Мыекъопэ къэралыгъо технологическэ университетым Дунэе форумэу «Пилот зэрымыс системэхэр: тIогъогогъо агъэфедэрэ технологиехэр» зыфиIорэр щырагъэжьагъ.

Адыгэ Республикэм и ЛIышъхьэу КъумпIыл Мурат, шIэныгъэмрэ апшъэрэ гъэсэныгъэмрэкIэ Урысые Федерацием и Министерствэ ыкIи къэухъумэгъэнымкIэ УФ-м и Министерствэ яIэпыIэгъухэу ятIонэрэу мы илъэсым форумыр зэхащэ. Лъэпкъхэм языкIыныгъэ и Илъэсэу 2026-р къызщаIопщыгъэм тефэу ар рагъэкIокIы, университетхэр, научнэ-гъэсэныгъэ гупчэхэр ыкIи хъызмэтшIапIэхэр зы стратегическэ пшъэрылъыр зэдагъэцакIэ — Урысые Федерацием итехнологическэ суверенитет агъэпытэ.

Хъугъэ-шIэгъэшхом зэрипхыгъэх апшъэрэ еджапIэмэ ялIыкIохэр, Адыгэ Республикэм ыкIи Мыекъуапэ ягурыт еджапIэмэ, яколледжмэ ащеджэхэрэр, джащ фэдэу хабзэр, АР-м ипрофильнэ министерствэхэр, мыкоммерческэ организациехэр. Форумым игеографие къегъэлъагъо пилот зэрымыс системэхэу дзэм ыкIи гражданскэ лъэныкъохэм афэгъэзагъэхэр бэ дэдэмэ зэрашIогъэшIэгъонхэр. Мы илъэсым Урысые Федерацием ишъолъыр 19-мэ лIыкIохэр къарыкIыгъэх: Москва, Екатеринбург, Иркутскэ, Донецкэ, Луганскэ, Белгород, Ростова-на-Дону, Нижний Новгородым, Ставрополь, Налщыкъ, Краснодар, Уфа, Астрахань, Саратов, Челябинскэ, Ульяновскэ, Санкт-Петербург ыкIи Иннополисым.

Торжественнэ зэхахьэм хьэкIэ лъапIэхэр хэлэжьагъэх. ШIуфэс псалъэхэр къашIыгъэх Адыгэ Республикэм и Къэралыгъо Совет-Хасэм итхьаматэ игуадзэу Цэй Эдуард, ВКС-м икомандование шъхьаIэ кадрэхэмкIэ игъэIорышIапIэ дзэ гъэсэныгъэмкIэ иотдел иофицер шъхьаIэу Дмитрий Турсумбаевым, гъэсэныгъэмрэ шIэныгъэмрэкIэ АР-м и Министрэу Евгений Лебедевым, Апэрэхэм я Движение игъэIорышIапIэ итхьаматэу, Урысые Федерацием и ЛIыхъужъэу Артур Орловым, Мыекъопэ къэралыгъо технологическэ университетым иректорэу Къуижъ Саидэ.

Форумым ипрограммэ мэфищ къыделъытэ. Непэ университетым ибазэ ыкIи Дзэ егъэджэн гупчэм пилот зэрымыс аппаратхэм якъэгъэлъэгъон щыкIуагъ, интерактивнэ программэу Дзэ егъэджэн гупчэм икурсантмэ ыкIи кIэлэеджакIомэ апае зэхащагъ, джащ фэдэу Дунэе научнэ-практическэ конференциеу «Цифрэ революциер: пилот зэрымыс системэхэр ыкIи искусственнэ интеллектыр» зыфиIорэр рагъэкIокIыгъ. IофшIэн шъхьаIэхэу конференцием щыряIагъэхэр: пилот зэрымыс системэхэр зыгъэIорышIэщтхэу IэпэIэсэныгъэшхо зыхэлъыщт кадрэхэм ягъэхьазырын; научнэ ушэтынхэр ыкIи тIогъогогъо агъэфедэрэ технологиехэм апае инновационнэ шIыкIэхэр къэгъотыгъэнхэр; пилот зэрымыс системэхэм ыкIи искусственнэ интеллектым апае ныбжьыкIэ инновациехэр.

Конференциер секциитIоу гощыгъагъэ: «Научнэ иушэтынхэр ыкIи пилот зэрымысыщт системэхэмрэ искусственнэ интеллектымрэ инновационнэ екIолIакIэхэр къафэгъотыгъэнхэр: шIэныгъэлэжьхэмрэ промышленностымрэ зэдэгъэлэжьэгъэнхэр» ыкIи «Пилот зэрымыс системэхэм ыкIи искусственнэ интеллектым апае ныбжьыкIэ инновациехэр» зыфиIорэр.

Форумым ипрограммэ шъхьафэу фытегъэпсыхьэгъагъ кIэлэеджакIохэр зыхагъэлэжьэгъэхэ интерактивнэ IофшIэным. Пилот зэрымыс технологиехэм хэушъхьафыкIыгъэ аудиторииплIымэ нэIуасэ ащыфэхъугъэх. Ащ фэдэ шапхъэм ишIуагъэкIэ пилот зэрымыс аппаратхэм яоператорхэу заушэтыгъэ къодыеп, джэгукIэ технологиехэри зэрагъэлъэгъугъэх. Мастер-классэу «Пилотированием ылъапсэхэр: Коптерхэр» зыфиIорэр Дзэ егъэджэн гупчэм икIэлэегъаджэхэмрэ икурсантхэмрэ зэращагъ, ащ хэлэжьэгъэ кIэлэеджакIомэ коптернэ шапхъэ зиIэ дроным игъэIорышIэнкIэ апэрэ десэхэр акIугъэх. Мастер-классэу «Пилотированием ылъапсэхэр: Самолетхэр» зыфиIорэр самолет теплъэ зиIэ дронмэ афэгъэхьыгъагъ. КIэлэеджакIомэ апае десэу «Технологиехэр ыкIи компьютернэ джэгукIэхэр» зыфиIорэр зэхащагъ. Ахэмэ афэшъхьафэу, лъыхъокIо отрядэу Адыгэ Республикэм щылажьэрэ «ЛизаАлерт» игуфакIомэ зэIукIэгъу адашIыгъ, ар пилот зэрымыс аппаратхэр практическэу зэрагъэфедэхэрэм афэгъэхьыгъагъ. ЦIыфэу кIодырэмэ якъэгъотыжьынкIэ зигугъу тшIырэ системэм ишIуагъэу къакIорэр, ахэр къэгъэнэжьэкIо операциехэм зэрахагъэлажьэхэрэм атегущыIагъэх

Дунэе форумэу «Пилот зэрымыс системэхэр: тIогъогогъо агъэфедэрэ технологиехэр» зыфиIорэм иIофшIэн неущ лъагъэкIотэщт. Дронмэ язэпачъэ хьакIэхэри форумым хэлажьэхэрэри еплъынхэ алъэкIыщт. Программэм икIэухым текIоныгъэ къыдэзыхыгъэхэр къыхагъэщыщтых. ТимэкъэгъэIумэ шъуакъылъыплъэх!