ЩыIэх угукIэ рэхьатэу узытегущыIэн умылъэкIыщт хъугъэ-шIагъэхэр, ау ахэр хэгъэгум итарихъ щыщых, нэбгырэ пэпчъи яхьылIагъэх. Ащ фэдэхэм зэу ащыщ Сталинград шъхьафит зэрашIыжьыгъэм пылъ хъишъэр. А хъугъэ-шIагъэм фэгъэхьыгъагъ МКъТУ-м щызэхащэгъэ Iофтхьабзэу «Сталинград ТекIоныгъэм фищагъэх» зыфиIорэр.

Зэхэт патриотическэ Iофтхьабзэр зэхэзыщагъэхэр мэкъумэщ технологиехэм яфакультетрэ инженернэ факультетымрэ ыкIи МБУК «ТхылъеджэпIэ системэ Гупчэр» «Къалэу Мыекъуапэ», тхылъеджэпIэ-къутамэу №2-рэ. ЗэIукIэм ипшъэрылъ шъхьаIэр — тарихъ шIэжьыр къэухъумэгъэныр ары, гражданскэ пшъэдэкIыжьым фэпIугъэнхэр ыкIи ТекIоныгъэр къытфыдэзыхыгъэ лIыхъужъмэ ялIэуж шъхьэкIэфэныгъэ фэшIыгъэныр.

ТхылъеджапIэм иIофышIэу Наталья Плюхинам тарихъ сыхьатыр зэрищагъ, джащ фэдэу тхылъ къэгъэлъэгъоныр афызэхищагъ ыкIи «Заор зыфэдагъэр зыщышъумыгъэгъупш!» зыфиIорэ темэмкIэ зэдэгущыIэгъу адишIыгъ. Ар Адыгеим нэмыц-техакIохэр рафыжьыхи, шъхьафит зэрашIыжьыгъагъэм фэгъэхьыгъагъ. ДокументхэмкIэ, тхылъхэмкIэ ыкIи занкIэ зэдэгущыIэгъухэмкIэ студентхэм Хэгъэгу зэошхом илIыхъужъыгъэ нэкIубгъохэр зыфэдагъэхэр икъоу зэхашIагъ.

Анахьэу анаIэ зытырадзагъэр зэошхо зыщIыкIогъэ чIыпIэр ары —Сталинград пае зэрэзэуагъэхэм, ар мафэ ыкIи чэщ 200-рэ кIуагъэ. ЗэIукIэгъум хэлэжьагъэмэ ашIагъ къалэм стратегическэ мэхьанэу иIагъэр, советскэ армием лIыхъужъыгъэшхо зэрихьэзэ пыим зэрэпэуцужьыгъэр, приказэу №227-р, хъугъэ-шIэгъэ тхьамыкIагъохэу шышъхьэIум и 23-м 1942-рэ илъэсым щыIагъэхэм ыкIи Мамаев Iуашъхьэм — лIыхъужъыгъэм ыкIи цIыфхэм зыкъызэрамытырэм ятамыгъэ.

Сталинград иухъумакIохэм афэгъэхьыгъэ къэбархэр агухэм ахэтIысхьагъэх: дзэкIолI 24-рэ хъухэу зэлъашIэгъэ Павловым иунэ пае зэуагъэхэм, Матвей Путиловым фэгъэхьыгъэр, ищыIэныгъэ хилъхьагъэми, связыр къэзышIыжьыгъэм, Советскэ Союзым и ЛIыхъужъэу Петр Болотэм фэгъэхьыгъэр, изакъоу пыим итанкий къэзыгъэуагъэм, джащ фэдэу дзэкIолI пащэ пэрытхэу ТекIоныгъэр къэзгъэблэгъагъэхэм.

МКъТУ-м ылъэныкъокIэ Iофтхьабзэм хэлэжьагъэх автомобильнэ транспортым икафедрэ идоцентэу Наталья Шаповаловар ыкIи чIыгу гъэпсынымкIэ кафедрэм идоцентэу Ирина Селивановар.

Непэ, а илъэсхэр агу къагъэкIыжьызэ, фронтым щызэуагъэмэ, тылым щылэжьагъэмэ, тихэгъэгу зэтезгъэуцожьыгъэмэ зэкIэмэ шъхьэкIафэ афэтэшIы, тшъхьэ афэтэуфэ. Советскэ народым илIыхъужъыгъэ зы тамыгъэу тишIэжь къыхэнэщт, ти Родинэ изыкIыныгъэ къыгъэлъэгъощт.

Тыгу къэкIыжьы. Тырэпагэ. Тауж къэкIырэ лIэужхэри щыдгъэгъозэщтых.