Мы мафэхэм Мыекъопэ къэралыгъо технологическэ университетым Дунэе форумэу «Пилот зэрымыс системэхэр: тIогъогогъо агъэфедэрэ технологиехэр» зыфиIорэм иIофшIэн щаублагъ.

Торжественнэу форумыр къызызэIуахым хьакIэ лъапIэхэр хэлэжьагъэх: Адыгэ Республикэм и Къэралыгъо Совет-Хасэм итхьаматэ игуадзэу Цэй Эдуард, ВКС-м икомандование шъхьаIэ кадрэхэмкIэ игъэIорышIапIэ дзэ гъэсэныгъэмкIэ иотдел иофицер шъхьаIэу Дмитрий Турсумбаевыр, гъэсэныгъэмрэ шIэныгъэмрэкIэ АР-м и Министрэу Евгений Лебедевыр, Апэрэхэм я Движение игъэIорышIапIэ итхьаматэу, Урысые Федерацием и ЛIыхъужъэу Артур Орловыр.

Программэр мэфищым телъытагъ. Апэрэ мафэм Дзэ егъэджэн гупчэм ибазэ пилот зэрымыс аппаратхэм якъэгъэлъэгъон щыкIуагъ, интерактивнэ программэу Дзэ егъэджэн гупчэм икурсантмэ ыкIи кIэлэеджакIомэ апае зэхащагъ, джащ фэдэу Дунэе научнэ-практическэ конференциеу «Цифрэ революциер: пилот зэрымыс системэхэр ыкIи искусственнэ интеллектыр» зыфиIорэр университетым щырагъэкIокIыгъ. Конференциер секциитIоу гощыгъагъэ: «Научнэ ушэтынхэр ыкIи пилот зэрымысыщт системэхэмрэ искусственнэ интеллектымрэ инновационнэ екIолIакIэхэр къафэгъотыгъэнхэр: шIэныгъэлэжьхэмрэ промышленностымрэ зэдэгъэлэжьэгъэнхэр» ыкIи «Пилот зэрымыс системэхэм ыкIи искусственнэ интеллектым апае ныбжьыкIэ инновациехэр» зыфиIорэр.

Форумым инепэрэ мафэ дронхэм язэпэгъэчъэнрэ интерактивнэ программэмрэ хэтыгъэх, ахэр кIэлэеджакIохэм афэгъэхьыгъагъэх: «Пилот зэрымыс аппаратмэ якIуалIэрэ апэрэ лъэубэкъухэр ыкIи AI-технологиехэр» зыфиIорэм щагъэгъозагъэх. Лъэпкъ технологическэ олимпиадэм (НТО), ТехноГТО-м инормативхэм ыкIи киберфизическэ платформэу «Быр» зыфиIохэрэм нэIуасэ афэхъунхэм, инженернэ амалхэр зэрагъэшIэнхэм программэр атегъэпсыхьагъ. Ащ фэшъхьафэу, Урысыем ит Дзэ егъэджэн гупчэхэм ялIыкIохэр МКъТУ-м иректорэу Къуижъ Саидэ IукIагъэх. ЗэIукIэгъум тапэкIэ зэрэзэдэлэжьэщтхэм, пилот зэрымыс технологиехэм хэхъоныгъэхэр зэрарагъэшIыщтхэм щатегущыIагъэх. Дронхэм язэпачъэхэм ащытекIуагъэхэм якъыхэгъэщынкIэ мафэр аухыгъ.

а I-рэ чIыпIэр — Урысые технологическэ университетыр МИРЭА

я 2-рэ чIыпIэр — Мыекъопэ къэралыгъо технологическэ университетыр

я 3-рэ чIыпIэр — Темыр-Кавказскэ федеральнэ университетыр

Шъугу къэдгъэкIыжьын, Дунэе форумэу «Пилот зэрымыс системэхэр: тIогъогогъо агъэфедэрэ технологиехэр» зыфиIорэр Мыекъопэ къэралыгъо технологическэ университетым ятIонэрэу щызэхащэ. Мыгъэ ащ иIэпыIэгъух Адыгэ Республикэм и ЛIышъхьэу КъумпIыл Мурат, шIэныгъэмрэ апшъэрэ гъэсэныгъэмрэкIэ Урысые Федерацием и Министерствэ ыкIи къэухъумэгъэнымкIэ УФ-м и Министерствэ. Лъэпкъхэм языкIыныгъэ и Илъэсэу 2026-р къызщаIопщыгъэм тефэу ар рагъэкIокIы, университетхэр, научнэ-гъэсэныгъэ гупчэхэр ыкIи хъызмэтшIапIэхэр зы стратегическэ пшъэрылъыр зэдагъэцакIэ — Урысые Федерацием итехнологическэ суверенитет агъэпытэ.

Хъугъэ-шIэгъэшхом зэрипхыгъэх апшъэрэ еджапIэмэ ялIыкIохэу Москва, Екатеринбург, Иркутскэ, Донецкэ, Луганскэ, Белгород, Ростова-на-Дону, Нижний Новгородым, Ставрополь, Налщыкъ, Краснодар, Уфа, Астрахань, Саратов, Челябинскэ, Ульяновскэ, Санкт-Петербург ыкIи Иннополисым ащыщхэр, Адыгэ Республикэм ыкIи Мыекъуапэ ягурыт еджапIэмэ, яколледжмэ ащеджэхэрэр, джащ фэдэу хабзэр, АР-м ипрофильнэ министерствэхэр, мыкоммерческэ организациехэр.

Форумым мэхьанэшхо къезытырэмэ ащыщ Донецкэ апшъэрэ общекоманднэ дзэ училищэм илIыкIохэр къызэрэхэлажьэхэрэм. ЛIыкIо купым хахьэх — сержантэу Глеб Токаревыр, младшэ сержантэу Виктор Гильдебрант, рядовоеу Евгений Кудрявцевыр — хэушъхьафыкIыгъэ дзэ операцием ахэр хэлэжьагъэх. ЛIыкIо купым ипащэр естественнэ-научнэ дисциплинэхэм якафедрэ иIэшъхьэтетэу Дорофеева Юлия Александр ыпхъур ары.

Неущ форумым изэфэхьысыжь маф. Программэм къыдыхэлъытагъэу къэгъэлъэгъонэу «Непэрэ уахътэм диштэрэ пилотхэр» зыфиIорэр МКъТУ-м хэхьэрэ Дзэ егъэджэн гупчэм щыкIощт.