МКъТУ-м и «Точка кипение» зэIукIэ экспертым щыдашIыгъ — НКО «Важные вещи» зыфиIорэм ипэрытэу Ирина Дербеневам. ЗэIукIэгъум хэлэжьагъэх университетым истудентхэр, Лицееу № 34-м, гурыт еджапIэу № 16-м якIэлэеджакIохэр ыкIи МГГТК-м иколледж щеджэхэрэр.

ЗэIукIэгъур маркетингым, сервисым ыкIи туризмэм якафедрэ идоцентэу, МКъТУ-м и ТК ипрограммнэ пащэу, ныбжьыкIэ проектхэм я Урысые зэнэкъокъоу «Уигухэлъ факIу» зыфиIорэм ипащэу Светлана Новиковам зэрищагъ. Социальнэ проектмэ яавторхэр мафэ къэс зэутэкIыхэрэ гумэкIыгъохэр ары зэIукIэгъум хэлэжьагъэхэр зытегущыIагъэхэр.

Темэ шъхьаIэ хъугъэр агъэцакIэрэ Iофым, темэу къаIэтырэм шIулъэгъоу фашIырэр, стратегическэ ресурсым екIолIакIэу фыряIэр ары. Ирина Дербеневам къыгъэлъэгъуагъ игущыIэхэу «Зажигаю внутренние гирлянды» зыфиIорэр нэужым грантовэ заявкэхэм яедзыгъохэу зэрэхъухэрэр. Ащ къызэриIуагъэмкIэ, щэхъурэ Iоф уимыIэу Iофым упылъми, документацием удэлэжьэнэу уахътэ огъотышъу, ащ проектым псэ къыпегъакIэ.

Шъхьафэу тегущыIагъэх гукъэкIхэм зэрадэлажьэхэрэм. Экологическэ екIолIакIэр щысэ ашIызэ, проектхэм ягъэIорышIэнкIэ шIыкIэхэр къагъоты. ЗытегущыIагъэхэм ащыщ къадэмыхъугъэри зэрагъэфедэрэр, игъом мыхъурэм ыуж икIынхэшъ, къадэхъурэ Iофым зыфагъэзэныр нахь тэрэзэу къыхахыгъ.

Командэм игъэпсын фэгъэхьыгъэ зэдэгущыIэгъур гъэшIэгъоныгъэ. Экспертым къафиIотагъ гупшысэгъухэмрэ къадезымыгъаштэхэрэмрэ зэрэзэхафышъущтыр. Iофым пыужьынхэмрэ, джащ фэдэу гъунапкъэу зыблэмыкIыщтхэмрэ гъэнэфэгъэныр, фэшъхьафхэри къаIэтыгъэх. Ахэр зэкIэ гъэцэкIэгъэнхэм пае нахь сакъэу яIофхэм апылъынхэр къыхахы.

ЗэдэгущыIэгъум къыщыхагъэщыгъ игъом «хьаIу» пIошъуными мэхьанэ зэриIэр, проектхэм ягъэцэкIэнкIэ нэужым пэрыохъу къыпфэмыхъужьынхэм пае, уиунэе Iофрэ хымэмрэ зэхэпфышъуныр. Командэр зэдэIужьэу зэдэпсэуным ар фэIорышIэ.

Мы охътэ благъэ, илъэси 5-10-м нэс гугъапIэу щыIэм атегущыIагъэх, непэрэ гъэIорышIэкIо шIыкIэхэмрэ пшъэрылъ чыжьэу агъэуцухэрмрэ зэрэзэпхыгъэхэр зэхафыгъ. ЗэIукIэгъум зэфэхьысыжьэу фашIыгъэр, гухэлъыр — ар аужырэ чIыпIэу щытэп, ащ къыкIэлъэкIо стратегиер, мафэ къэс Iоф дэшIэгъэныр.

ЗэIукIэгъум итрансляцие зэнэкъокъум икупэу «Уигухэлъ факIу» зыфиIорэр зыхэт «ВКонтакте» шъущеплъыжьын шъулъэкIыщт.