Непэ къыхэтэгъэщых зиIофшIэнкIэ, зисэнаущыгъэкIэ ыкIи игуетыныгъэкIэ наукэр ыпэ изыгъэшъыхэрэр, лъызгъэкIуатэхэрэр, лIэужхэр ушэтыныкIэхэм афэзыщэхэрэр.

Мы мафэм наукэм зищыIэныгъэ фэзгъахьыгъэ бзылъфыгъэмэ зэкIэмэ тазэрэфэразэр къыкIэтэгъэтхъы. Шъо шъуиIофшIэн обществэм хэхъоныгъэ егъэшIыгъэным фэIорышIэ, культурнэ кIэныр къаухъумэ, неущрэ мафэр агъэпсы.

Адыгэ Республикэм итарихъ чIыпIэ шIагъо щеубыты КIэрэщэ Зайнаб Ибрахьимэ ыпхъум — зэлъашIэрэ бзэ-шIэныгъэлэжьым, кIэлэегъаджэм ыкIи общественнэ IофышIэм. Адыгеим ибзылъфыгъэхэмкIэ апэрэу  ар филологие шIэныгъэхэмкIэ доктор хъугъэ (1969-рэ илъэс), профессорыцIэр (1970-рэ илъэс), «НаукэмкIэ РСФСР-м изаслуженнэ IофышI» (1982) ыкIи «Адыгэ Республикэм изаслуженнэ IофышI» (1993) зыфиIорэ цIэ лъапIэхэр къыфагъэшъошагъэх.

Зайнаб Ибрахьимэ ыпхъум инаучнэ IофшIэнхэр афигъахьыгъэх морфологием, синтаксисым, диалектологием ыкIи адыгабзэм илексикографие язэгъэшIэн. Ащ научнэ IофшIэни 100-м ехъу къыхиутыгъ. Анахь IофшIэн инэу иIагъэр  «Грамматика адыгейского языка» зыфиIорэр ары (1966), профессорэу Рогавэ Георгий Виссарион ыкъом игъусэу ар ыгъэхьазырыгъагъ. Адыгабзэм изэхэф гущыIалъэу Хьатанэ Абдулэрэ ежьыррэ зэхагъэуцуагъэм мэхьанэшхо иIагъ, непэ къызнэсыгъэми ар агъэфедэ.

Ащ Iахьышхоу шIэныгъэ Iофым хилъхьагъэр бэ дэд. Зайнаб Ибрахьимэ ыпхъур Егъэджэн-методическэ советэу АР-м гъэсэныгъэмрэ шIэныгъэмрэкIэ и Министерствэ иIэм, АР-м и Президент дэжь адыгабзэмкIэ Советэу щыIэм, нэмыкIыбэхэм ахэтыгъ, Дунэе Адыгэ Хасэм иIофшIэн чанэу ахэлажьэщтыгъэ, СССР-м и Апшъэрэ Совет ыкIи шъолъыр советхэм депутатэу ахадзыщтыгъэ.

ЗэлъашIэрэ шIэныгъэлэжьыр зыщыпсэущтыгъэ унэу Мыекъуапэ дэтым  мэлылъфэгъум и 24-м 2008-рэ илъэсым шIэжь пхъэмбгъу къыфызэIуахыгъ. А унэм ар 1970-рэ илъэсым къыщыублагъэу 1988-м нэс чIэсыгъ.