Мыекъопэ къэралыгъо технологическэ университетым и Медицинскэ институт студентэу къычIитIупщыхэрэр аIукIагъэх ФКУЗ МСЧ-23 Урысыем и ФСИН ялIыкIохэм, зэхахьэр зыфэгъэхьыгъагъэр медицинскэ специалистхэм IофшIапIэ ягъэгъотыгъэныр ары.

ЗэIукIэм хэлэжьагъэх МКъТУ-м и Медицинскэ институт ипащэу Хъурэе Аслъанрэ апшъэрэ еджапIэм къычIитIупщыхэрэмэ IофшIэпIэ чIыпIэ къафэгъотыгъэным дэлэжьэрэ Гупчэм ипащэу Темзэкъо Азаматрэ. Ахэмэ къыхагъэщыгъ университетымрэ IофшIэпIэ чIыпIэ къэзытыхэрэмрэ язэIукIэмэ мэхьанэ зэряIэр, сэнэхьатым икъыхэхынкIэ къычIатIупщыхэрэм хэдэнхэ амал зэрагъотырэм ишIуагъэ къызэрэкIорэр.

ФКУЗ МСЧ-23 Урысыем и ФСИН алъэныкъокIэ рагъаджэрэмэ къадэгущыIагъэх учреждением ипащэу, IэкIоцI къулыкъум иподполковникэу Ольга Цыцорар, кадрэхэм яотдел ипащэу, пIуныгъэ ыкIи социальнэ IофшIэным фэгъэзагъэу, IэкIоцI къулыкъум иподполковникэу Антонина Абакумовар, кадрэхэм яотдел иинспектор шъхьаIэу, пIуныгъэ ыкIи социальнэ IофшIэным фэгъэзагъэу, IэкIоцI къулыкъум илейтенантэу Елена Осипенкэр, джащ фэдэу къутамэу «Медицинская часть № 17» зыфиIорэм ипащэу, врачэу, IэкIоцI къулыкъум икапитанэу Оксана Гашевар.

ЗэIукIэгъум хэлэжьагъэхэр игъэкIотыгъэу тегущыIагъэх апшъэрэ еджапIэм къычIитIупщырэмэ IофшIэпIэ чIыпIэу къапагъохын алъэкIыщтхэм, ординаторхэм практикэ ащарагъахьыным, джащ фэдэу уголовнэ-гъэцэкIэкIо системэм къулыкъу щыпхьыным шIуагъэу къытыхэрэм. ФСИН-м илIыкIомэ къаIотагъ яIофшIакIомэ социальнэ фэгъэкIотэныгъэу яIэхэр зыфэдэхэр, зыпкъ итхэу къулыкъур зэрахьырэр, медицинскэ специалистхэм зэращыкIэхэрэр.

ЗэдэгущыIэгъур игъэкIотыгъэу, къэбархэмкIэ ушъагъэу щытыгъ. КъычIатIупщырэмэ упчIэхэр атынхэ алъэкIыгъ, ахэмкIэ джэуапхэр агъотыгъэх, Урысыем и ФСИН и медицинскэ подразделениехэм Iоф ащызышIэщтхэм зэращыкIэхэрэм, ар къыхэзыхырэмэ шIуагъэу агъотыщтхэм ягугъу ашIыгъ.