инновационнэ хэхъоныгъэмкIэ ипроректорэу Татьяна Овсянниковам неущрэм итехнологиехэм яя IV-рэ Форумэу Москва щыкIуагъэм хэлэжьагъ, ар Урысые Федерацием биоэкономикэр щыгъэпсыгъэным фэгъэхьыгъагъ.

Неущрэм итехнологиехэм я Форум — ар зыщызэхэгущыIэжьхэрэ площадкэу щыт, 2023-рэ илъэсым агъэпсыгъ, хэлажьэрэ экспертмэ, шIэныгъэлэжьмэ, бизнесым ыкIи къэралыгъо хабзэм иорганхэм ялIыкIохэм пэрыт научнэ проектхэм атегущыIэх, ахэр экономикэм зэрэщагъэфедэщт шIыкIэм зэдегупшысэх. Мы илъэсым темэ шъхьаIэу фэхъугъэр биоэкономикэр ары —стратегическэ лъэныкъуакIэу генетикэр, биотехнологиер зэзыпхырэр, чIыопсым егъэпшэгъэ материалхэр зыгъэхьазырырэр, псэ зыпыт системэхэм адэлажьэ.

Форумым хъугъэ-шIэгъэ шъхьаIэу фэхъугъэр ипленарнэ зэхэсыгъо УФ-м и Президентэу Владимир Путиныр зэрэхэлэжьагъэр ары. Къэралыгъом и ЛIышъхьэ къыкIигъэтхъыгъ, хэгъэгум щырагъэжьагъ лъэпкъ проектэу биоэкономикэм фэгъэхьыгъэм игъэцэкIэн, ащ ипшъэрылъыр — суверенитетыр гъэпсыгъэныр анахь лъэныкъо шъхьаIэхэмкIэ ыкIи пэрытныгъэ чIыпIэхэр убытыгъэнхэр, Урысыем шIэныгъэ екIолIакIэ икъуныр иIэу щыт.

Форумым нэбгырэ 1800-рэ Урысыем ыкIи IэкIыб хэгъэгухэм ащыщхэу хэлэжьагъэх, зэкIэмкIм компание 120-рэ. Ащ иIофшIэн хэтыгъэх УФ-м и Правительствэ и Тхьаматэ и Апэрэ гуадзэу Денис Мантуровыр, УФ-м и Правительствэ и Тхьаматэ игуадзэу Дмитрий Чернышенкэр, наукэм ыкIи апшъэрэ гъэсэныгъэмкIэ УФ-м и Министрэу Валерий Фальковыр, научнэ гупчэ ыкIи корпорацие инхэм ялIыкIохэр, ахэмэ ащыщых НИЦ «Курчатовский институт», «Росатом», зыфиIохэрэр, джащ фэдэу дунэе научнэ сообществэм щыщхэр.

Iофтхьабзэм ипрограммэ тематическэ сессие 30-м ехъурэ панельнэ зэхэгущыIэжьрэ хэтыгъэх, ахэр лъэныкъуиплIэу гощыгъагъэх: «Технологиехэр: биоэволюциер», «ЦIыфыр: псэупIэ чIыпIакIэр», «Отраслэхэр: зыпкъитыныгъэ хэхъоныгъэр» ыкIи «Экосистемэр: обществэм истратегие». Пчэгум итыр — искусственнэ интеллектыр фармэм щыгъэфедэгъэныр, медицинэм ыкIи АПК-м, синтетическэ биологием, ядернэ технологиехэр биоэкономикэм, гъомлэпхъэ щынэгъончъагъэм, биоиндустрием, генетическэ ресурсхэм ыкIи инвестициехэр биотехнологием ахэлъхьэгъэнхэр.

ХэушъхьафыкIыгъэ хъугъэ-шIагъэу щытыгъэр научнэ конференциеу «Биоэкономикэр цIыфым пае» зыфиIоу НИЦ «Курчатовскэ институтым» щыкIуагъэр ары. Научнэ-техническэ советым изэхэсыгъо къыдыхэлъытагъэу стратегическэ упчIэхэу хэгъэгум ибиологическэ наукэ ыкIи промышленностым афэгъэхьыгъэхэм щатегущыIагъэх, джащ фэдэу лъэпкъ проектэу «Технологическэу биоэкономикэр зэтегъэпсыхьэгъэныр» зыфиIорэри зэхафыгъ.

Неущрэм итехнологиехэм я Форум МКъТУ-р зэрэхэлэжьагъэм къегъэлъагъо университетыр федеральнэ научнэ-технологическэ повесткэм ыкIи стратегическэ лъэныкъоу хэгъэгум хэхъоныгъэ зэришIырэм зэрэхэщагъэр. Технологическэ шэпхъакIэм фэдэу биоэкономикэр зэтегъэпсыхьэгъэным университетым инаукэ пае амалыкIэхэр къетых, кадрэхэр экономикэм фэгъэхьазырыгъэнхэм, инновационнэ шIыкIэхэр къагъотынхэм апае.