Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ МКъТУ-м иректорэу Къуижъ Саидэ.

Зэхэсыгъом иповесткэ фемыжьэхэзэ профессорскэ-кIэлэегъэджэ купым щыщхэу зимэфэкIыгъэхэм афэгушIуагъэх. Ащ къыкIэлъыкIоу университетым исоциальнэ ыкIи игъэсэныгъэ политикэ япхыгъэ упчIэхэр зэхафыгъэх.

Повесткэм къыдыхэлъытагъэу гурыт профессиональнэ гъэсэныгъэм игъэсэныгъэ программэхэу 2026-2027-рэ еджэгъу илъэсхэм ателъытагъэхэм университетым узэрэчIэхьащт шIыкIэр аштагъ, джащ фэдэу приемым иконтрольнэ цифрэхэм ыкIи ыпкIэ хэлъэу зэзэгъыныгъэ шIыкIэмкIэ агъэнафэрэ чIыпIэхэр къыхахыгъэх, ахэмэ ащыщыгъ МКъТУ-м икъутамэу поселкэу Яблоновскэм дэтыри.

Стипендиальнэ лъэныкъоу ыкIи материальнэ IэпыIэгъоу университетым ащырагъэкIырэмэ афэгъэхьыгъэ Положением зэхъокIыныгъэхэр фашIыгъэх. А Iофыгъом къыдыхэлъытагъэу ректорым ыцIэкIэ стипендие агъэнэфагъ, ар зэратыщтхэр пилот зэрымыс авиационнэ системэхэм яподразделениехэм къулыкъу ащахьынэу зэзэгъыныгъэм кIатхэхэрэр ары. Ащ фэшъхьафэу, университетым иIофышIэхэм яматериальнэ IэпыIэгъу фэгъэхьыгъэ унашъохэри Положением щызэрахъокIыгъэх.

Апшъэрэ гъэсэныгъэм ипрограммэкIэ еджэхэрэмэ яуплъэкIун ыкIи ашIырэ къэралыгъо зэфэхьысыжь аккредитациехэм афэгъэхьыгъэ нормативнэ документхэр шIэныгъэлэжьхэм ясовет зэблихъугъахэх, ахэмэ ащыщых Медицинскэ институтым истудентмэ аттестациер компьютернэ тестирование шIыкIэм тетэу зэракIущтыри.

ХэушъхьафыкIыгъэ унашъокIэ зэдаштагъ университетым фондэу «ТекIоныгъэм» сомэ мини 100 зэрэфигъахьыщтыр.

Зэхэсыгъом икIэухым ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Муратэ упчIэу «Университетым щеджэрэ студентмэ ыпкIэу къатырэр къегъэIыхыгъэныр» зыфиIорэмкIэ къэгущыIагъ.

УпчIэу зэхэсыгъом къыщаIэтыгъэр зэкIэ зэхафыгъ, унашъоу аштагъэхэр Мыекъопэ къэралыгъо технологическэ университетым игъэсэныгъэ процесс нахьышIу шIыгъэным, щеджэхэрэмрэ Iоф щызышIэхэрэмрэ социальнэ IэпыIэгъу афэхъунхэм афытегъэпсыхьагъэх.