Мостовской районым икIэлэеджакIохэр, къэзэкъ пшъэшъэжъыехэр, юнармейцэхэр Мыекъуапэ щыIагъэх, я 13I-рэ мотострелковэ бригадэм итарихърэ инепэрэ щыIакIэрэ защагъэгъозагъ. ЗэкIэмкIи экскурсием нэбгырэ 50-м ехъу хэлэжьагъ.

Апэ рапшIэу экскурсием хэлажьэрэмэ къэгъагъэхэр мемориалэу я 131-рэ мотострелковэ бригадэм фэгъэхьыгъэу агъэпсыгъэм кIаралъхьагъэх. Къэзэрэугъоигъэхэм шIуфэс псалъэхэр къафашIыгъэх Мыекъопэ къэзэкъ отделым иесаулэу Сергей Захаровымрэ Таллинскэ артиллерийскэ бригадэм иветеранхэм я Совет итхьаматэу Александр Саркисовымрэ.

Акциеу «Посылка солдату» зыфиIорэм къыдыхэлъытагъэу кIэлэеджакIомэ гуманитарнэ IэпыIэгъу тидзэкIолIхэм афагъэхьыгъ.

Ащ къыкIэлъыкIоу экскурсантхэр бригадэм имузей щыIагъэх. Мыщ дзэ частым гъэхъагъэу ышIыгъэхэм ягугъу къыщашIыгъ, ахэр къэзыIотагъэхэр Александр Саркисовымрэ частым иветеранэу Анатолий Вербицкэмрэ. Обществэу «ШIэныгъэм» илекторэу, МКъТУ-м чIыдэгъэ IофымкIэ ыкIи энергетикэмкIэ якафедрэ идоцентэу Николай Старковым Сталинградскэ заом ыкIи Адыгеир, джащ фэдэу Мыекъуапэ шъхьафит зэрашIыжьыгъэхэм афэгъэхьыгъэхэр къыIотагъэх. КIэлэеджакIохэр тарихъым хэхьэгъэ дзэ техникэм щыщхэм яплъыгъэх.

ДзэкIолIмэ апае концерт къатыгъ, Мостовскэ районым икIэлэцIыкIу творческэ купым къыгъэхьазырыгъэу къычIэкIыгъ. Мафэм икIэухым ПсынэкIэчъэу «Солдатский» зыфиIорэм екIолIагъэх.

Iофтхьабзэр зэхэзыщагъэхэр: Урысые обществэу «ШIэныгъэм» и Адыгэ шъолъыр къутам, Пшызэ къэзэкъыдзэм и Мыекъопэ къэзэкъ отдел, Мостовской районым гъэсэныгъэмкIэ игъэIорышIапI ыкIи Мостовской районым икъэзэкъ обществэ.

КIэлэеджакIохэр кIожьыгъэх, ау джыри Мыекъуапэ къакIохэмэ зэрашIоигъор къыхагъэщыгъ.