Мыекъопэ къэралыгъо технологическэ университетым хэгъэгум иухъумакIохэм я Мафэ тефэу гуфэбагъэ зыхэлъ зэIукIэгъу щыкIуагъ, тьюторхэр, студентхэу зипсауныгъэ фыкъуагъэ зиIэхэр, ахэмэ яянэ-ятэхэр зэхэхьагъэх. Ащ фэдэ Iофтхьабзэхэр МКъТУ-м хабзэ щыхъугъэх — зэIукIэнхэр, ямэфэкI мафэхэу мэхьанэ зиIэхэр хагъэунэфыкIынхэр.

ЗэIукIэр зигукъэкIыгъэр автомобильнэ транспортым икафедрэ идоцентэу, апшъэрэ еджапIэм итьюторхэм якомандэ ипащэу Наталья Машининар, ащ гъусэгъоу иIагъэр егъэджэн IофшIэнымкIэ проректорэу Людмила Задорожнаяр ыкIи ныбжьыкIэ политикэмкIэ ыкIи гъэсэкIо IофшIэнымкIэ гъэIорышIапIэм ипащэу Ирина Ширинар, ар мэфэкIымкIэ къэзэрэугъоигъэхэм къафэгушIуагъ, псауныгъэрэ рэхьатныгъэрэ яIэнэу къафэлъэIуагъ.

Анахьэу агухэр къэзгъэбырсырыгъэхэр документальнэ фильмэу «Верность больше жизни: история Андрея и Сармата» зыфиIоу зэплъыгъэхэр ары, тапэкIэ къэтыныр федеральнэ телеканалхэм, ахэмэ зэу ащыщ Россия I-м къащагъэлъэгъуагъэх. ДзэкIолIыхьэу Сарматым ыкIи ащ ибысымэу — хэушъхьафыкIыгъэ дзэ операцием хэлэжьэгъэ Андрей Мухиным якъэбар гупсэфэу зи къыгъэнагъэп. Ар лIыхъужъыгъэу, шIэжьэу уахътэм нахь лъэшхэм афэгъэхьыгъ.

А тарихъым епхыгъ МКъТУ-м истудентэу Андрей Жаровыр — дзэкIолIым икIалэ. Ащ чъыгым художественнэ Iэмэ-псымэхэр ахешIыкIы. ИIофшIагъэхэм ащыщыр — гум нэсырэ композициеу «ЦIыфэу хьэм зыфэзыуфагъэр» — Андрей шIухьафтынэу ритыгъ Андрей Мухиным, заохэм зиныбджэгъу шъыпкъэу Сарматыр къыщычIэзынагъэм. Ащ ыуж нафэ хъугъэ, Шытхьалэ щыщмэ пхъэм хэшIыкIыгъэ пкъыгъожъыехэу тистудент ышIыгъэхэр маскировочнэ хъытыухэм ахашIагъэх. Уахътэм къызэригъэлъэгъуагъэу, студентым иIофшIагъэ Андрей Жаровым италисман шъыпкъэ хъугъэ — ар бгъэджыбэм илъэу къырехьакIы. Джырэ уахътэм дзэкIолIым фэшъхьаф хьэу игъусэр, ау Сармат ащ ыгу илъ, щыгъупшэрэп.

Николай Соколовым лъэтегъэуцо фишIыгъ авторскэ орэдэу «Курэжъыер — сэ ситахът» зыфиIорэм, ащ къыреIотыкIы IэкIоцI лIыхъужъыгъэр, пэрыохъухэм апэшIуекIогъэныр.

ХэушъхьафыкIыгъэ программэр Вероника Монисовам къыгъэхьазырыгъ — ащ кIалэмэ шIухьафтын цIыкIухэр къаритыгъэх ыкIи тьюторхэр игъусэхэу мэфэкI Iанэр къыгъэкIэрэкIагъ.

Мыщ фэдэ зэIукIэхэм джыри зэ къагъэлъагъо: МКъТУ-м истудент пэпчъ, ятарихъ пэпчъ ыкIи ахэм ягуетныгъэ егъэлъапIэ. МэфэкI щайешъоным зэкIэхэри зэрипхыгъэх, шъхьэкIэфэныгъэрэ гуфэбагъэрэ хэлъэу зэIукIэр кIуагъэ.