Мыекъопэ къэралыгъо технологическэ университетым «ОхътакIэм диштэрэ пилотхэр» зыфиIорэр щыкIуагъ, ар Дунэе форумэу «Пилот зэрымыс системэхэр: тIогъогогъо агъэфедэрэ технологиехэр» зыфиIорэм иящэнэрэ мафэ къыдыхэлъытагъэу зэхащагъ. Къыблэ дзэ округым и ГъэIорышIапIэ яIэпыIэгъоу къэгъэлъэгъоныр рагъэкIокIыгъ.

Iофтхьабзэм студентхэр, кIэлэеджакIохэр ыкIи отраслым иэкспертхэр зэрипхыгъэх, пилот зэрымыс технологиехэмкIэ гъэхъагъэу аужырэ уахътэм ашIыгъэхэр къызщагъэлъэгъогъэ площадкэ шIагъо хъугъэ. Ащ хэлэжьагъэмэ нэIуасэ зыфашIыгъ охътакIэм диштэрэ технологиякIэхэу специалистхэм зэхагъэуцуагъэхэм, пилот зэрымыс системэхэм адэлэжьэгъэнымкIэ практическэ опыти зэрагъэуIугъ.

ХьакIэмэ апае тематическэ площадкэу тфы зэхащэгъагъ. Анахьэу цIыфмэ ашIогъэшIэгъоныгъэр «БПЛА-мэ яоператорхэр зыщагъэхьазырырэ штабыр» зыфиIорэр ары, ащ дронхэр зэрагъэIорышIэхэрэмкIэ егъэджэн лъэныкъохэр къыщатыгъэх, джащ фэдэу агу рихьыгъэх «Беспилотнэ авиацием исалон» ыкIи «Дронхэр зыщызэпагъачъэрэ полигоныр» зыфиIохэрэр, ахэмэ техникакIэхэр къащагъэлъэгъуагъэх ыкIи форумым илокацие нахь дэгъоу къэлъэгъуагъэх. Пилот зэрымыс техникэм икъэгъэлъэгъон хъугъэ-шIагъэм игупчэ шъыпкъагъ, отраслым хэхъоныгъэ егъэшIыгъэным игугъапIэ ащ щызэхэпшIэнэу щытыгъ.

КIэлэеджакIомэ апае профориентационнэ площадкэу «Уигъэхъагъэмэ ягъунапкъэхэр» зыфиIорэм Iоф ышIагъ. Ащ МКъТУ-м ифакультетмэ мастер-классхэр къыщатыгъэх, университетым игъэсэныгъэ амалхэм кIэлэеджакIохэр нэIуасэ щыфашIыгъэх, инженернэ ыкIи техническэ сэнэхьатхэр зыфэдэхэр арагъэшIагъэх.

Шъугу къэдгъэкIыжьын, тыгъосэрэ мафэр дронхэм язэпэчъэнкIэ ыкIи игъэкIотыгъэ интерактивнэ программэу кIэлэеджакIомэ апае агъэхьазырыгъэмкIэ зэфашIыжьыгъагъ.