Урысые студенческэ отрядмэ я Мафэ тефэу Адыгэ Республикэм форумышхоу «Труд Крут» зыфиIорэр щыкIуагъ, ащ кIэлэеджакIохэр, студентхэр, хабзэ органмэ ялIыкIохэр, апшъэрэ еджапIэмэ ясообществэ, IофшIэпIэ чIыпIэ къэзытыхэрэр ыкIи РСО-м идвижение иветеранхэр зэрипхыгъэх.

Мыекъопэ къэралыгъо технологическэ университетым илIыкIо куп форумым хэлэжьагъ. Ащ хэтыгъэх: сэнэхьат къыхэхынымкIэ ыкIи апшъэрэ еджапIэм чIэхьащтхэм ягъэхьазырынкIэ Гупчэм ипащэу Олег Франко; специалист шъхьаIэу Гупчэм щылажьэрэ  Наталья Елец; МКъТУ-м икъутамэу поселкэу Яблоновскэм дэтым иIофышIэу Лъащэкъо Зарем; студентхэр — Даниил Родионовыр; Дмитрий Соломаха; Игорь Майборода.

НыбжьыкIэмэ яIэпэIэсэныгъэ къызщагъэлъэгъогъэ ыкIи зыщапсыхьэгъэ площадкэу форумыр хъугъэ. Ащ хэлэжьагъэхэр адэгущыIэнхэ алъэкIыгъ Гупчэм ипащэхэм ыкIи иIофышIэхэм, зэдэгущыIэгъу кIэкIхэр акIугъэх, яупчIэхэмкIэ джэуапхэр агъотыгъэх.  

ХьакIэ лъапIэу Iофтхьабзэм хэлэжьагъ Урысые обществэу «ШIэныгъэм» илекторэу, «Сенеж» зыфиIорэм Мастерскоим игъэIорышIапIэ итренер-экспертэу, зэнэкъокъоу «Лидеры России» зыфиIорэм щытекIуагъэу Олег Лебедевыр. Ащ ипсалъэ къыщыхигъэщыгъ профессиональнэ эволюциеу щыIэм, IэпэIэсэныгъэу пхэлъын фаер гъэхъагъэ пшIыным фэшI, къыхэпхырэ сэнэхьатым мэхьанэу иIэр ыкIи нэмыкIхэр.

— «Карьерэр — ар IофшIэныр мафэ къэс зыщагъэцакIэрэ гъогу, хэхъоныгъэ уегъэшIы, ыпэкIэ улъегъэкIуатэ. Хабзэ афэхъугъэ гъэхъагъэ закъохэр IэубытыпIэ ошIыкIэ икъурэп, ор-орэу IэпэIэсэныгъэ къызхэбгъэфэн ыкIи уиамалхэм затебгъакIэзэ уигъогу урыкIон фае», — къыхигъэщыгъ Олег Лебедевым.

МКъТУ-м истудентхэр форумым зэрэхэлэжьагъэхэм ишIуагъэкIэ яIэпэIэсэныгъэ хагъэхъуагъ, практическэ IофшIэнхэр алъэгъугъэх, зыдэкIощтхэ лъэныкъохэр агъэнэфэшъугъэх.