Мыекъопэ къэралыгъо технологическэ университетым хэхьэрэ мэкъу-мэщымкIэ Научнэ-ушэтэкIо институтым Iэнэ хъураеу «Мэкъу-мэщ производствэмкIэ шъофхэр къэзгъэгъунэрэ мэз лъагъохэм мэхьанэу яIэр» зыфиIорэр щыкIуагъ, Урысые наукэм и Мафэ ар фэгъэхьыгъагъ.  

Къэралыгъо хабзэм иорганхэм ялIыкIохэр, университетым иIэшъхьэтетхэр ыкIи сообществэм илIыкIохэр Iофтхьабзэм зэрипхыгъэх. ШIуфэс псалъэ къэзышIыгъэхэр: АР-м и Къэралыгъо Совет-Хасэм итхьаматэ игуадзэу Цэй Эдуард, мэкъу-мэщымкIэ АР-м иминистрэ иапэрэ гуадзэу Сергей Шопиныр, Мыекъопэ къэралыгъо технологическэ университетым иректорэу Къуижъ Саид. Научнэ ушэтынэу ашIырэмэ мэкъумэщ отраслымкIэ мэхьанэшхо яIэу зэрэщытыр, Мыекъопэ къэралыгъо технологическэ университетым хэхьэрэ мэкъу-мэщымкIэ Научнэ-ушэтэкIо институтым мэкъумэщымкIэ мэхьанэ зиIэ научнэ IэшIагъэхэр къызэрэпигъохыхэрэр, шъолъырымкIэ федэ къызэрахьырэр къэгущыIагъэмэ къыхагъэщыгъ. Зэхэсыгъор зэрищагъ научнэ IофшIэнымкIэ ыкIи инновационнэ хэхъоныгъэмкIэ МКъТУ-м ипроректорэу Татьяна Овсянниковам.

Iэнэ хъураем IофшIэныр зырегъажьэм научнэ-ушэтэкIо лабораторием илъэтегъэуцоу коцым идэгъугъэкIэ МКъТУ-м и НИИСХ къыгъэлъэгъуагъэм фашIыгъ. Ар зэрищагъ мэкъу-мэщымкIэ Научнэ-ушэтэкIо институтым ипащэ ипшъэрылъхэр зыгъэцакIэрэ Хьаткъо Казбек. Лабораторием IофшIэн шъхьаIэу ыгъэцакIэхэрэр къагъэлъэгъуагъэх, джащ фэдэу чIыгу гъэпсыным ыкIи селекцием алъэныкъокIэ яIахьэу мэкъу-мэщым халъхьагъэр

Iэнэ хъураем иIахь шъхьаIэ университетым испециалистхэр къыщыгущыIагъэх. Лэжьыгъэхэр къызщагъэкIырэ хьасэхэм адэжь шъофхэр зэпызыутырэ мэзхэр щагъэтIысхьанхэ зэрэфаер, ащ шIуагъэу къытырэр къыIотагъ шIэныгъэ-ушэтэкIо институтым инаучнэ IофышIэ шъхьаIэу Николай Алентьевым. МКъТУ-м иэкологическэ факультет идеканэу Галина Коноваловам проектэу «Технология восстановления и сохранения редких видов растений» зыфиIорэм къытегущыIагъ, макIэу къэкIы хъугъэхэр къызэтегъэнэжьыгъэнхэм пае технологиеу агъэфедэщтхэм ягугъу ащ къышIыгъ. Проектыр бэмэ ашIогъэшIэгъоныгъ.

Iофтхьабзэм хэлажьэрэ хьакIэхэр мэкъу-мэщымкIэ Научнэ-ушэтэкIо институтым иматериальнэ-техническэ базэу агъэкIэжьыгъэр арагъэлъэгъугъ. Коцыр къэзыугъоирэ селекционнэ комбайнэу Classic Plus зыцIэу университетым зэригъэгъотыгъэр бэмэ къыхагъэщыгъ, ащ ишIуагъэкIэ научнэ ыкIи опытнэ IофшIэнхэр зэшIуахых.

Мыекъопэ къэралыгъо технологическэ университетымрэ ащ хэхьэрэ мэкъу-мэщымкIэ Научнэ-ушэтэкIо институтымрэ ащылажьэхэрэм якъыхэгъэщын Iэнэ хъураем къыдыхэлъытэгъагъ. Чанэу зэрэлэжьагъэхэм, профессиональнэ гъэхъагъэхэр зэрашIыгъэхэм ыкIи научнэ-ушэтын IофшIэнэу агъэцакIэрэм апае мэкъу-мэщымкIэ АР-м и Министерствэ ищытхъу тхылъхэр ыкIи АР-м и Къэралыгъо Совет-Хасэм ирэзэныгъэ тхылъхэр анахь дэгъухэм афагъэшъошагъэх. Системнэ IофшIэнэу апшъэрэ еджапIэхэм ащылажьэрэ купмэ агъэцакIэрэм бгъэхалъхьэхэр къакIэлъыкIуагъэх, ахэр пшъэрылъэу агропромышленнэ комплексым хэхъоныгъэ егъэшIыгъэным ыкIи мэкъу-мэщ шъолъырхэр зыпкъ итхэу ыпэкIэ лъыкIотэнхэм афытегъэпсыхьагъэх.