Мыекъопэ къэралыгъо технологическэ университетым истуденткэхэр общественнэ щыIэкIэ-псэукIэм, еджэным ыкIи гуфэкIо IофшIэным чанэу зэрахэлажьэхэрэм афэшI Урысые Федерацием и Къэралыгъо Думэ идепутатэу Лариса Тутовам рэзэныгъэ тхылъхэмкIэ къыхигъэщыгъэх.

Щылэ мазэм ыкIэхэм Ростовскэ къэралыгъо  экономическэ университетым (РИНХ)  иплощадкэ Урысые Федерацием икIэлэегъэджэ апшъэрэ еджапIэхэм ялIыкIохэр зыхэлэжьагъэхэ телемостыр щыкIуагъ, ащ темэу иIагъэр: «Миссия педагога в сохранении традиций и культурного наследия народов России как основа многонационального единства» зыфиIорэр ары, «Единэ Россием» ипартийнэ проектэу  «ЕджэпIакIэр зыфиIорэм къыдыхэлъытагъэу ар щытыгъ. Адыгэ Республикэм илIыкIохэр Iофтхьабзэм чанэу зэрэхэлэжьагъэхэм осэшхо Лариса Тутовам къафишIыгъ ыкIи ежь ышъхьэкIэ ахэр къыхигъэщыгъэх, рэзэныгъэ тхылъхэр афигъэшъошагъэх: Мыекъопэ къэралыгъо технологическэ университетым хэхьэрэ Медицинскэ институтым истуденткэхэу Виолетта Алалым ыкIи Еутых Динарэм. Рэзэныгъэ тхылъым къыщеIо: «Сицыхьэ пытэ телъ, шIэныгъэу жъугъотыгъэхэр къышъухьэпэщтых общественнэ щыIэкIэ-псэукIэм Iахьэу хашъулъхьэрэр лъыжъугъэкIотэным, а лъэныкъомкIэ Iоф шъушIэным пае».

Iофтхьабзэм хэлэжьагъэх УФ-м и Къэралыгъо Думэ идепутатэу Хьасэнэ Муратэ, МКъТУ-м иректорэу Къуижъ Саидэ, егъэджэн IофшIэнымкIэ проректорэу Людмила Задорожнаяр ыкIи Медицинскэ институтым ипащэу Хъурай Аслъан.

Ректорэу Саида Казбек ыпхъум къыхигъэщыгъ,  медицинэ лъэныкъом феджэрэ студентмэ  профессиональнэ сферэм имызакъоу общественнэ щыIакIэми зэрэхэлажьэхэрэр. Ащ къызэриIуагъэмкIэ, университетым амалыбэ студентмэ ареты икъоу заушэтыным, хэхъоныгъэхэр сыд фэдэрэ лъэныкъохэмкIи ашIынхэм, обществэм къулыкъу афахьыным афэшI.

Тистуденткэмэ тафэгушIо къалэжьыгъэ текIоныгъэр къазэрэдахыгъэм пае, тапэкIэ джыри еджэным, наукэм ыкIи общественнэ IофшIэным гъэхъагъэхэр щашIынхэу тафэлъаIо!